ޔައުންޑޭ، ކެމަރޫން (ފެބްރުއަރީ 6) - ފަހު 20 މިނިޓް ތެރޭ ތިން ގޯލު ކާމިޔާބުކޮށް ބުރްކީނާ ފާސޯއާ އެއްވަރުކުރުމަށް ފަހު ޕެނަލްޓީ ޖަހައިގެން 5-3 އިން މޮޅުވެ، ކެމަރޫނުން އެފްރިކަން ކަޕް އޮފް ނޭޝަންސް (އެފްކޮން)ގެ މި ފަހަރުގެ މުބާރާތުގެ ތިން ވަނަ ހޯދައިފި އެވެ.
އެފްރިކާގެ ޝަރަފްވެރި ތަށި ފަސް ފަހަރު އުފުލާލާފައިވާ ކެމަރޫނުން ރޭގެ މެޗު ފެށީ ދަށްކޮށެވެ. އޭގެ ފައިދާ ބުރްކީނާ ފާސޯ އިން ރަނގަޅަށް ނެގި އެވެ. މެޗުގެ ފުރަތަމަ 50 މިނިޓް ތެރޭ ބުރްކީނާ ފާސޯ އިން ތިން ގޯލުގެ ލީޑެއް ނެގި އެވެ. މެޗުގެ 24 ވަނަ މިނިޓްގައި އީސާ ކަބޯރޭ ތަނަވަސްކޮށްދިން ފުރުސަތެއްގައި ސްޓީވް ޔާގޯ ވަނީ ބުރްކީނާ ފާސޯ އަށް ލީޑުނަގައިދީފަ އެވެ. ފުރަތަމަ ހާފު ނިމުމުގެ ކުރިން ކެމަރޫންގެ ގޯލްކީޕަރު އަންދްރޭ އޮނާނާ އަތުން ބައިކޮޅަށް ވަން ގޯލުން ބުރްކީނާ ފާސޯ އިން ލީޑުފުޅާކުރި އެވެ.
ދެ ވަނަ ހާފް ފަށައިގެން ހަތަރު މިނިޓް ތެރޭ ބުރްކީނާ ފާސޯ ތިން ވަނަ ގޯލު ޖެހި އެވެ. ބާޓްރަންޑް ޓްރައޯރޭ ނެގި ބޯޅައަކުން މި ގޯލު ޖެހީ ޖިބްރީލް އުޓާރާ އެވެ.
ކެމަރޫނުން މެޗުގެ ތެރެއަށް އެނބުރި އައިސް ރަނގަޅަށް ކުޅެން ފެށީ ފަހު 25 މިނިޓް ތެރޭގަ އެވެ. އެ ޓީމުން ފުރަތަމަ ގޯލު ޖެހީ މެޗުގެ 71 ވަނަ މިނިޓްގަ އެވެ. މި ގޯލު ޖެހީ ސްޓެފަން ބަހޯކެން އެވެ. އޭގެ ފަހުން މެޗުގެ 85 އާއި 87 ވަނަ މިނިޓްގައި ކެމަރޫންގެ ކެޕްޓަން، ވިންސެންޓް އަބޫބަކާރު ވަނީ ދެ ގޯލު ޖަހައި ނަތީޖާ ހަމަހަމަކޮށްފަ އެވެ.
އަބޫބަކާރު މި ފަހަރުގެ ކަޕް އޮފް ނޭޝަންސް ނިންމާލީ އެންމެ ގިނަ ގޯލު ޖެހި ކުޅުންތެރިޔާގެ މަގާމުގަ އެވެ. ހަތް މެޗުން އޭނާ ވަނީ އަށް ގޯލު ޖަހައިފަ އެވެ.
މެޗުގެ ފުރިހަމަ ވަގުތު ހަމަވިއިރު އޮތީ 3-3 އިން އެއްވަރުވެފަ އެވެ. ނަތީޖާ ނެރެން ކުޅުނު އިތުރު ވަގުތުގެ ދެ ހާފުގައި ވެސް އެ ނަތީޖާއެއް ނުނެރެވި ޕެނަލްޓީ ޖަހަން ޖެހުނެވެ. ސެމީ ފައިނަލުގައި މިސްރު އަތުން ޕެނަލްޓީ ޖަހައިގެން ކެމަރޫން ބަލިވި ނަމަވެސް ރޭ ވަނީ އެކަން ތަކުރާރުވިޔަ ނުދީފަ އެވެ. ކެމަރޫނުން ޖެހި ފަސް ޕެނަލްޓީ ވެސް ކާމިޔާބުކުރި އެވެ.
ކެމަރޫންގެ ޕެނަލްޓީތައް ކާމިޔާބުކުރީ އަބޫބަކާރު، ނިކޮލަސް އެންގަމަލޭއު، ކާލް ޓޯކޯ-އެކަމްބީ، ޕިއޭރޭ ކޫންޑޭ އަދި އަމްބްރޮއިސް އޮޔޯންގޯ ބިޓޯލޯ އެވެ. ބުރްކީނާ ފާސޯ އިން ޖެހި ހަތަރު ޕެނަލްޓީގެ ތެރެއިން ތިން ޕެނަލްޓީ ކާމިޔާބުކުރި އެވެ. ކަބޭރޯ އާއި ޔާގޯ އަދި އުޓާރާ ޕެނަލްޓީތައް ވައްދާލިއިރު، އެ ޓީމުގެ އިބްރާހިމް ބްލާޓީ ޓޫރޭ ޖެހި ޕެނަލްޓީ ކާމިޔާބެއްނުވި އެވެ.
އެފްރިކަން ކަޕްގެ ފައިނަލުގައި މިރޭ ސެނެގާލުން ނުކުންނާނީ މުބާރާތުގެ ތަށި ހަތް ފަހަރު ހޯދާފައިވާ މިސްރާ ދެކޮޅަށެވެ.
