މޯލްޑިވްސް އިންޓެގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) އިން އިންތިޒާމް ކޮށްގެން ރާއްޖޭގައި ބާއްވާ އެންމެ ފުރަތަމަ ޔޮޓް ރެލީ, "ސަވާދީއްތަ ދަތުރު" ގެ ބައިވެރިންނަށް ހާއްސަ ޕާސްޕޯޓެއް މިއަދު ތައާރަފްކޮށްފި އެވެ.
ރިޔަލު ޔޮޓް ފަހަރުގައި ރާއްޖެ އަށް އަންނަ ޓޫރިސްޓުންނަށް ހާއްސަކޮށްގެން ފެށި މި ދަތުރުގައި ހއ. އިން ފެށިގެން ބ. އަތޮޅުގެ 14 ރަށަކަށް ދަތުރުކުރަން ހަމަޖެހިފައިވާއިރު، މިއަދު އެ ރެލީ ފެށީ ހއ. ހޯރަފުށިންނެވެ. އެރަށުގައި ކުލަގަދަކޮށް ބޭއްވި ފެށުމުގެ ރަސްމިއްޔާތުގައި ސަވާދިއްތަ ޕާސްޕޯޓް އިފްތިތާހްކޮށްދެއްވީ އދ. އިން ރާއްޖެއަށް ކަނޑައަޅާފައި ހުންނަވާ ރެޒިޑެންޓް ކޯޑިނޭޓާ ކެތެރިން ހެޒްވެލް އެވެ.
ދަތުރުގެ ކޮންމެ ބައިވެރިއަކަށް، ރަމްޒީ ހަދިޔާއެއްގެ ގޮތުގައި ދިން މި ޕާސްޕޯޓްގައި ކޮންމެ ރަށަކަށް ދިއުމުންވެސް އެ ރަށަކަށް ޒިޔާރަތް ކުރި ކަމުގެ ސްޓޭމްޕެއް ޖަހާނެ އެވެ. މިފަހަރުގެ ދަތުރުގައި ބައިވެރިވީ ރާއްޖެއިން ބޭރުގެ ފަރާތްތައް އެކަންޏެވެ. އެހެންވެ, ޕާސްޕޯޓް ވެސް ދޫކޮށްފައި ވަނީ އެއްހާސް ޑޮލަރުގެ ފީއެއް ދައްކައިގެން ރެލީގައި ބައިވެރިވިި، 12 ޔޮޓުގެ 34 ފަތުރުވެރިއަކަށެވެ.
ސަވާދީއްތަ ޕާސްޕޯޓް އިފްތިތާހް ކުރަނިކޮށް: އދ. ގެ ރެޒިޑެންޓް ކޯޑިނޭޓާ ކެތެރިން (ވ.)، އެމްއައިޓީޑީސީގެ އެމްޑީ ރާއިދު (ކ.) -- ފޮޓޯ: އެމްއައިޓީޑީސީ
"ސެއިލަރަކު އެއް ގައުމުން އަނެއް ގައުމަށް ދާއިރު، އެ ގައުމަކަށް ޒިޔާރާތްކުރިކަމުގެ ރަމްޒެއްގެ ގޮތުން ތަތްގަނޑެއް ޖަހާ ދޭނެ. އަޅުގަނޑުގެ ބައްޕައަކީ ކެޕްޓަނެއް، ދުނިޔޭގައި ހުންނެވިއިރު ބޯޓު ދަތުރު ކުރެއްވީ އެންމެ ޒަމާންވާންދެން. އަޅުގަނޑަށް ފެނުން ބައްޕަ ދަތުރު ކުރެއްވި ގައުމުތައް،" އެތެރޭގެ ދަތުރުތަކަށް ހާއްސަ ޕާސްޕޯޓެއް ސެއިލަރުންނަށް ހާއްސަކޮށްގެން ހެދުމުގެ ހިޔާލު އައިގޮތް އެމްއައިޓީޑީސީގެ މެނޭޖިން ޑިރެކްޓަރު މުހައްމަދު ރާއިދު "އަދަދު" އަށް ކިޔާދެއްވި އެވެ.
