ގުދުސް (ފެބްރުއަރީ 1) - ފަލަސްތީނުގެ ރައްޔިތުންނަކީ "ނަސްލީ ގޮތުން ދަށް ފަންތީގެ ބަޔެއް" ކަމަށް ދެކޭ އިޒްރޭލަކީ "އަޕާތެއިޑް" ދައުލަތެއް ކަމަށް އެމްނެސްޓީ އިންޓަނޭޝަނަލް އާއި އެހެން ޖަމިއްޔާތަކުން ލޭބަލްކޮށްފި އެވެ.
"އިޒްރޭލުން އަޅުވެތިކޮށްގެން އުޅޭ ފަލަސްތީނުގެ ރައްޔިތުން ވަކިކޮށް، އިޖުތިމާއީ ކަންކަމުން އެކަހެރިކޮށް، މުދާ ފޭރުމުގެ އަމަލުތަކަކީ ވަރަށް ސާފުކޮށް އަޕާތެއިޑް ހިންގުން،" އެމްނެސްޓީގެ ސެކެޓްރީ ޖެނެރަލް އެގްނިސް ކެލަމާޑް ވިދާޅުވި އެވެ.
"ފަލަސްތީނުގެ ރައްޔިތުން ދިރިއުޅެނީ ގާޒާ، ގުދުސް، ހުޅަނގު އައްސޭރި ނުވަތަ އިޒްރޭލުގައި ވިޔަސް، އެ މީހުންނާ މެދު އަމަލު ކުރަނީ ނަސްލީ ގޮތުން ދަށް ފަންތީގެ ބަޔެއްގެ ގޮތުގައި އަދި ނިޒާމީ ގޮތުން ރާވައިގެ ހައްގުތައް ނިގުޅައިގަންނަމުންދޭ."
އިޒްރޭލުގެ ފޮރިން މިނިސްޓަރު ޔެއާ ލަޕިދް ވިދާޅުވީ އެ ނިންމުން ބަލައިނުގަންނަ ކަމަށާއި އެއީ "ހަގީގަތާ ދުރު" ވިސްނުމެއް ކަމަށެވެ. އަދި އެމްނެސްޓީން ނެރުނު ރިޕޯޓުގައި ވަނީ ޓެރަރިސްޓް ޖަމާއަތްތަކުގެ ދޮގު ވާހަކަތައް ހިމަނާފައި ކަމަށް ތުހުމަތު ކުރެއްވި އެވެ.
އިޒްރޭލުގެ ފޮރިން މިނިސްޓްރީން އަންގާރަ ދުވަހު ނެރުނު ބަޔާނެއްގައި އެމްނެސްޓީއަށް ގޮވާލީ އެ ޖަމިއްޔާއިން އާއްމުކުރި ރިޕޯޓު އަނބުރާ ގެންދިޔުމަށެވެ.
މީގެ އަހަރެއް ކުރިން، އިޒްރޭލުގައި އިންސާނީ ހައްގުތަކަށް މަސައްކަތް ކުރާ ބީ'ޓްސެލެމް ގްރޫޕުން ތުހުމަތު ކުރީ އިޒްރޭލުގެ ސިޔާސަތުތައް ރާވާފައި ވަނީ "އުރުދުންގެ ކޯރުން ފެށިގެން މެޑިޓެރޭނިއަން ކަނޑާ ހަމައަށް ޔަހޫދީ ނަސްލުގެ ބާރު ގަދަ ކުރަން" ކަމަށެވެ.
އިޒްރޭލަކީ އަޕާތެއިޑް ދައުލަތެއް ނުވަތަ ނިޒާމީ ގޮތުން ރާވައިގެ ނަސްލީ ތަފާތު ކުރުން ގެންގުޅޭ ދައުލަތެއްގެ ގޮތުން އެންމެ ފުރަތަމަ އާއްމުކޮށް އިއުލާނު ކުރީ މިދިޔަ އޭޕްރިލް މަހު ހިޔުމަން ރައިޓްސް ވޮޗި އިންނެވެ.
