އަޑިސް އަބާބާ، އިތިއޯޕިއާ (ފެބްރުއަރީ 5) - އިޒްރޭލް ބަލައިގަންނަން ނިންމި ނިންމުން އަނބުރާ ގެންދަން ފަލަސްތީނުގެ ބޮޑު ވަޒީރު މުހައްމަދު އިޝްތަޔާ ހުށަހެޅުއްވުމާ އެކު އެފްރިކަން ޔޫނިއަން ސަމިޓު ހޫނުވެއްޖެ އެވެ.
އަޑިސް އަބާބާގައި ފެށި ދެ ދުވަހުގެ ސަމިޓުގައި އެފްރިކަން ޔޫނިއަންގެ 55 މެމްބަރު ގައުމުން ބައިވެރިވެ އެވެ. ކޮވިޑް ބަލިމަޑުކަމާއި ބަގާވާތްތަކެއްގެ ސަބަބުން އެފްރިކާގައި ހަމަނުޖެހުން ބޮޑުވެފައިވީ ނަމަވެސް، ސަމިޓުގެ އެންމެ ބޮޑު އެއް ބަހުސަކަށް ވާނީ އިޒްރޭލުގެ މައްސަލަ ކަމަށް ބެލެވެ އެވެ.
އެ މައްސަލަ ޖެހުނީ މިދިޔަ ޖުލައި މަހު އެފްރިކަން ޔޫނިއަން ކޮމިޝަންގެ ރައީސް މޫސާ ފާކީ މަހަމަތް އިޒްރޭލު ބަލައިގަންނަން ނިންމަވާ، "އޮބްޒާވާ" ގައުމެއްގެ ގޮތުގައި އެ ޖަމިއްޔާގައި އިޒްރޭލް ހިމެނުމުންނެވެ. އެފްރިކާ ގައުމުތަކުގެ ވެރިންނަށް އިޝްތަޔާ ގޮވާލެއްވީ އެ ނިންމުން ބަލައިނުގަތުމަށެވެ.
"ބައިނަލްއަގްވާމީ ގާނޫނާ ހިލާފަށް އަމަލު ކުރުމާއި ފަލަސްތީނުގެ ރައްޔިތުންނާ ދެކޮޅަށް ނިޒާމީ ގޮތުން ރާވައިގެން ތަފާތު ކުރުން ބާއްވާ އަޕާތެއިޑް ސިޔާސަތެއް އޮތް އިރު، އިޒްރޭލާ ގުޅޭ އެއްވެސް ކަމެއް ބަލައިގަނެގެން ނުވާނެ،" އިޝްތަޔާ ވިދާޅުވި އެވެ.
ސަމިޓު ކުރިއަށްދާ އިރު، އިޒްރޭލާ ގުޅޭ ގޮތުން ނިންމި ނިންމުމާ މެދު ގައުމުތަކުން ވޯޓަކަށް ދިޔުން އެކަށީގެންވެ އެވެ. މިދިޔަ އަހަރު އެފްރިކަން ޔޫނިއަންގެ ނިންމުމާ ދެކޮޅަށް ތެދުވި ގައުމުތަކުގެ ތެރޭގައި ދެކުނު އެފްރިކާ އަދި އަލްޖީރިއާ ހިމެނެ އެވެ.
