ވެރިކަން ހިންގާ މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަންގެ މަގާމަށް ފޮރިން މިނިސްޓަރު އަބްދުﷲ ޝާހިދު އާއި އިކޮނޮމިކް މިނިސްޓަރު ފައްޔާޒު އިސްމާއިލް އަދި އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވާދަ ކުރައްވަން ނިންމަވައިފި އެވެ.
ފެބްރުއަރީ 11، 2017 ގައި އެ މަގާމަށް އިންތިހާބުކުރި ހަސަން ލަތީފްގެ ދައުރު މިއަދު ހަމަވާނެ އެވެ. އޭނާއަކީ އެމްޑީޕީގެ ފަސްވަނަ ޗެއާޕާސަން އެވެ.
މިހާތަނަށް އެ މަގާމަށް ވާދަކުރުމުގެ ޝައުގުވެރިކަން އާންމުކޮށް ފާޅުކުރެއްވީ އެސްޓީއޯގެ އެމްޑީ ހުސައިން އަމްރު އެކަންޏެވެ. އޭނާ ވަނީ ޗެއާޕާސަން ކަމުގެ އިންތިހާބުގައި ވާދަކުރާނެކަން މިނޫހަށް ކަށަވަރު ކޮށްދީފަ އެވެ. އަމްރުއަކީ މިވަގުތު އެމްޑީޕީ ގައުމީ މަޖިލީހުގެ މަތި ދެކުނު ޕްރޮވިންސްގެ ރައީސް އެވެ.
އަމްރުގެ އިތުރުން ފޮރިން މިނިސްޓަރު ޝާހިދާއި އިކޮނޮމިކް މިނިސްޓަރު ފައްޔާޒް ވާދަ ކުރައްވާކަން "އަދަދު" އަށް ވަނީ ކަށަވަރުވެފަ އެވެ.
ޗެއާޕާސަންގެ މަގާމަށް ވާދަ ކުރައްވާކަން ޔަގީންކޮށްދެއްވުމަށްފަހު އަމްރު މި ނޫހާ ވާހަކަ ދައްކަވަމުން ވިދާޅުވީ މަގާމަށް ކުރިމަތިލެއްވީ ޕާޓީއަށް ގެންނަންޖެހޭ ބަދަލުތައް ވަރަށް ރަނގަޅަށް އެނގިވަޑައިގަންނަވާތީ ކަމަށެވެ.
"އެމްޑީޕީގެ ސިޔާސަތު ކޮމިޓީގެ ރައީސް އާއި ކެމްޕޭން ކޮމިޓީގެ މެމްބަރެއްގެ ހައިސިއްޔަތުން ގިނަ މަސައްކަތްތަކެއް އަޅުގަނޑަށް ވަނީ ކުރެވިފައި. ކުރިމަތި މިލަނީ ޕާޓީއަށް ގެންނަން ޖެހޭ ބަދަލުތައް ވަރަށް ރަނގަޅަށް އެނގޭތީ،" ޗެއާޕާސަން ކަމަށް ވާދަކުރައްވާނެކަން "އަދަދު" އަށް ކަށަވަރު ކޮށްދެއްވަމުން އަމްރު ވިދާޅުވި އެވެ.
މިރޭ 08:30 ގައި ބާއްވާ ގައުމީ މަޖިލީހުގެ ޖަލްސާގައި ޗެއާޕާސަންގެ އިންތިހާބު ބާއްވާނެ ތާރީހަކާ މެދު ގޮތެއް ނިންމާނެ އެވެ. ޗެއާޕާސަންއެއްގެ ދައުރަކީ ފަސް އަހަރު ދުވަހެވެ.
އެމްޑީޕީގެ އަސާސީ ގަވާއިދުގައިވާ ގޮތުން ޗެއާޕާސަން އަކީ ޕާޓީގެ އެތެރޭގެ ކަންކަން ރާވާ އިންތިޒާމުކޮށް ބަލަހައްޓާ އެންމެ އިސް ފަރާތެވެ. ޗެއާޕާސަންގެ މަސްއޫލިއްޔަތުތަކުގެ ތެރޭގައި ޕާޓީގެ ފަރާތުން ސަރުކާރާއި އެހެނިހެން ސިޔާސީ ފަރާތްތަކާއި މުއާމަލާތް ކުރުމާއި، އެތެރޭގެ އިންތިހާބުތައް ރާވާ އިންތިޒާމު ކުރުމާއި، ކޮންގުރެސް އާއި ގައުމީ މަޖިލީހާއި ގައުމީ ހިންގާ ކޮމިޓީގެ ރިޔާސަތު ބެލެހެއްޓުމާއި، ޕާޓީގެ އިދާރީ ކަންކަމުގެ މަސްއޫލިއްޔަތު އުފުލުން ހިމެނެ އެވެ.
