"އިންޑިއާ އައުޓް" ކެމްޕޭންގެ ސަބަބުން ނަފުރަތު އުފެދިގެން ބައެއް ކަހަލަ ކަންތައްތައް ހިނގާފައި އެބަހުރި ކަމަށާއި އިންޑިއާގެ ޑިޕްލޮމެޓުންނަށް ގޯނާ ކުރިކަން ފުލުހުންގެ ސަމާލުކަމަށް އައިސްފައި އެބަހުރި ކަމަށް ކޮމިޝަނަރު އޮފް ޕޮލިސް މުހައްމަދު ހަމީދު މިއަދު ވިދާޅުވެއްޖެ އެވެ.
އިދިކޮޅު ކޯލިޝަނުން "އިންޑިއާ އައުޓް" ގެ ނަމުގައި ކުރިއަށް ގެންދާ ހަރަކާތުގެ މައްސަލަ ދިރާސާކުރަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) އިން މިއަދު ބޭއްވި ބައްދަލުވުމުގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން ހަމީދު ވިދާޅުވީ އިންޑިއާގެ ޑިފެންސް އެޓޭޗް އަށް އެކި ގޯނާ ކުރިމަތިވި ކަމަށެވެ. އެއީ ކަންބޮޑުވުން އޮތް ކަމެއް ކަމަށް ވެސް އޭނާ ވިދާޅުވި އެެވެ.
"އަޅުގަނޑުމެންގެ ސަމާލުކަމަށް އައިސްފައި އެބަހުރި އިންޑިއާގެ ޑިޕްލޮމެޓިކް އޮފިޝަލުންނަށް ދީފައި ހުރި އެކިއެކި ކަހަލަ ގޯނާތައް. ޑިފެންސް އެޓޭޗް ދުއްވާ ބައިސްކަލުގެ ފުރޮޅު ފަޅާލާފައި ހުރެދާނެ. ޑިފެންސް އެޓޭޗްގެ ގޭގެ ފާރުގައި ހަރުކޮށްފައި ހުންނަ އެއްޗެއް ފޮޓޯ ނަގާފައި ސޯޝަލް މީޑިއާއަށް ލާފައި ހުރެދާނެ. މިއީ ހަގީގަތުގައި އެ ކަންބޮޑުވުން އަޅުގަނޑުމެންގެ ވެސް އޮތް ކަންތައްތައް،" ހަމީދު ވިދާޅުވި އެވެ.
އޭނާ ވިދާޅުވީ އެކަންކަމާ ގުޅިގެން، ރައްކާތެރިކަން އިތުރަށް ކަށަވަރުކުރުމަށް ޓަކައި ފުލުހުން އަޅަން ޖެހޭ ފިޔަވަޅުތައް އަޅަމުން ގެންދާ ކަމަށެވެ.
އޭނާ މިމޭރުމުން ވާހަކަ ދެއްކެވީ ރާއްޖޭގައި އުޅޭ އިންޑިއާ މީހަކަށް ގޯނާއެއް ކޮށްގެން ފުލުހުން އެކަން ތަހުގީގުކުރަމުންދޭތޯ މަޑުއްވަރީ ދާއިރާގެ މެމްބަރު އާދަމް ޝަރީފު ސުވާލު ކުރެއްވުމުންނެވެ. އެ ސުވާލަށް ޖަވާބު ދެއްވަމުން ހަމީދު ވިދާޅުވީ އިންޑިއާގެ ރައްޔިތުންނަށް ގޯނާކުރި އެހެން ދެ މައްސަލައެއް ވެސް ސަމާލުކަމަށް އައިސްފައިވާ ކަމަށެވެ. އެއީ އޭނާ ވިދާޅުވި ގޮތުގައި ށ. ފުނަދޫ އާއި އައްޑޫ ސިޓީގައި ހިނގި ކަންތައްތަކެކެވެ.
ފުލުހުންނަކީ ހަމަ އެކަނި ކަމެއް ހިނގުމުން ތަހުގީގުކުރާ ބައެއް ނޫން ކަމަށާއި ކުށެއް ކޮށްފާނެ ކަމުގެ ބިރުވެރިކަން އުފެދިއްޖެ ނަމަ އެކަމެއް ވެސް ބަލާނެ ކަމަށް ހަމީދު ވިދާޅުވި އެވެ. ރާއްޖޭގައި އޮތް އެފަދަ އެންމެ ބޮޑު މައްސަލައަކީ އޭނާ ވިދާޅުވި ގޮތުގައި ނަފްރަތު އުފެއްދުމެވެ.
