ރާމަﷲ، ފަލަސްތީން (ފެބްރުއަރީ 7) - ފަލަސްތީނަށް އިސްލާހީ ބަދަލުތައް ގެންނަވާނެ ކަމަށް ރައީސް މަހްމޫދު އައްބާސް ވައުދުވެވަޑައިގެންފި އެވެ.
އައްބާސް އެހެން ވިދާޅުވީ ޕަލެސްތީން ލިބެރޭޝަން އޯގަނައިޒޭޝަން (ޕީއެލްއޯ) ގެ އާ ވެރިން އައްޔަނު ކުރަން ބޭއްވި ހާއްސަ ބައްދަލުވުމަކަށް ފަހު އެވެ.
ނަވާރަ ސަތޭކަ ފަސްދޮޅަސް ހަތަރު ވަނަ އަހަރު އުފެދުނު ޕީއެލްއޯގެ މަގްސަދަކީ އިޒްރޭލާ ދެކޮޅަށް ތެދުވެ ފަލަސްތީނުގެ ދައުލަތެއް ގާއިމް ކުރުމެވެ.
ނަމަވެސް ފަހަކަށް އައިސް ޕީއެލްއޯގެ ލީޑާޝިޕް މަގާމުތަކަށް މީހުން ހޮވުމަށް ގަވާއިދުން އިންތިހާބު ނުބާއްވާތީ، ފަލަސްތީނު ރައްޔިތުންގެ ފާޑުކިޔުން ވަނީ އަމާޒުވެފަ އެވެ.
"އިސްލާހީ ބަދަލަށް އަޅުގަނޑުމެން ބޮޑު ސަމާލުކަމެއް ދެން. އެއީ އަބަދުވެސް ކުރިއަށްދާ މަރުހަލާއެއް. އެކަން ކާމިޔާބު ކުރަން އަޅަން ޖެހޭ ކޮންމެ ފިޔަވަޅެއް އަޅަން ވެސް މި ތިބީ ތައްޔާރަށް،" އައްބާސް ވިދާޅުވި އެވެ.
ޕީއެލްއޯގެ 124 މެމްބަރުން ހިމެނޭ ސެންޓްރަލް ކޮމިޓީން އާދީއްތަ ދުވަހު ބޭއްވި ބައްދަލުވުމަކީ ހަތަރު އަހަރުގެ ތެރޭގައި ބޭއްވި ފުރަތަމަ ބައްދަލުވުމެވެ.
ޕީއެލްއޯ އާއި އައްބާސްއާ މެދު ހިތްހަމަނުޖެހޭކަން އެންގުމުގެ ގޮތުން ވައަތު ފިޔައިގެ ފެކްޝަންތަކުން ވަނީ ބައްދަލުވުން ބޮއިކޮޓްކޮށްފަ އެވެ. އެ މީހުން ގޮވާލަނީ އައްބާސްގެ އިސްތިއުފާއަށެވެ.
އައްބާސްގެ އިސްތިއުފާއަށް ގޮވާލައި ހުޅަނގު އައްސޭރި އާއި ޕީއެލްއޯއާ ވާދަވެރި ހަމާސްއިން ވެރިކަން ކުރާ ގާޒާގައި ފަލަސްތީނު ރައްޔިތުން ވަނީ މުޒާހަރާކޮށްފަ އެވެ.
ފަލަސްތީނުގެ އެކި ފެކްޝަންތައް ހިމެނޭ ޕީއެލްއޯއަކީ އިޒްރޭލުން ވެރިވެގަނެގެން އުޅޭ ހުޅަނގު އައްސޭރީގެ ބައެއް ހިސާބުތަކުގެ ކޮންމެވެސް ވަރެއްގެ ކޮންޓްރޯލް އޮންނަ ބަޔެކެވެ.
ފަލަސްތީނު ރައްޔިތުން އިންތިހާބެއްގައި ވޯޓު ނުލާތާ 16 އަހަރުވެފައިވާ އިރު، އައްބާސް އުޅުއްވަނީ ބާރުތައް ޖަމާކުރައްވައިގެން، ހުދުމުހުތާރު ވެރިކަމެއް ހިންގަން ކަމަށް ރައްޔިތުން ބުނެ އެވެ.
