ދަނޑުވެރިކަމާ ގުޅޭ މަސައްކަތަށް އުފައްދާފައިވާ އެގްރޯނެޓް ކޯޕަރޭޝަން ޕްރައިވެޓް ލިމިޓެޑް އަދި މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން ލިމިޓެޑް (އެމްއައިޓީޑީސީ) އުވާލަން ސަރުކާރުން ނިންމައިފި އެވެ.
ރައީސް އޮފީހުން ބުނީ ވަޒީރުންގެ މަޖިލީހުން ނިންމީ އެގްރޯނެޓް އުވާލައި، އެތަނުގެ މަސައްކަތްތައް އެގްރިކަލްޗާ އިކޮނޮމިކް ޒޯނު ތަރައްގީކުރާ މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން ޕަބްލިކް ލިމިޓެޑާ ހަވާލުކުރުމަށެވެ.
އެގޮތުން, އެކަމަށް ކުރަން ޖެހޭ މަސައްކަތްތައްކޮށް، ގާނޫނާއި ގަވާއިދާ އެއްގޮތަށް ކުރިއަށް ގެންދިޔުމަށް ވެސް ވަނީ ނިންމާފަ އެވެ.
އިންޓަގްރޭޓެޑް ޓޫރިޒަމާ ގުޅޭ މަސައްކަތް ކުރުމަށް ސަރުކާރުން އުފައްދާފައިވާ އެމްއައިޓީޑީސީ އުވާލުމަށްފަހު، ނިންމީ އެ ކުންފުނީގެ މަޝްރޫއުތަކާއި މަސައްކަތްތައް މޯލްޑިވްސް ފަންޑް މެނޭޖްމަންޓް ކޯޕަރޭޝަން ލިމިޓެޑް (އެމްއެފްއެމްސީ) ގެ މެންޑޭޓަށް ގެނެވޭ ބަދަލުގެ ތެރެއިން އެ ކުންފުންޏާ ހަވާލު ކުރުމަށެވެ.
އެގޮތުން އެކަމާގުޅޭ އެންމެހައި މަސައްކަތްތައް ޑިސެމްބަރު، 31 އަށް ނިންމުމަށް ވެސް ސަރުކާރުން ވަނީ ނިންމާފަ އެވެ.
އޭގެއިތުރުން އެމްއެފްއެމްސީއާއި ބިޒްނަސް ސެންޓާ ކޯޕަރޭޝަން ބީސީސީ އެއްކޮށްލުމުގެ މަސައްކަތް މި ވަގުތު ކުރިއަށް ނުގެންގޮސް، އޯޝަން ކަނެކްޓް މޯލްޑިވްސް ޕްރައިވެޓް ލިމިޓެޑް (އޯސީއެމް) އިން ކުރިއަށް ގެންދާ މަޝްރޫއުތައް، މިހާރެކޭވެސް އެއްގޮތަށް ކުރިއަށް ގެންދަން ވަނީ ނިންމާފަ އެވެ.
