އިންތިޚާބެއް ބޯމަތިވެގެން އަންނަ ކޮންމެ ހިނދެއްގައިވެސް، އެކި ކުލަކުލައިގެ ޕޯޑިއަމްތައް ދޮށުގައި އަހަރެމެންގެ "ލީޑަރުން" ގޮވާ ގޮވެލި އަހަރެމެން އަޑުއަހަނީ، އޭގެ ތެރެއިން ގިނަ ވާހަކަތަކަކީ ހޮޅި ވާހަކަ ކަން ހަމަ ދެނެތިބެ އެވެ. މަޢުލޫމާތުގެ ރަން ޒަމާނަށް ފޫޅުކަނޑާފައި ތިބި ދިވެހިންގެ ވޯޓުލާ އާބާދީއަކީ ތަންދޮރު ނުދަންނަ ގަމާރުންނެއް ނޫނެވެ. ޙަޤީޤަތަކީ މިއީ ކަމުގައިވިޔަސް، ތިމާ ތާއީދުކުރާ ސިޔާސީ "ކުލަބު" ގެ މެމްބަރެއް ޕޯޑިއަމެއް ދޮށަށް ހުއްޓި ކޮސް ގޮވިޔަސް، އެ ގޮވެއްޔަށް ސާބަސްދީ އަތްޖަހަން އަހަރެމެން މި ތިބެނީ ކަހާތަން ހިރުވައިވެސް ނުލަ އެވެ. އެންމެ ސުވާލެކެވެ. ރޯމާ ދުވާލު ފެންނަ ޙަޤީޤަތްތައް ނުފެންނަ ކަމަށް ހަދައިގެން ތިބެން، ހަމަ އަހަރެމެން އަމިއްލަ ބާރުގައި އިޚުތިޔާރުކުރަނީ ހެއްޔެވެ؟
އެހެން ސުވާލެކެވެ. ސިޔާސީ ލީޑަރުން ދޮގު ވާހަކަ ދައްކަން ޖެހިލުން ނުވަނީ ކީއްވެގެން ހެއްޔެވެ؟ އަޑުގަދަ މީހާގެ ރުށް ގިނަވާ އުޞޫލަށް އަހަރެމެން ތަބާވާތީ އެވެ. އަޑުހަރުކޮށް، އިތުބާރާއެކު ދޮގު ވާހަކަ ދައްކަން މީހުން ޖެހިލުން ނުވާ ހިނދު، މީހަކު އެހާ ފާޅުގައި އެހާ އިތުބާރާއެކު ދޮގެއް ހަދާފާނޭ ކަމަށް ތިމާއަށްވެސް ޤަބޫލުކުރަން ދަތިވާތީ އެވެ. މޮޅެތި މަރުކާގެ ސޫޓްތަކާއި ހެދުންތަކުގެ ނިވަލުގައި ފަލީހަތްވެފައިވާ ދިރިއުޅުންތައް ފޮރުވައިގެން އުޅޭ ސިޔާސީ ލީޑަރުންނަށް ޢިއްޒަތްތެރިންގެ ލަޤަބު ދީގެން މި ގެންގުޅެނީ ޚުދު އަހަރެމެން؛ ވޯޓުލާ މީހުންނެވެ. މޮނިކާ ލުވިންސްކީ އާ ބޭއަދަބީ ގުޅުމެއް ބޭއްވީތީ ބިލް ކްލިންޓަންގެ ސިޔާސީ ކެރިއަރ ހަލާކުވެ، އޭނާގެ އަނބިކަނބަލުން ހިލަރީ ކްލިންޓަންގެ ސިޔާސީ ކެރިއަރަށް ހިޔަނި އެޅުނު އިރު، ދިވެހި ސިޔާސީ ލީޑަރުންގެ ޢަބުރު ނަގާލައި، ފަސްބައި ކިލަނބު ކޮށްލާ ކޮންމެ ބޭއަދަބީ ވާހަކައަކީ، އެމީހުންގެ ސިޔާސީ ޙަޔާތުގައި ޖަހާ އިތުރު މެޑައްޔަކަށް ހަދަނީ ޚުދު އަހަރެމެންނެވެ. އިތުބާރު ގެއްލިފައި ތިބޭ އެފަދަ އެތައް ބަޔަކަށް އަހަރެމެންގެ ދިރިއުޅުމުގެ މަގުޗާޓު