ވޮޝިންޓަން، އެމެރިކާ (ފެބްރުއަރީ 1) - ދުނިޔޭގައިވާ ގަސްތަކުގެ ތެރެއިން 9،000 ބާވަތް އަދިވެސް ދެނެނުގަނެވޭ ކަމަށް ސައިންސްވެރިން ބުނެފި އެވެ.
"ދުނިޔޭގެ ޖަންގަލިތައް ހިމާޔަތްކޮށް، ކުރިއެރުވުމަށް ގަސްތަކުގެ ބާވަތުގެ އަދަދު ލަފާކުރުމަކީ މުހިއްމު މައުލޫމާތެއް،" އެމެރިކާގެ ނެޝަނަލް އެކެޑެމީއޮފް ސައިންސަސްގެ ޖާނަލް ޕީއެންއޭއެސްގައި ޝާއިއުކުރި ދިރާސާއެއްގައިވެ އެވެ. އެ ދިރާސާގައި ގިނަ އަދަދެއްގެ ސައިންސްވެރިން ބައިވެރިވި އެވެ.
މިހާތަނަށް ސައިންސްވެރިންނަށް ހޯދިފައި ވަނީ 64،100 ބާވަތުގެ ގަހެވެ.
ނަމަވެސް، ކުރިއަށް ވުރެ ފުރިހަމަ ޑޭޓާބޭސްއަކާއި ސްޓެޓިސްޓިކަލް މެތަޑް ބޭނުންކޮށްގެން ހެދި ދިރާސާއިން އެނގުނު ގޮތުގައި ދުނިޔޭގައި 73،300 ބާވަތުގެ ގަސް އެބަ ހުއްޓެވެ. އެއީ ކުރިން އަންދާޒާ ކުރި ވަރަށް ވުރެ 14 ޕަސެންޓް އިތުރެވެ.
އެހެންކަމުން، 9،200 ބާވަތުގެ ގަސް މިހާތަނަށް ސައިންސްވެރިންނަށް ހޯދިފައެއް ނުވެ އެވެ.
ދިރާސާގައިވާ ގޮތުން ގަހުގެ ބާވަތްތަކުގެ 43 ޕަސެންޓް ފެންނަނީ ދެކުނު އެމެރިކާއިންނެވެ. ދެން އެންމެ ގިނައިން އެކި ބާވަތްތަކުގެ ގަސް ފެންނަނީ ޔޫރޭޝިއާ އަދި އެފްރިކާއިންނެވެ.
މިހާތަނަށް ހޯދިފައިވާ ބާވަތްތަކުގެ ތެރެއިން ގާތްގަނޑަކަށް 50 ޕަސެންޓް ފެންނަނީ ފަސް ބައްރުގައިވާ ޓްރޮޕިކަލް ނުވަތަ ސަބްޓްރޮޕިކަލް ރެއިންފޮރެސްޓް ޖަންގަލިތަކުންނެވެ.
އެހެންކަމުން، މިހާތަނަށް ސައިންސްވެރިންނަށް ހޯދިފައި ނުވާ ގަހުގެ ބާވަތްތަކުގެ ބޮޑު ބަޔެއް ވެސް ހިމެނޭނީ އެ ސަރަހައްދުތަކުގައި ކަމަށް ދިރާސާއިން ލަފާކުރެވެ އެވެ.
ގަހުގެ ބާވަތްތަކުގެ ތެރެއިން ތިންބައިކޮށްފައި އެއްބަޔަކީ، އަދަދު މަދުވުމުން، ނެތި ދިޔުމުގެ ބިރު އޮތް ބާވަތްތަކެވެ.
"މިފަދަ ނެތި ދިޔުމުގެ ބިރު އޮތް ބާވަތްތަކުގެ ގަސް ހުންނަ ޖަންގަލީގެ ސަރަހައްދުތަކުން ގަސް ކެނޑުމަކީ މުޅި ދުނިޔޭގެ އިކޯސިސްޓަމާއި ދިރުންތަކަށް އޭގެ އަސަރު ކުރާނެ ކަމެއް،" ދިރާސާގައި ބުނެފައިވެ އެވެ.