"ރަސްމީ ޕާސްޕޯޓަކަށް ރާއްޖެ ކަހަލަ ގައުމަކަށް އައިސް ކިތަންމެ ގިނަ ރަށްތަކަށް ދިޔަޔަސް ނެތް އެނގޭނެ ގޮތެއް، އެހެންވެ މި ދަތުރުގެ އިތުރުންވެސް އެ ފަތުރުވެރިން ދާ ކޮންމެ ރަށަކަށް ދިޔަކަމުގެ ރަމްޒީ ހަދާނަކަށް މި ޕާސްޕޯޓް ހަދަން ނިންމީ"
ރާއިދު ވަނީ ރާއްޖޭގެ މީހުން ދިރިއުޅޭ ކޮންމެ ރަށަކަށް ދާ ފަތުރުވެރިއެއްގެ އަތުގައިވެސް މި ޕާސްޕޯޓް އޮތްނަމަ އޭގައި އެރަށަށް އައިކަމުގެ ތަތްގަނޑެއް ޖަހާދިނުމަށް އެދިފަ އެވެ. އޭނާ ބުނީ ސަވާދިއްތަ ދަތުރަށްފަހު އެ ދަތުރުގެ ބައިވެރިން އެހެން ރަށްރަށަށް ޒިޔާރާތް ކުރުމަކީ އެކަށީގެންވާ ކަމެއް ކަމަށެވެ.
ރާއްޖޭގެ ޓޫރިޒަމަށް ބައި ގަރުނު ފުރުމުގެ މުނާސަބަތުގައި، ފަތުރުވެރިކަން އެހެން ހަރުފަތަކަށް ގެންދިޔުމަށް ފެށި، މި ރެލީ ކޮންމެ އަހަރެއްގައިވެސް ބޭއްވުމަށް އެމްއައިޓީޑީސީ އިން ވަނީ ނިންމާފަ އެވެ. އެ ފުރުސަތު ދިވެހިންނަށް ވެސް ހުޅުވާލާފައިވާއިރު، ސަވާދީއްތަ ޕާސްޕޯޓް ދޫކުރަން ނިންމާފައި ވަނީ ދަތުރުގައި ބައިވެރިވާ ފާރާތްތަކަށް އެކަންޏެވެ.
ފަތުރުވެރިންނާއި ދިވެހި މުޖްތަމައު އާ ދެމެދު އޮންނަ ގުޅުން އިތުރަށް ބަދަހިކޮށް، ރަށްވެހި ދިރިއުޅުމުގެ ތެރެއިން ކޮންމެ ރައްޔިތެއްގެ ޖީބަށްވެސް ތަނަވަސްކަން ގެނެސްދިނުމުގެ މަގުފަހިކޮށްދިނުމުގެ އަމާޒުގައި، ހޯމްސްޓޭ ފެށުމަށްޓަކައި ފެށި މި ރެލީގައި ދުނިޔޭގެ މަޝްހޫރު ސެލިބްރިޓީ ޔޮޓް، "ސެއިލިން ޒަޓާރާ"، އަދި "ސެއިލިން އެކުއޭރިއަސް" ފަދަ ޔޮޓްތައް ބައިވެރިވި އެވެ.
މީގެ އިތުރުން ފްރާންސްއާއި، ތައިލޭންޑާއި، އެމެރިކާ، އިންޑިއާ އަދި މެލޭޝިޔާގެ ބައެއް ޔޮޓުތައް މި ދަތުރުގައި ބައިވެރި ވިއެވެ.
އެމްއައިޓީޑީސީީގެ އަމާޒަކީ މި ދަތުރުގެ ތެރެއިން ރަށްރަށުގެ ސަގާފަތާއި ތާރީހާއި އާދަކާދަތަކަށް ފަތުރުވެރިން ހިތް ޖައްސައިގެން، އެރަށްތައް ބޭރުގެ މާކެޓްތަކުގައި އިޝްތިހާރުކޮށް ހޯމްސްޓޭ ޓޫރިޒަމް ފުޅާކުރުމެވެ.
