ލަންޑަން (ފެބްރުއަރީ 5) - ޓޮޓެންހަމް ހޮޓްސްޕާސް އިން މީގެ ކުރިން ޓްރާންސްފާ މާކެޓްގައި ގޯސްތަކެއް ހަދާފައި އެބަހުރި ކަމަށް އެ ޓީމުގެ ކޯޗަކަށް ހުރި އިޓަލީގެ އެންޓޯނިއޯ ކޮންޓޭ ބުނެފި އެވެ.
މި ސީޒަން ފެށިއިރު، ޓޮޓެންހަމުން ގެނައި ކޯޗު ނޫނޯ އެސްޕިރީޓޯ ސަންޓޯ ވަކިކޮށް މިދިޔަ ނޮވެމްބަރު މަހު އެއް ވަނަ ދުވަހު ޓޮޓެންހަމުން ވަނީ އެ ޓީމުގެ ކޯޗަކަށް ކޮންޓޭ ހަމަޖައްސައިފަ އެވެ.
ދެ އަހަރުގެ ކޮންޓްރެކްޓެއްގެ ދަށުން ކޮންޓޭ ޓޮޓެންހަމާ ގުޅުނު ނަަމަވެސް ނިމިދިޔަ ޖެނުއަރީ ޓްރާންސްފާ މާކެޓްގައި ކޮންޓޭ ބޭނުންވި އެއްވެސް ކުޅުންތެރިއަކު ޓޮޓެންހަމަށް ނުލިބުނެވެ. އެހެންވެ، ކޮންޓޭ، ޓޮޓެންހަމް ދޫކޮށްލަން އުޅޭ ކަމަށް ވެސް މީޑިއާގައި ވާހަކަ ދެކެވުނެވެ. އެކަމަކު، ކޮންޓޭ ވަނީ އެ ވާހަކަތައް ދޮގުކޮށްފަ އެވެ.
ކޮންޓޭ ބުނީ ޓޮޓެންހަމުން މިހާރު ކުރަމުން އަންނަނީ ޓީމެއް އެކުލަވާލުމުގެ މަަސައްކަތް ކަމަށާއި އެކަން ކުރާއިރު، ގޮންޖެހުންތަކާ ކުރިމަތިލާން ޖެހިފައިވާ ކަމަށެވެ.
"ޖެނުއަރީ ޓްރާންސްފާގައި އަހަރެމެން ކުޅުންތެރިންތަކެއް ލޯނަށް ފޮނުވާލާފައި. ކުޅުންތެރިއަކު ވިއްކާލަން ޖެހުމުން އެނގޭ ކަމަކީ މީގެ ކުރިން އަހަރެމެންނަށް ކުރެވިފައި ހުރި ކަންކަމަށް ވިސްނާލަން އެބަޖެހޭ. އެނގޭ ކަމަކީ ގޯސްތަކެއް ހެދިފައި ހުރިކަން،" ކޮންޓޭ ބުންޏެވެ.
"އާންމު ގޮތެއްގައި އަހަރެމެން ޓްރާންސްފާ ބާޒާރުގެ ބޭނުން ހިފަނީ ޓީމު ވަރުގަދަ ކުރަން ކުޅުންތެރިން ގެންނަން. އެކަމަކު، މީގެ ދެ އަހަރު ނޫނީ ތިން އަހަރު ތެރޭ ގެނެސްފައި ހުރި ކުޅުންތެރިންތަކެއް ލޯނަށް ދޫކޮށްލަން ޖެހުމުން އެނގޭ ކަމަކީ އެންމެ ރަނގަޅަކަށް ނޫނޭ ޓީމެއް ބައްޓަން ކުރެވިފައި މި ހުރީ،"
ޖެނުއަރީ ޓްރާންސްފާ މާކެޓްގައި ޓޮޓެންހަމުން ވަނީ ޑެލެ އަލީ އެވަޓަން އަށް ވިއްކާލުމަށް ފަހު، ޓަންގީ އެންޑޮމްބެލޭ، ޖިއޮވާނީ ލޮ ސެލްސޯ، ބްރަޔާން ހިލް ލޯން އެއްބަސްވުމެއްގެ ދަށުން ދޫކޮށްލައިފަ އެެވެ. ލޯނަށް ދިޔަ ތިން ކުޅުންތެރިންނަކީ ވެސް މިދިޔަ ތިން އަހަރު ތެރޭ ޓޮޓެންހަމް އިން ގެނައި ކުޅުންތެރިންނެވެ.
މިދިޔަ މަހުގެ ޓްރާންސްފާގައި ޓޮޓެންހަމުން ގެންނަން ބޭނުންވި އެޑަމާ ޓްރައޯރޭ ބާސެލޯނާއާ ގުޅުނުއިރު، ލުއިސް ޑިއާޒް ގަތީ ލިވަޕޫލުންނެވެ. ޓޮޓެންހަމުން ގެނައީ ޔުވެންޓަސްގެ ޑޭޔާން ކުސުލެވްސްކީ އާއި ރޮޑްރީގޯ ބެންޓަންކޫރް އެވެ.
ޔުވެންޓަސް އާއި ޗެލްސީ އަދި އިންޓަ މިލާނުގައި ޓީމެއް އެކުލަވާލައިގެން ކާމިޔާބު ހޯދި ކޮންޓޭ ބުނީ ޓީމެއް ވަރުގަދަ ކުރަން ކުޅުންތެރިން ގެންނައިރު، އިސްކަންދޭންޖެހޭނީ އެއިރެއްގައި އޮތް ކޮލިޓީ އަށް ވުރެ ރަނގަޅު ކުރެވޭނެ ކުޅުންތެރިން ހޯދުމަށް ކަމަށެވެ.
އެ ގޮތުން މި ފަހަރުގެ ޓްރާންސްފާ މާކެޓްގައި ޓޮޓެންހަމުން ހަރަކާތްތެރިވީ ވަރަށް ވިސްނުންތެރިކަމާ އެކީގައި ކަމަށާއި ޓޮޓެންހަމްގައި ވަރުގަދަ ޓީމެއް އެކުލަވާލުމުގެ "ޕްލޭނެއް" އެބައޮތް ކަމަށް ކޮންޓޭ ވަނީ ބުނެފަ އެވެ.
"މި ވަގުތު ގޯހެއް ނަހަދައި އަހަރެމެން ޓީމެއް އެކުލަވާލަން ޖެހޭ. އަހަރެމެންނަށް ވުރެ ކުރީގައި މި ވަގުތު އެ އޮތް ޓީމުތަކަކީ މިދިޔަ އަހަރުތަކުގެ ޓްރާންސްފާ ބާޒާރުގައި ޓީމެއް އެކުލަވާލުމުގައި ވީހާވެސް މަދުން ގޯސް ހަދާފައި އޮތް ޓީމުތައް. ވިޝަން އެއް އޮވެގެން ކުރިއަށް ދެވޭނީ. މި ވަގުތު ޓޮޓެންހަމް މި ދަނީ އެ މަގުން ކުރިއަށް،" ކޮންޓޭ ބުންޏެެވެ.
ޓޮޓެންހަމް އިން އިނގިރޭސި އެފްއޭ ކަޕްގައި މިރޭ ކުޅޭ މެޗުގައި ނުކުންނާނީ ބްރައިޓަންއާ ދެކޮޅަށެވެ.