"ނަފުރަތުގެ ކަންކަން ފަތުރަމުން އައިސް އަޅުގަނޑުމެނަށް އެބަހުރި އޭގެ ނަތީޖާ ވަރަށް ހިތިކޮށް ފެނިފައި. އެ ހެޔޮ އައިޑިއޮލޮޖީއާ ގުޅުވައިގެން ކަމަށް ވިޔަސް. އެކި ވިސްނުމެއް ކުރިއަށް ނެރުން ކަމަށް ވިޔަސް އޭގެ ސަބަބުން އަޅުގަނޑުމެންނަށް ކޮޮންޓްރޯލް ނުކުރެވޭ ވަރަށް މިކަންކަން ފުޅާވެ، މުޖުތަމައުގެ ތެރެއަށް ފެތުރިގެން ދިޔައިމާ އޭގެ ނުރައްކާ އެއީ ވަރަށް ބޮޑުތަނުން ބޮޑުވެގެން އައުން އެކަށީގެންވާ ކަންތައްތައް،" ސީޕީ ވިދާޅުވި އެވެ.
"އިންޑިއާ އައުޓް" ކެމްޕޭނާ މެދު ކަންބޮޑުވުން ފާޅުކުރައްވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ހުށަހެޅުއްވި މައްސަލަ ފުޅާ ދާއިރާއެއްގައި ބަލަން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ) ގެ މެމްބަރުން އިއްޔެ މަޝްވަރާ ކުރެއްވި އެވެ.
އިއްޔެ ބޭއްވި 241 ކޮމިޓީގެ ބައްދަލުވުމުގައި ބައިވެރިވެވަޑައިގެން ނަޝީދު ވިދާޅުވީ އެމަނިކުފާނު އެ މައްސަލަ ހުށަހެޅުއްވީ އެ ކެމްޕޭނުގެ ސަބަބުން ރާއްޖެއަށް ލިބިދާނެ ގެއްލުންތަކެއް އޮވެދާނެތީ އެއީ ކޮންކަހަލަ ގެއްލުންތަކެއްތޯ ބައްލަވަން އެދިވަޑައިގަންނަވާތީ ކަމަށެވެ. އެމަނިކުފާނު ވިދާޅުވި ގޮތުގައި އެއީ ބޭނުންތެރި ކަމެކެވެ.
އިންޑިއާ އައުޓް ކެމްޕެއިނުގެ ބެކްގްރައުންޑް
އިންޑިއާ އައުޓް ކެމްޕެއިން އިދިކޮޅު ކޯލިޝަނުން ކުރަން ފެށީ އުތުރުތިލަފަޅު އެއްބަސްވުމާއި މުޅި ރާއްޖޭގެ ހައިޑްރޯގްރަފީ ސާވޭއެއް ހެދުމަށް އިންޑިއާ ސަރުކާރާއެކު ދިވެހި ސަރުކާރުން ސޮއި ކުރި އެގްރިމެންޓުގެ ތަފްސީލު ހާމަ ކުރުމަށް ސަރުކާރުން ދެކޮޅު ހެދުމުންނެވެ.
އެގްރިމެންޓުތައް ހާމަ ކުރަން ދެކޮޅު ހެދުމުން އިދިކޮޅަށް ނިސްބަތްވާ މެމްބަރުން ވަނީ އެކި މަސައްކަތް ކުރައްވައިގެން އެންމެފަހުން މަޖިލީހުގެ ކޮމެޓީއެއްގައި އެގްރިމެންޓް ބައްލަވައިފަ އެވެ. އިންޑިއާގެ ސިފައިން ރާއްޖޭގައި ބޭތިއްބުވާ ދެކޮޅު ކަމަށް ބުނެ ޕެޓިޝަނެއްގައި ސޮއި ކުރަން ފެށީ އެ ހިސާބުންނެވެ.
ދިވެހިންގެ މިނިވަންކަން ގެއްލެމުންދާ ކަމަށް ބުނެ އެންމެ ފުރަތަމަ ޕީޕީއެމުން ޖުލައި 30، 2021 ގައި ކެމްޕެއިނެއް ފެށީ "މިނިވަންކަމުގެ ދިފާއުގައި ދިވެހިން" ގެ ނަމުގަ އެވެ. ކެމްޕެއިނުގެ ނަން "އިންޑިއާ އައުޓް" އަށް ބަދަލުވީ އޭގެ ފަހުންނެވެ.
ޕީޕީއެމްގެ ލީޑަރު އަދި ކުރީގެ ރައީސް އަބްދުﷲ ޔާމީންގެ މައްޗަށް އިއްވާފައި އޮތް މަނީ ލޯންޑަރިންގެ ހުކުމް ނޮވެމްބަރު 30، 2021 ގައި ބާތިލް ކުރުމާއެކު އެންމެ ފުރަތަމަ ބޭއްވި ރަސްމީ ޖަލްސާގައި އެމަނިކުފާނު ވަނީ "އިންޑިއާ އައުޓް" ގެ ޒިންމާ ނަންގަވައިފަ އެވެ.
