އަޑިސް އަބާބާ، އިތިއޯޕިއާ (ފެބްރުއަރީ 7) - އެފްރިކާގެ ބައެއް ގައުމުތަކުގައި ހިނގަމުންދާ ބަގާވާތްތައް ކުށްވެރިކޮށް އިޒްރޭލަށް "އޮބްޒާވާ ސްޓެޓަސް" ދިނުމާ މެދު ގޮތް ނިންމުން އެފްރިކަން ޔޫނިއަންއިން ފަސްކޮށްފި އެވެ.
އަޑިސް އަބާބާގައި ފެށި އެފްރިކަން ޔޫނިއަންގެ ސަމިޓުގައި މެމްބަރު 55 ގައުމުން ބައިވެރިވި އެވެ. ދެ ދުވަހުގެ ސަމިޓް ނިންމާލަމުން، ޔޫނިއަންއިން ވަނީ އެފްރިކާގެ ގައުމުތަކުގައި ހިންގަމުންދާ ބަގާވާތްތައް ކުށްވެރިކޮށްފަ އެވެ.
ސަމިޓް ފަށަން ގާތްވެފައި ވަނިކޮށް ބުރްކީނާ ފާސޯގައި ބަގާވާތްކޮށް ރައީސް ރޯޗް މާކް ކްރިސްޓިއަން ކަބޯރޭ މަގާމުން ދުރު ކުރުމުން އެ ގައުމު ވަނީ ޖަމިއްޔާއިން ސަސްޕެންޑުކޮށްފަ އެވެ. އޭގެ ކުރިން ގިނީ، މާލީ އަދި ސޫދާން ވެސް ސަސްޕެންޑް ކުރީ ބަގާވާތްތަކާ ހެދި އެވެ.
އޭގެ އިތުރުން އިޒްރޭލް ބަލައިގަނެ، ޖަމިއްޔާގެ އޮބްޒާވާ މެމްބަރެއްގެ ގޮތުގައި ހިމެނުމަށް މިދިޔަ ޖުލައި މަހު އެފްރިކަން ޔޫނިއަން ކޮމިޝަންގެ ރައީސް މޫސާ ފާކީ މަހަމަތް ނިންމެވުމުން އެކަމާ ދެކޮޅަށް ފަލަސްތީނުން ހުށަހެޅި މައްސަލަ ވެސް ސަމިޓުގައި ކުރިއަށް ދިޔަ އެވެ.
ސަމިޓުގެ ތެރެއިން ނިންމީ އިޒްރޭލާ ގުޅޭ ވޯޓު ފަސްކޮށް، އެ މައްސަލަ ދިރާސާ ކުރުމަށެވެ. މިދިޔަ އަހަރު އިޒްރޭލަށް އޮބްޒާވާ ސްޓެޓަސް ދިނުމާ ދެކޮޅަށް ތެދުވި ގައުމުތަކުގެ ތެރޭގައި ދެކުނު އެފްރިކާ އަދި އަލްޖީރިއާ ހިމެނެ އެވެ.
އެ މައްސަލަ ދިރާސާ ކުރަން ހަ ގައުމެއް ހިމެނޭ ކޮމިޓީއެއް ވަނީ ހަދާފަ އެވެ. ދެކުނު އެފްރިކާ އާއި އަލްޖީރިއާގެ އިތުރުން ކޮމިޓީގައި ދެން ހިމެނެނީ ރްވާންޑާ، ޑިމޮކްރެޓިކް ރިޕަބްލިކް އޮފް ކޮންގޯ އެވެ. އެ ދެ ގައުމުން އިޒްރޭލަށް ތާއީދުކުރެ އެވެ. ދެން ހިމެނެނީ ކެމެރޫން އާއި ނައިޖީރިއާ އެވެ.
އިޒްރޭލުގެ ފޮރިން މިނިސްޓްރީން ބުނީ އިޒްރޭލް ބަލައިނުގަންނަން ބާރު އަޅަން އަލްޖީރިއާ އާއި ދެކުނު އެފްރިކާއިން ކުރަމުން ދިޔަ މަސައްކަތަށް އެފްރިކަން ޔޫނިއަންއިން ހުރަސް އަޅާފައިވާ ކަމަށެވެ.
އިޒްރޭލުގެ މައްސަލަ ދިރާސާ ކުރާ ކޮމިޓީގެ ހޯދުންތަކާ އެކު ރިޕޯޓު ހުށަހަޅަން ޖެހެނީ 2023 ވަނަ އަހަރު އޮންނަ އެފްރިކަން ޔޫނިއަން ސަމިޓަށް ކަމަށް ވެސް އިޒްރޭލުން ނެރުނު ބަޔާނެއްގައި ބުންޏެވެ.
