މިއުނިކް (ފެބްރުއަރީ 12) - ޖަރުމަނު ލީގުގައި މިރޭ ވީއެފްއެލް ބޯކުމް އިން 4-2 އިން އެންމެ ފަހުގެ ޗެމްޕިއަން ބަޔާން މިއުނިކް ބަލިކޮށްފި އެވެ.
މިއީ ބަޔާން އަތުން މިދިޔަ 18 އަހަރު ތެރޭ ބޯކުމް އަށް ލިބުނު ފުރަަތަަމަ މޮޅެވެ. ބޯކުމް އިން އެންމެ ފަހުން ބަޔާން ބަލިކުރީ 2004 ވަނަ އަހަރު އެވެ.
އެގާރަ އަހަރަށް ފަހު މި ފަހަރު ޖަރުމަނު ފުރަތަމަ ޑިވިޝަނުގައި ވާދަކުރަމުން އައި ބޯކުމް އިން މިރޭ ބަޔާން ބަލިކުރިއިރު، މި މެޗުގެ ކުރިން ލީގުގައި އެންމެ ފަހުން އެ ޓީމު ކުޅުނު ތިން މެޗުން ވަނީ ބަލިވެފަ އެވެ. ބޯކުމް އޮތީ 22 މެޗުން 28 ޕޮއިންޓާ އެކު 11 ވަނައިގަ އެވެ.
ލީގުގެ އެއް ވަނައިގައި ބަޔާން އޮތީ 22 މެޗުން 52 ޕޮއިންޓް ހޯދައިގެންނެވެ. ދެ ވަނައިގައި އޮތް ބޮރޫޝިއާ ޑޯޓްމަންޑަށް 21 މެޗުން ވަނީ 43 ޕޮއިންޓް ލިބިފަ އެވެ. މާދަމާ ޑޯޓްމަންޑުން ޔޫނިއަން ބާލިންއާ ދެކޮޅަށް މޮޅުވެ. ފަރަގު ކުޑަކުރެވޭނެ އެވެ.
ބޯކުމް ދަނޑުގައި މިރޭ ފުރަތަމަ ލަނޑު ޖެހީ އޭރިއާތެެރެއިން ލިބުނު ފުރުސަތެއްގައި ރޮބަޓް ލެވަންޑޯޯސްކީ އެވެ. މެޗުގެ ނުވަ ވަނަ މިނިޓްގައި ކިންގްސްލީ ކޯމަން ބޮލުން ޖައްސާލި ބޯޅައެއް ކޮންޓްރޯލް ކުރުމަށް ފަހު ލެވަންޑޯސްކީ ވަނީ ތިރިތިރިން ގޯލަށް ފޮނުވާލައިފަ އެވެ. އެކަމަކު، ފުރަތަމަ ހާފު ނިމުމުގެ ކުރިން ބޯކުމް އިން ވަނީ ހަތަރު ގޯލު ޖަހައިފަ އެވެ.
މެޗުގެ 14 ވަނަ މިނިޓްގައި ބޯކުމް އަށް އޭރިއާތެރެއިން ލިބުނު ފުރުސަތެއްގައި އެއްވަރުކޮށްދިނީ ކްރިސްޓޮފާ އަންޓްވީ އަޖޭއި އެވެ. މެޗުގެ 37 ވަނަ މިނިޓްގައި ބޯކުމް އިން ލީޑުނެގީ ޕެނަލްޓީ އަކުން ޔާގެން ލޮކާޑިއާ ޖެހި ގޯލުންނެވެ. އޭގެ ދެ މިނިޓް ފަހުން ބޯކުމް އިން ލީޑުފުޅާކުރީ އޭރިއާ އަރިމަތިން ކްރިސްޓިއަން ގަމްބޯއާ ޖެހި މޮޅު ގޯލުންނެވެ. އަދި ފުރަތަމަ ހާފު ނިމުމުގެ ކުރިން ބޯކުމްގެ ހަތަރު ވަނަ ގޯލު ޖެހީ 43 ވަނަ މިނިޓްގައި ގޯލުގެ ދުރު ކަނަށް ބޯޅަ ފޮނުވާލައިގެން ގެރިޓް ހޯލްޓްމަން އެވެ.
މިއީ 1975 ވަނަ އަހަރު އެއިންޓްރަކްޓް ފްރޭންކްފާޓުން 6-0 ބަޔާން ބަލިކުރި މެޗަށް ފަހު ޖަރުމަނު ލީގުގެ މެޗެއްގެ ފުރަތަމަ ހާފުގައި ބަޔާން ކޮޅަށް ހަތަރު ގޯލު ވަން ފުރަތަމަ ހާފެވެ.
ދެ ވަނަ ހާފުގައި ބަޔާނުން މެޗުގެ ތެރެއަށް ވަންނަން ކުރި މަސައްކަތުގައި ޖެހުނީ އެންމެ ގޯލެކެވެ. މެޗުގެ 75 ވަނަ މިނިޓްގައި ހިލޭ ޖެހުމަކުން ބަޔާންގެ ޔޯސުއާ ކިމިމް ހިލޭ ޖެހުމަކުން ނެގި ބޯޅައެއް ބޯކުމް ޑިފެންޑަރުންނަށް ސަލާމަތް ނުކުރެވި، ލެވަންޑޯސްކީ އަށް ލިބުމުން އޭނާ ވަނީ ގޯލުގެ ކަނަށް ބޯޅަ ފޮނުވާލައިފަ އެވެ. އޭގެ ފަހުން ގިނަ އެޓޭކްތަކެއް ކުރި ނަމަވެސް ބަޔާނަށް ގޯލެއް ޖެހޭ ގޮތެއްނުވި އެވެ.