ކުރަހާނޭ ފުރުޞަތު މި ދެނީ، އެމީހުންގެ އެފަދަ ޤާބިލިއްޔަތު ނެތްކަމާއި، އެމީހުންނަކީ އަމިއްލަ މަންފާ އިސްކުރާ ބައެއްކަން ހަމަ ދެނެތިބެގެންނެވެ. ސިޔާސީ ލީޑަރުން އަހަރަމެންގެ މި ބަލިފައި ދަނެ އެވެ. ދިވެހިން އަދިވެސް އަޑުއަހާނީ އަޑުގަދަ މީހާގެ ބަސްކަން ދަނެ އެވެ. އަހަރެމެންނަކީ ނުފޫޒުގެ ކުރިމަތީ ޙަޤީޤަތަށް ފުރުޞަތު ދޭ ބައެއް ނޫންކަން އެވެރިން ދަނެ އެވެ.
އެންމެން ދަންނަ ބޮޑު ސިއްރެކެވެ. ހަކުރު ދިނިއްޔާ ބޮޑުބޭބެ އެވެ. ފްލެޓް ދިނިއްޔާ އޭނާ ރަނގަޅެވެ. ގޯތި ދޭ ސަރުކާރަކަށް ވޯޓު ދޭނަމެވެ. ޚިޔާލާތާއި ފިކުރަކީ އަހަރެމެން އަގުކުރަން ދަންނަ ކަމެއް ނޫނެވެ. މި ކުޑަ ކުޑަ، ޅަ ދިވެހި ޑިމޮކްރަސީއަށް ސިޔާސީ ޕާޓީތައް ތަޢާރަފުވެގެންދިޔައިރު، ކޮންމެ ޕާޓީއެއްގެވެސް ބިންގާކަމުގައިވެފައި އޮތީ ވަކި ޚިޔާލާތުތަކަކާއި ފިކުރުތަކެކެވެ. އޭރު، އެއް ޕާޓީއަކުން އެ ނަގަހައްޓާ ފިކުރަށް، ވަކި މިވެނި ސިޔާސީ ލީޑަރެއް ދުވަހަކުވެސް ތާއީދު ނުކުރާނެކަން އަހަރެމެން ދެނެތިބީމެވެ. އެ ވާހަކަތައް ޔަޤީންކަމާއެކު ދައްކަމުން ދިޔައީމެވެ. އެހެންނަމަވެސް މިހާރު، ދިވެހި ސިޔާސީ ލީޑަރުންގެ ތެރެއިން ވަކި ފިކުރަކަށް އިޚުލާސްތެރި ލީޑަރެއް ފެނުމަކީ ނާދިރު ކަމެކެވެ. ފްލޯ ކްރޮސިން ޢާއްމުވެ، ތިމާ ޕާޓީއަކަށް ސޮއިކުރާ ސަބަބަކީ، އެ އިރެއްގައި ވައި ޖެހޭ ކޮޅަކަށް އެރުންކަމުގައިވަނީ ވެފަ އެވެ. އަރުޝީފުތައް ހުޅުވާލައި ޢާއްމުކޮށްލަން ޖެހިލުން ނުވާ މީހަކަށް، އިއްޔެ އެކަކު އަނެކަކަށް ބާޣީންގެ ލަޤަބު ދިން މީހުން، މިއަދު އެއްގަލަކަށް އަރާ ނުފޫޒުގެ ލަގަނުން އަތްދޫނުކޮށް ތިބޭތޯ މަސައްކަތްކުރަނީ އެއްބަފާ އަޚުން ފަދައިންނެވެ. "ވަޔަށް، ފަޒާއަށް ޖެހި ބަޑިއެއް" ނުވަތަ "ބޮލުގައި ޖެއްސި" ބަޑިއެއްވެސް މިއަދަކު ނެތެވެ. ދިވެހިންގެ ފަހުގެ ސިޔާސީ ތާރީޚު ކަރުދާހަށް ތިލަނުކުރެވިގެން އުޅެނިކޮށް އޮޅުން ބޮޅުންވެފައިވާއިރު، ޙަޤީޤަތް ވަނީ މި ޖީލުގެ "ސްކެޕްޓިކުންގެ" ބަނޑުގައި ފޮރުވިފައެވެ. ވަރިހަމަވުމުގެ ޘަޤާފަތުގެ ތެރޭ ވަޅުޖެހިފަ އެވެ.
