ވޮޝިންޓަން، އެމެރިކާ (ފެބްރުއަރީ 6) - ޔޫކްރެއިން ހިފަން ރަޝިއާއިން ވަމުންދާ ތައްޔާރީތައް ވަރުގަދަކޮށްފައިވާ ކަމަށް ޖާސޫސީ މައުލޫމާތަށް ބިނާކޮށް އެމެރިކާގެ އޮފިޝަލުން ތުހުމަތުކޮށްފި އެވެ.
ރަޝިއާ އާއި ޔޫކްރެއިން ގުޅޭ ބޯޑަރު ކައިރީގައި ރަޝިއާގެ 100،000 ސިފައިން ތިބޭތާ މިހާރު ގިނަ ދުވަސްތަކެއް ވެއްޖެ އެވެ. ނަމަވެސް ޔޫކްރެއިން ހިފަން ނޫޅޭ ކަމަށް ރަޝިއާއިން ބުނެ އެވެ.
ރަޝިއާގެ ތައްޔާރީތައް ވަރުގަދަ ކުރި ނަމަވެސް، ޔޫކްރެއިނަށް އަރަން ރައީސް ލެޑިމިއަ ޕުޓިން ނިންމެވިކަން ސާފު ނުވާ ކަމަށް އެމެރިކާގެ އޮފިޝަލުން ބުނެ އެވެ.
އެމެރިކާއިން ތުހުމަތު ކުރާ ގޮތުގައި ރަޝިއާ ސިފައިން ޔޫކްރެއިނަށް އަރައިފި ނަމަ، 48 ގަޑިއިރުގެ ތެރޭގައި ވެރިރަށް ކިޔެވް ހިފައި، ރައީސް ވޮލޮޑިމިރް ޒެލެންސްކީ މަގާމުން ދުރުކުރާނެ އެވެ.
އެފަދަ ހަމަލާއެއްގައި 25،000 އާއި 50،000 އާ ދެމެދުގެ އަދަދަކަށް އާއްމުންނާއި، 5000 އާއި 25،000 އާ ދެމެދުގެ ޔޫކްރެއިން ސިފައިންނާއި، 3000 އާއި 10،000 އާ ދެމެދުގެ ރަޝިއާ ސިފައިން މަރުވާނެ ކަމަށް އެމެރިކާއިން ލަފާކުރެ އެވެ.
އޭގެ އިތުރުން ރެފިއުޖީންގެ ކާރިސާއެއް އުފެދި، ފަސް މިލިއަން މީހުން ޔޫކްރެއިން ދޫކޮށް ޕޮލޭންޑަށް ހިޖުރަ ކުރުމުގެ ބިރު ވެސް އެބަ އޮތް ކަމަށް އެމެރިކާއިން ބުނެ އެވެ.
އެމެރިކާގެ ރައީސް ޖޯ ބައިޑެން ވަނީ އެމެރިކާ ސިފައިން ޕޮލޭންޑަށް ފޮނުވަން ނިންމަވާފަ އެވެ. ސިފައިންގެ 3000 މީހުން ފޮނުވަން ނިންމިއިރު، ފުރަތަމަ ގްރޫޕް ޕޮލޭންޑަށް ދިޔައީ ހޮނިހިރު ދުވަހު އެވެ.
