ނިއު ޔޯކް، އެމެރިކާ (ފެބްރުއަރީ 9) - އިލެކްޓްރިކް ކާރުގެ ވާހަކަ ދައްކަވާ އިރު، ޓެސްލާގެ ނަން ފާހަގަނުކުރާތީ ކުންފުނީގެ ވެރިޔާ އަދި ބިލިއަނަރު އެލޮން މަސްކު ޝަކުވާ ކުރުމުން، އެމެރިކާގެ ރައީސް ޖޯ ބައިޑެން އެންމެ ފަހުން ޓެސްލާގެ ނަން ވިދާޅުވެއްޖެ އެވެ.
މިދިޔަ އަހަރު ވެރިކަމަށް ވަޑައިގެންނެވި ފަހު ބައިޑެން އެންމެ ފަހަރަކު ވެސް ޓެސްލާގެ ނަން ވިދާޅުނުވާ ކަމަށް މަސްކު ބުނެ އެވެ.
ކާރު އުފައްދާ ކުންފުނިތަކުގެ މުވައްޒަފުންގެ ގޮތުގައި މަސައްކަތްތެރިން ޔޫނިއަންގައި ހިމެނޭ މީހުން ނެގުމަށް ތާއީދު ކުރާ ކަމަށް ވައިޓް ހައުސް އިން ދާދި ފަހުން ބުންޏެވެ. ނަމަވެސް އެ ވާހަކައިގެ ތެރެއިން ވެސް ޓެސްލާގެ ނަން ވަކިން ފާހަގަނުކުރުމުން މަސްކް ހުރީ ހިތްހަމަނުޖެހިފަ އެވެ.
"ނޭނގޭ ބައެއް ސަބަބުތަކާ ހެދި، އެމެރިކާގެ ރައީސަށް ޓެސްލާގެ ނަން ވިދާޅެއް ނުވެވޭ،" ބައިޑެންގެ ރަސްމީ ޓްވިޓާ އެކައުންޓް ޓެގް ކުރުމަށް ފަހު މަސްކް ޓްވީޓް ކުރި އެވެ.
އޭގެ ފަހުން ޓެނެސީގައި އިލްޓްރިކް އުޅަނދު ޗާޖު ކުރާނެ ފެކްޓްރީއެއް އުފައްދަން ނިންމިކަން އިއުލާނު ކުރައްވަމުން ބައިޑެން ވަނީ ޓެސްލާގެ ވާހަކަ ދައްކަވާފަ އެވެ.
އެމެރިކާގެ ފެކްޓްރީތަކުގައި އިންވެސްޓް ކުރަމުން އަންނަ ކުންފުނިތަކާއި އެ ކުންފުނިތަކުގެ އިލެކްޓްރިކް އުޅަނދުތައް ފާހަގަކުރަމުން ބައިޑެން އެންމެ ފުރަތަމަ ވިދާޅުވީ ޒަމާންވީ ކުންފުނިތައް ކަމަށްވާ ޖީއެމް އަދި ފޯޑްގެ ވާހަކަ އެވެ. ނަމަވެސް އޭގެ ފަހުން ޓެސްލާގެ ވާހަކަ ފާހަގަކުރައްވާ، ބައިޑެން ވިދާޅުވީ އެއީ "ގައުމުގެ އެންމެ ބޮޑު އިލެކްޓްރިކް ކާރު އުފައްދާ ކުންފުނި" ކަމަށެވެ.