އަދިވެސް ފުރާވަރަށް ނާޅަނީ އެވެ. އަހަންނެއް ނޫނެވެ. ދިވެހި ޑިމޮކްރަސީ އެވެ. މިނިވަން ޚިޔާލެވެ. ފަރުދީ އަދި ޖަމަޢީ މިނިވަންކަމެވެ. އަދިވެސް މި ބަހާތަކަށް އަހަރެމެން ފަރިތައެއް ނުވެ އެވެ. އަދިވެސް މި "ނަން" ތައް މާނަކުރެވެނީ ރަސްމަތިފުށު ރަދީފަކުންނެވެ. މިނިވަންކަން މިނަނީ ޚުދުމުޚުތާރު ނާޅިއަކުންނެވެ. ފަރުދުން ބޭނުންވަނީ ތަބާ ވާނޭ ވެރިއެކެވެ. ޚިދުމަތްތެރިއެއް ނޫނެވެ. އޭނާއަކީ ރައްޔިތުން ހަވާލުކުރާ ވަޒީފާއެއް އަދާކުރާ މީހެއްގެ ގޮތުގައި ބަލައިގަނެ، އޭނާއަކީވެސް ހަމަ ތިމާ ފަދަ މީހެއްކަމަށް ދެކެން، އަހަރެމެންނަށް އަދިވެސް ދަތިވަނީ އެވެ. ވާނީވެސް އެހެންތާ އެވެ. ޖެހިލުންވުމުގެ ފަރުދާ ކަޝްފުކޮށް ނިކުންނަ ބަޠަލުންގެ ވަސްވެސް ދުނިޔެއިން ފުހެލާތަން އަދިވެސް އެބަ ފެނޭ ވިއްޔާ އެވެ.
ވެދާނެ އެވެ. މިއީ ހަމައެކަނި އަހަރެން ދެކޭގޮތް ކަމުގައިވެދާނެ އެވެ. އަހަރެންނަށް ސިޔާސީ މައިދާން އެންމެ ހެޔޮގޮތުގައި ފަހުމު ނުވަނީކަމަށްވެސް ވެދާނެ އެވެ. ފައިސާ އާއި ނުފޫޒުގެ އަގީދާ އަހަރެންނާ އެހާ ދޯޅު ނޫނީކަމަށްވެސް ވެދާނެ އެވެ. އެހެންނަމަވެސް އަހަރެން ލޯބިވާ މި ދިވެހިރާއްޖޭގައި މި މޭރުމުން ވިސްނާ ދެވަނަ މީހަކު ނުވާނެކަމަށް އަހަރެން ޤަބޫލުކުރާ ހިތެއް ނެތެވެ. ޤަބޫލުކުރާ ހިތް އޮތީ، މި ރާސްތާ ބަދަލުކުރެވިދާނެކަމަށެވެ. މިއަށްވުރެ، އަހަންނަށްވެސް އިތުބާރުކުރަން ފަސޭހަ ނިޒާމެއް ތަޖުރިބާކޮށްލުމުގެ ނަޞީބު އަދި ދިރިހުއްޓާ ލިބޭނޭކަމަށެވެ.
