އެތެރެކުރުން މަނާ ދޫނިތަކެއް މަރާލި މައްސަލައިގައި ކަން ހިނގާފައިވާ ގޮތުގެ ރިޕޯޓެއް ހަދާ ހުށަހެޅުމަށް ފިޝަރީޒް މިނިސްޓްރީއަށް ރައީސް އިބްރާހިމް މުހައްމަދު ސޯލިހް އަންގަވައިފި އެވެ.
ގަވާއިދާ ހިލާފަށް ރާއްޖެ އެތެރެކުރި ކަމަށް ބުނެ 120 ދޫނި، އެޓާނީ ޖެނެރަލްގެ ލަފާގެ މަތިން މަރާލާފައިވާއިރު ގިނަ ބަޔަކު ދަނީ އެކަމާ ގުޅިގެން ކަންބޮޑުވުން ފާޅު ކުރަމުންނެވެ. އޭގެ ތެރޭގައި ތިމާވެށީގެ ހިމާޔަތުގައި މަސައްކަތް ކުރާ މީހުންގެ އިތުރުން ގިނަ އަދަދެއްގެ އާއްމުން ވެސް ހިމެނެ އެވެ.
ރައީސް އޮފީހުން ބުނީ ގަވައިދާ ހިލާފަށް އެތެރެކުރި ދޫނިތަކެއް މަރާލުމުގެ މައްސަލާގައި ކަން ހިނގާފައިވާ ގޮތުގެ ތަފްސީލު ރިޕޯޓެއް ހުށަހެޅުމަށް މިނިސްޓްރީއަށް ރައީސް އަންގަވާފައިވާ ކަމަށެވެ.
ފިޝަރީޒް މިނިސްޓްރީގެ "ރާއްޖެއަށް ދޫނި އެތެރެކުރުމާ ބެހޭ ގަވާއިދު" ބުނާ ގޮތުން އެ ގަވާއިދާ ހިލާފަށް އެތެރެކުރާ ދޫނިތައް ކޮންފިސްކޭޓްކޮށް ނައްތާލުމުގެ ބާރު ފިޝަރީޒް މިނިސްޓްރީ ދަށުން އޮންނަ ޕްލާންޓު އެންޑް ކަރަންޓީން ސާވިސަސްއަށް ލިބެ އެވެ.
އެ މައްސަލާގައި މިނިސްޓްރީން ބުނެފައި ވަނީ ދޫނިތައް އެކްސްޕޯޓު ކުރި ފަރާތަށް އަނބުރާ އައި ގައުމަށް ފޮނުވާލަން (ރީއެކްސްޕޯޓު ކުރަން) ފުރުސަތު ދިން ކަމަށެވެ. އަދި ދޫނިތައް އެތެރެކުރި ފަރާތަށް ތަކުރާރުކޮށް ރީ-އެކްސްޕޯޓު ކުރަން ފުރުސަތު ދިނުމުން ވެސް އެ ފުރުސަތުގެ ބޭނުން ނުހިފި ކަމަށް މިނިސްޓްރީން ބުންޏެވެ.
ސޯޝަލް މީޑިއާގައި ދައުރުވަމުންދާ މި ދޫނިތަކުގެ ފޮޓޯތަކާއި ވީޑިއޯތަކުން ފެންނަ ގޮތުގައި މަރުވެފައިވާ ދޫނިތައް ހުރީ ބިންމަތީގައި އަތުރާލާފަ އެވެ. އޭގެ ތެރެއިން ބައެއް ދޫނިތައް ހުރީ ކޮތަޅުތަކަށްލާ ބަންދުކޮށްފަ އެވެ.
މި ދޫނިތައް މަރާލި މައްސަލައިގައި ކަންބޮޑުވުން ފާޅުކުރި ގިނަ މީހުން ވަނީ މިކަމުގައި ފިޝަރީޒް މިނިސްޓްރީން އަމަލުކުރީ އަނިޔާވެރިކޮށް ކަމަށެވެ. އަދި މި ނޫން ގޮތަކަށް މިކަން ކުރެވޭނެ ކަމަށާއި ގަވާއިދާ ހިލާފުވެގެން ވެސް މި ނޫން ގޮތެއް އޮންނަން ޖެހޭ ކަމަށް ބުނެ މީހުން ދަނީ މިނިސްޓްރީއަށް ފާޑުކިޔަމުންނެވެ.
