ކިޔެވް، ޔޫކްރެއިން (ފެބްރުއަރީ 12) - ގައުމީ ދިދަ ހިފައިގެން، ގައުމީ ސަލާން ކިޔަމުން ޔޫކްރެއިންގެ އެތައް ހާސް ރައްޔިތުން ރަޝިއާއާ ދެކޮޅަށް ބޮޑު ހިނގާލުމެއްގައި ބައިވެރިވެއްޖެ އެވެ.
"ކަންބޮޑުވުމުގެ ބޭނުމެއް ނެތް. އެންމެން އެއްބައިވެ، މިނިވަންކަމަށް ހަނގުރާމަ ކުރަން ޖެހޭ،" މުޒާހަރާގައި ބައިވެރިވި ދަރިވަރު މާރިއާ ޝެރްބެންކޯ އޭއެފްޕީއަށް ބުންޏެވެ.
ހުކުރު ދުވަހު ޔޫކްރެއިންގެ ރައީސް ވޮލޮޑިމިރް ޒެލެންސްކީ ވެސް ރައްޔިތުންނަށް ގޮވައިލެއްވީ ރަޝިއާއާ ދެކޮޅަށް އެއްބައިވެގެން ތިބުމަށެވެ.
ހިނގާލުމުގައި ބައިވެރިވި ބައެއް މީހުން ތިބީ "ހަނގުރާމައަކީ ހައްލެއް ނޫން" ލިޔެފައިވާ ބެނާތައް ހިފައިގެންނެވެ. އޭގެ އިތުރުން އަޅުވެތިކަމާ ދެކޮޅަށް ތިބުމަށް އަޑު އުފުލަމުން ދިޔަ އެވެ.
ޔޫކްރެއިންގެ ދާހިލީ ހަމަނުޖެހުމަށް އަށް އަހަރު ވެފައި ވާއިރު، އެ ގައުމުގެ އިރުމަތީ ހިސާބުތައް ކޮންޓްރޯލް ކުރަނީ ރަޝިއާގެ ތާއީދާއެކު އުޅޭ ގްރޫޕުތަކެވެ.
ދާހިލީ ހަމަނުޖެހުމުގައި 14،000 އަށް ވުރެ ގިނަ މީހުން ވަނީ މަރުވެފަ އެވެ. ހުޅަނގުގެ ގައުމުތަކުން ތުހުމަތު ކުރާ ގޮތުގައި ރަޝިއާއިން ތައްޔާރުވަމުން ދަނީ ޔޫކްރެއިންގެ ފަސްގަނޑަށް އަރައި، ސަރުކާރު ބަދަލު ކުރުމަށެވެ.
ޔޫކްރެއިންއާ ގުޅޭ ބޯޑަރު ކައިރިއަށް ރަޝިއާގެ 100،000 ސިފައިން ޖަމާވެފައިވި ނަމަވެސް، ޔޫކްރެއިނަށް އަރަން ނޫޅޭ ކަމަށް ރަޝިއާއިން ތަކުރާރުކޮށް ދަނީ ބުނަމުންނެވެ.
އެމެރިކާއިން އިންޒާރުދޭ ގޮތުގައި ރަޝިއާއިން އޮތީ ކޮންމެ ވަގުތަކު ވެސް ޔޫކްރެއިނަށް އަރަން ތައްޔާރަށެވެ. އެހެންވެ، ޔޫކްރެއިންގައި ތިބި އެމެރިކާ ރައްޔިތުން އެ ގައުމުން ފޭބުމަށް ވަނީ އިލްތިމާސްކޮށްފަ އެވެ.
ޔޫކްރެއިން ސަރުކާރުން ތައްޔާރުވެފައި ވަނީ ރަޝިއާއިން ހަމަލާދީފި ނަމަ ވެރިރަށް ކިޔެވްގެ ތިން މިލިއަން ރައްޔިތުން އެހެން ތަނަކަށް ބަދަލު ކުރުމަށެވެ. އެކަމަށް ހާއްސަ އިވެކުއޭޝަން ޕްލޭނެއް ވަނީ ހަދާފަ އެވެ.
