ގެވެށި އަނިޔާގެ ޝިކާރައަކަށް ވެފައި ތިބޭ މީހުންނަށް ރާއްޖޭގެ ތިން ސަރަހައްދެއްގައި މަރުކަޒުތައް ގާއިމް ކުރުމަށް ނިންމާފައިވާ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް މިއަދު ވިދާޅުވެއްޖެ އެވެ.
ރައްޔިތުންގެ މަޖިލިސް މި އަހަރަށް ހުޅުއްވައިދެއްވައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ރިޔާސީ ބަޔާން އިއްވަވަމުން ވިދާޅުވީ ގެވެށި އަނިޔާގެ ޝިކާރައަށްވާ ފަރާތްތަށް ދުޅަހެޔޮ ދިރިއުޅުމަކަށް އަނބުރާ ގެނައުމަށް ތިން މަރުކަޒެއް ގާއިމު ކުރުމަށް ސަރުކާރުން ނިންމައިފައިވާ ކަމަށެވެ.
"އެ މަރުކަޒުތައް ގާއިމް ކުރަނީ ރ. އުނގޫފާރާ، ހުޅުމާލޭގެ އިތުރުން ސ. ހިތަދޫގައި،" ރައިސް ވިދާޅުވި އެވެ.
އޭގެ އިތުރުން ރައީސް ވިދާޅުވީ ކޮވިޑުގެ ހާލަތާ ގުޅިގެން މަސްތުވާތަކެތީގެ ހާލަތު އިތުރަށް ގޯސްވެފައި ވާއިރު، އެ ދޮރުތައް ބަންދުކޮށް، ހުއްޓުވުމަށް ސަރުކާރަށް ގިނަ ގޮންޖެހުންތަކަކާ ކުރިމަތިލާންޖެހުނު ކަމަށެވެ.
"އެހެން ނަމަވެސް ދޮވެފާ ހުރި ގޮށްތައް ބާރުކޮށް ހުޅުވާ ދޮރުތައް ބަންދުކޮށް އެމީހުން ހުއްޓުވުމަށް ސަރުކާރުގެ ހުރިހާ ވަސީލަތެއް ބޭނުން ކުރާނަން. ކަމާބެހޭ ޓާސްކް ފޯސް އެކުލަވާލެވި ކުރަން ޖެހޭކަންކަން ސަރުކާރުން މިދަނީ ކުރަމުން. އިރާދަކުރެއްވިއްޔާ މި ގެންނަ ބަދަލުގެ ހެޔޮނަތީޖާ ފެންނާނެ،" އެމަނިކުފާނު ވިދާޅުވި އެވެ.
ރާއްޖޭގައި ގެވެށި އަނިޔާގެ ކަންކަން ހުއްޓުވުމަށް އޭޕްރީލް 23، 2012 ގައި ވަނީ ހާއްސަ ގާނޫނެއް ފާސްކޮށްފަ އެވެ. މިއީ ގެވެށި އަނިޔާގެ މައްސަލަތައް ހުއްޓުވުމާއި މަނާކުރުމުގެ އުސޫލުތައް ކަނޑައަޅައި، ގެވެށި އަނިޔާގެ ޝިކާރައަކަށްވާ ފަރާތްތަކަށް ފޯރުކޮށްދޭންޖެހޭ ރައްކާތެރިކަމާ އެހީތެރިކަން ފޯރުކޮށްދިނުމުގެ މަގްސަދުގައި އެކުލަވައިލި ގާނޫނެކެވެ.
