ކޮމަންޑޫ ދާއިރާގެ ބައި-އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް މުހައްމަދު ރާޝިދަށް ތާއީދު ހޯދުމަށް ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ކޮމަންޑުއަށް ވަޑައިގެންފި އެވެ.
ރައީސް އޮފީހުގެ ތަރުޖަމާނު މުހައްމަދު މަބްރޫކް އަޒީޒު "އަދަދު" އަށް ވިދާޅުވީ ދެ ރައީސުން ކޮމަންޑޫއަށާއި ފޯކައިދޫއަށް ވަޑައިގަތުމަށް ހަމަޖެހިފައިވާ ކަމަށެވެ.
އަންނަ ހޮނިހިރު ދުވަހު ބާއްވާ ކޮމަންޑޫ ދާއިރާގެ އިންތިހާބުގައި އެމްޑީޕީގެ ކެންޑިޑޭޓަށް ތާއީދު ހޯއްދެވުމަށް ދެ ރައީސުން އެ ދާއިރާއަށް ދަތުރު ކުރައްވަން ނިންމެވިއިރު މިއީ އެކުގައި މި ކެމްޕެއިނުގައި ބައިވެރިވެވަޑައިގަންނަވާ ފުރަތަމަ ފަހަރެވެ.
މީގެ ކުރިން ކެމްޕޭނަށް ދިއުމަށް ނިންމެވި ނަމަވެސް ރައީސް ސޯލިހަށް ކޮވިޑު ޖެހިވަޑައިގަތުމުން އެ ދަތުރުގައި ބައިވެރިވެވަޑައެއް ނުގަންނަވަ އެވެ.
އެ ދަތުރުގައި ކޮމަންޑޫ ދާއިރާއަށް ވެރިކަން ކުރާ އެމްޑީޕީގެ ފަރާތުން ވާދަ ކުރައްވާ ކެންޑިޑޭޓު މުހައްމަދު ރާޝިދުގެ ކެމްޕެއިނުގެ ހަރަކާތުގައި ރައީސް ނަޝީދާއި ޑިފެންސް މިނިސްޓަރު މާރިޔާ އަހުމަދު ދީދީ އާއި ފޮރިން މިނިސްޓަރު އަދި އދ. އާންމު މަޖިލީހުގެ ރައީސް އަބްދުﷲ ޝާހިދު ވަނީ އެ ރަަަަށަށް ވަޑައިގެންފަ އެވެ.
އަދި މިހާރު ވެސް އެ ދެ ރަށުގައި އެމްޑީޕީ އާއި އިދިކޮޅު ކޯލިޝަނުން ވެސް ދަނީ ފޯރީގައި ކެމްޕޭން ކުރަމުންނެވެ.
އަންނަ ފެބްރުއަރީ މަހު ބޭއްވުމަށް ހަމަޖެހިފައިވާ އެ އިންތިހާބުގައި ރާޝިދަށް ލިބުނީ ކެންޑިޑޭޓް ނަންބަރު އެކެކެވެ. ދެވަނަ ނަމްބަރު ލިބުނީ އިދިކޮޅު ޕީޕީއެމްގެ ކެންޑިޑޭޓު، މޫސާ ފަތުހީއަށެވެ. ތިންވަނަ ކެންޑިޑޭޓަކީ މިދިޔަ އަހަރު ތެރޭގައި އުފެއްދި އެމްއެންޕީގެ އަބްދުލް ހަންނާނު އިދުރީސް އެވެ.
އެމްޑީޕީގެ ޓިކެޓުގައި ވާދަކުރައްވާ ރާޝިދުއަކީ 10 އަހަރުވަންދެން ފޯކައިދޫ ކައުންސިލްގެ މެމްބަރުކަމާއި ރައީސް ކަން ކުރެއްވި ބޭފުޅެކެވެ. އޭނާއަކީ މިހާރު އެ އިދާރާގެ ސެކެޓްރީ ޖެނެރަލް އެވެ.
