ލަންޑަން، އިނގިރޭސިވިލާތް (ފެބްރުއަރީ 7) - ރަޝިއާގެ ހަމަލާއަކާ ދެކޮޅަށް ނޭޓޯގެ ފައުޖުތައް ތައްޔާރުވުމަށް އިނގިރޭސިވިލާތުގެ އިތުރު 350 ސިފައިން ޕޮލޭންޑަށް ފޮނުވަން ނިންމައިފި އެވެ.
ޑިފެންސް ސެކެޓްރީ ބެން ވޮލެސް ވިދާޅުވީ މިހާރު ވެސް ޕޮލޭންޑްގެ ބޯޑަރު ކައިރީގައި 100 އިނގިރޭސި ސިފައިން އެބަ ތިބި ކަމަށާއި އިތުރު ސިފައިންނާ އެކު ދިފާއު ވަރުގަދަ ވާނެ ކަމަށެވެ.
އެކަން އިއުލާނު ކުރީ ވޮލެސް އާއި ޕޮލޭންޑްގެ ޑިފެންސް މިނިސްޓަރު މާރިއަސްޒް ބްލެސްޒެކްއާ ދެމެދު ކުރެއްވި މަޝްވަރާތަކަށް ފަހު އެވެ.
އިރުމަތީ ޔޫރަޕްގައި ރަޝިއާއިން ޔޫކްރެއިން ހިފަން އުޅޭ ކަމަށް ހުޅަނގުގެ ގައުމުތަކުން ދަނީ ތުހުމަތު ކުރަމުންނެވެ. އެއާއެކު ޕޮލޭންޑަށް ގިނަ އަދަދެއްގެ ޔޫކްރެއިން ރެފިއުޖީން އެތެރެވާން މަސައްކަތް ކުރާނެ ކަމަށް ލަފާކޮށްފައިވެ އެވެ.
އެމެރިކާއިން ބުނާ ގޮތުގައި ރަޝިއާގެ 110،000 ސިފައިން ތިބީ ޔޫކްރެއިން ބޯޑަރު ކައިރީގަ އެވެ. ނަމަވެސް ޔޫކްރެއިން ހިފަން ރައީސް ލެޑިމިއަ ޕުޓިން ނިންމެވިކަން ޔަގީން ނުވާ ކަމަށް އޮފިޝަލުން ބުނެ އެވެ.
ރަޝިއާއިން ޔޫކްރެއިން ހިފައިފި ނަމަ ފަސް މިލިއަން މީހުން ރެފިއުޖީންނަށް ބަދަލުވާނެ ކަމަށާއި އޭގެ ތެރެއިން ގިނަ މީހުން ދާނީ ޕޮލޭންޑަށް ކަމަށް އެމެރިކާއިން ލަފާކުރެ އެވެ.
އިނގިރޭސިވިލާތުން ޕޮލޭންޑަށް އިތުރު ސިފައިން ފޮނުވާފައިވާ އިރު، އެމެރިކާއިން ވެސް ނިންމީ އިރުމަތީ ޔޫރަޕަށް އިތުރު 3،000 ސިފައިން ފޮނުވާށެވެ. އެގޮތުން އެންމެ ފުރަތަމަ ބެޗު މިދިޔަ ހޮނިހިރު ދުވަހު ވަނީ ޕޮލޭންޑަށް ގޮސްފަ އެވެ.
