އަތްމޭ، ސީރިއާ (ފެބްރުއަރީ 3) - ސީރިއާގެ ހުޅަނގު އުތުރުގައި ބުރާސްފަތި ދުވަހުގެ ރޭ އެމެރިކާގެ ވައިގެ އޮޕަރޭޝަނެއް ހިންގަނިކޮށް، އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕުގެ ލީޑަރު ބޮމެއް ގޮއްވާލައި އަމިއްލައަށް މަރުވެއްޖެ އެވެ.
މިއީ އައިއެސްގެ ކުރީގެ ލީޑަރު އަބޫ ބަކުރު އަލް ބަގްދާދީ 2019 ވަނަ އަހަރު މަރާލި ފަހުން އެ ގްރޫޕަށް ލިބުނު އެންމެ ބޮޑު ގެއްލުމެވެ. ސީރިއާގެ އިދްލިބް ސަރަހައްދުގައި ބަގްދާދީ ވެސް މަރުވީ އޮޕަރޭޝަނެއް ހިންގަމުން ދަނިކޮށެވެ.
"އަޅުގަނޑުމެންގެ އަސްކަރީ ފައުޖުގެ ހުނަރުވެރިކަމާއި ހިތްވަރުގެ ސަބަބުން، އައިއެސްގެ ލީޑަރު އަބޫ އިބްރާހިމް އަލް ގުރައިޝީ ވަނީ ހަނގުރާމައިގެ މައިދާނުން ނައްތާލެވިފައި،" އެމެރިކާގެ ރައީސް ޖޯ ބައިޑެން ނެރުއްވި ބަޔާނެއްގައި ވިދާޅުވި އެވެ.
ނަން ހާމަ ނުކުރާ ވައިޓް ހައުސްގެ އޮފިޝަލަކު ބުނީ އަސްކަރީ އޮޕަރޭޝަން ހިންގީ އަތްމޭ އަވަށުގައި ގުރައިށީ ދިރިއުޅޭ ގެއަށް އަމާޒުކޮށް ކަމަށެވެ. އޮޕަރޭޝަން ފެށުމާ އެކު ބޮމެއް ގޮއްވާލައި ގުރައިޝީ އާއި އޭނާގެ އާއިލާ އަމިއްލައަށް މަރުވީ އެވެ.
ގުރައިޝީއަކީ އިރާގުގެ ތާލް އަފަރް ސިޓީގެ މީހެކެވެ. އާމިރް މުހައްމަދު ސައިދު އަބްދުލް ރަހްމާން އަލް މައުލާގެ ނަމުން ވެސް އޭނާއަށް މުހާތަބު ކުރެ އެވެ. އައިއެސްގެ ލީޑަރު ކަމަށް އޭނާ އައީ އޮކްޓޯބަރު 2019 ގައި ބަގްދާދީ މަރުވުމުންނެވެ.
ގުރައިޝީ އުޅޭ ތަނަކާ ގުޅޭ މައުލޫމާތު ފޯރުކޮށްދޭ ފަރާތަކަށް 10 މިލިއަން ޑޮލަރު ދޭން އެމެރިކާ ސަރުކާރުން ހުށަހަޅާފައިވެ އެވެ.
ސީރިއަން އޮބްޒަވޭޓަރީ ފޯ ހިޔުމަން ރައިޓްސް އިން ބުނީ އޮޕަރޭޝަނުގައި 13 މީހުން މަރުވިއިރު، އޭގެ ތެރޭގައި އާއްމުން ވެސް ހިމެނޭ ކަމަށެވެ. އޮޕަރޭޝަނުގައި އެމެރިކާގެ އަސްކަރީ ފައުޖުގެ ހެލިކޮޕްޓަރެއް އަތްމޭ ކައިރިއަށް ތިރިކުރި އެވެ.
"އޮޕަރޭޝަނުގައި 13 މީހުން މަރުވި. އޭގެ ތެރޭގައި ހަތަރު ކުދިންނާއި ތިން އަންހެނުން ހިމެނޭ،" އޮބްޒަވޭޓަރީގެ ވެރިޔާ ރާމީ އަބްދުލް ރަހްމާން އޭއެފްޕީއަށް ވިދާޅުވި އެވެ.
އަތްމޭގައި ގުރައިޝީ ދިރިއުޅުނު ގޭގެ ވެރިމީހާ އޭއެފްޕީއަށް ބުނީ އެ ކުއްޔަށް ނަގައިގެން އޭނާ އުޅޭތާ 11 މަސް ވެއްޖެ ކަމަށެވެ. އޭނާއާ ގުޅޭ އެއްވެސް ޝައްކު ކުރެވޭ ކަމެއް ފާހަގަނުވާ ކަމަށް ވެސް ބުންޏެވެ.
"އޭނާ އައިސް ކުލި ދައްކާފައި ދާނީ. އޭނާ އުޅުނީ ތިން ކުދިންނާއި އަންހެނުންނާ އެކު. އޭނާގެ ހުވަފަތްވެފައިވާ ދައްތަ އާއި ދައްތަގެ އަންހެން ދަރިފުޅު އުޅުނީ އެ ގޭގެ މަތީ ބައިގައި."
އަތްމޭއަކީ ސީރިއާގެ 10 އަހަރުވީ ހަމަނުޖެހުމުގައި ގެދޮރު ގެއްލިފައިވާ މީހުން ގިނަ އަދަދަކަށް ދިރިއުޅޭ ތަނެކެވެ. އެ ތަނުގައި އާއްމުންގެ ތެރޭގައި ފޮރުވިގެން ޓެރަރިސްޓުން ސިއްރުން އުޅޭ ކަމަށް ކުރިން ވެސް އޮތީ ބެލެވިފަ އެވެ.
އައިއެސްގެ ލީޑަރު އަމިއްލައަށް މަރުވެފައި މި ވަނީ މީގެ ދެ ހަފްތާ ކުރިން އެ ގްރޫޕުގެ ޓެރަރިސްޓުން އިރު އުތުރު ސީރިއާގެ ޖަލަކަށް ބޮޑު ހަމަލާއެއް ދީފައި ވަނިކޮށެވެ. އެ ހަމަލާގެ އަމާޒަކީ ޖަލުގައި ތިބި ގިނަ އަދަދެއްގެ ޓެރަރިސްޓިން މިނިވަން ކުރުމެވެ.
ނަމަވެސް އެ ސަރަހައްދު ކޮންޓްރޯލް ކުރާ ކުރުދީންގެ ފައުޖުން ވަނީ ޓެރަރިސްޓުން ބަލިކޮށް ޖަލުގެ ކޮންޓްރޯލް ހޯދާފަ އެވެ. އައިއެސްގެ ބާރު ކަނޑުވާލިތާ ތިން އަހަރު ފަހުން އެ ގްރޫޕުން ދިން އެންމެ ބޮޑު ހަމަލާގެ ގޮތުގައި ބެލެވޭ އެ ހަމަލާގައި 300 އަށް ވުރެ ގިނަ މީހުން މަރުވި އެވެ.
