އަންކާރާ، ތުރުކީ (ފެބްރުއަރީ 5) - ތުރުކީގެ ރައީސް ތައްޔިބް އުރްދުގާން ކޮވިޑަށް ޕޮޒިޓިވްވެފައިވާ ކަމަށާއި ނަމަވެސް ސީރިއަސް އަލާމާތެއް ކުރިމަތިނުވާ ކަމަށް ވިދާޅުވެއްޖެ އެވެ.
"އާދައިގެ އަލާމާތްތައް ފެނުމަށް ފަހު، އަޅުގަނޑާއި އަޅުގަނޑުގެ އަންހެނުން ވަނީ ކޮވިޑަށް ޕޮޒިޓިވްވެފައި. އަޅުގަނޑުމެންނަށް ދިމާވެފައި ވަނީ އާދައިގެ އިންފެކްޝަނެއް. މިއީ އޮމިކްރޯން ވޭރިއެންޓް ކަމަށް ވަނީ އެނގިފައި،" އުރުދުގާން ކުރެއްވި ޓްވީޓެއްގައި ވިދާޅުވި އެވެ.
"އަޅުގަނޑުމެން މި ތިބީ ޑިޔުޓީގައި. ގޭގައި ތިބެގެން މަސައްކަތް ކުރިއަށް ގެންދާނަން. ހުރިހާ ރައްޔިތުންގެ ދުއާއަށް އެދެން."
އުމުރުން 67 އަހަރުގެ އުރުދުގާން އެކަން ހާމަކުރެއްވީ ހޮނިހިރު ދުވަހު އޮތް ހަފްލާއެއްގައި ވީޑިއޯލިންކް މެދުވެރިކޮށް ބައިވެރިވެވަޑައިގެންނެވުމަށް ފަހު އެވެ. ނަމަވެސް ކުރިން ވިދާޅުވީ އެ ހަފްލާއަށް ނުދެވުނީ މޫސުން ގޯސްވުމުން ކަމަށެވެ. ވީޑިއޯ މެދުވެރިކޮށް ޓީވީން އެމަނިކުފާނު ފެނިވަޑައިގެންނެވި އިރު، ބަލީގެ އެއްވެސް ނިޝާނެއް ނެތެވެ.
ފަހަކަށް އައިސް ރެކޯޑް އަދަދުތަކުން ތުރުކީގައި ދަނީ ކޮވިޑް ކޭސްތައް ރިޕޯޓު ކުރަމުންނެވެ. ހުކުރު ދުވަހު ހެލްތު މިނިސްޓްރީން ބުނީ 111،157 ކޭސް ރިޕޯޓުކޮށްފައިވާ ކަމަށެވެ. ޑިސެމްބަރު މަހުގެ ފަހުކޮޅު އެވްރެޖުކޮށް ކޭސްތައް ހުރީ ދުވާލަކު 20،000 ގަ އެވެ.
އޭގެ އިތުރުން ކޮވިޑް ބަލީގައި މަރުވާ މީހުންގެ އަދަދުތައް ވެސް ތުރުކީގައި ދަނީ އިތުރުވަމުންނެވެ. އެގޮތުން ހުކުރު ދުވަހު 248 މީހުން މަރުވި އެވެ.
