ޓޯކިޔޯ، ޖަޕާން (ފެބްރުއަރީ 1) - ޗައިނާގެ އިންސާނީ ހައްގުތަކުގެ ހާލަތާ މެދު ކަންބޮޑުވުން ފާޅުކޮށް ޖަޕާނުގެ ޕާލިމެންޓުން ގަރާރެއް ފާސްކޮށްފި އެވެ.
ޕާލިމެންޓަށް ހުށަހެޅި ގަރާރު ފާސްކުރީ ގިނަ ބަދަލުތަކެއް ގެނެސްގެންނެވެ. އެގޮތުން އިންސާނީ ހައްގުތަކުގެ ތުހުމަތު ސީދާ ޗައިނާ ސަރުކާރަށް ކޮށްފައި ނުވާކަން ފާހަގަކުރެވެ އެވެ.
ނަމަވެސް ގަރާރް ފާސްކޮށްފައި ވަނީ ޗައިނާގެ އިންސާނީ ހައްގުތަކުގެ ހާލަތާ މެދު ބައިނަލްއަގްވާމީ ކަންބޮޑުވުން އިތުރުވެފައިވާ ދަނޑިވަޅެއްގަ އެވެ. ޗައިނާއިން ތައްޔާރުވަމުން ދަނީ ބެއިޖިން ވިންޓާ އޮލިމްޕިކްސް މުބާރާތް މި މަހު ފެށުމަށެވެ.
ޗައިނާއާ މެދު ޖަޕާނުން ގެންގުޅެނީ ވަރަށް ފަރުވާތެރި ސިޔާސަތަކެވެ. އެގޮތުން ޖަޕާނުގެ އެކުވެރި އެމެރިކާއިން ޗައިނާއަށް ކުރާ ޕްރެޝަރު ބެލެންސް ކުރެވޭތޯ ޖަޕާނުން ބަލަ އެވެ. ވިޔަފާރީގައި ޖަޕާނުގެ އެންމެ ބޮޑު ދެ ބައިވެރިންނަކީ އެމެރިކާ އާއި ޗައިނާ އެވެ.
ޕާލިމެންޓުގެ ތިރިގެއިން މެޖޯރިޓީ ވޯޓާ އެކު ފާސްކުރި ގަރާރުގައި ކަންބޮޑުވުން ފާޅުކުރީ ޗައިނާގެ ޝިންޖިއާން، ޓިބެޓް، ހޮންކޮން އަދި އިނާ މޮންގޯލިއާ ސަރަހައްދުތަކުގައި އަމަލު ކުރާ ގޮތާ ގުޅިގެންނެވެ.
އިންސާނީ ހައްގުތަކުގެ މައްސަލައިގައި ޖަޕާން ސަރުކާރުން ޗައިނާއާ އެކު ކުރިއަށް ފިޔަވަޅު އެޅޭނެ ފަދަ ގޮތަކަށް މަސައްކަތް ކުރަން ގަރާރުގައި ގޮވާލާފައިވެ އެވެ.
ޝިންޖިއާންގައި ދިރިއުޅޭ އުއިގާ ދަރިކޮޅުގެ މުސްލިމުންނާ މެދު ލާއިންސާނީކޮށް އަމަލު ކުރާ ކަމަށް ކުރެވޭ ތުހުމަތުތައް ޗައިނާއިން ދޮގުކުރެ އެވެ. އެމެރިކާއިން ތުހުމަތު ކުރާ ގޮތުގައި ޗައިނާއިން ވަނީ އެ މީހުންނާ ދެކޮޅަށް ބޮޑު ގަތުލުއާއްމެއް ހިންގާފަ އެވެ.
ތަޖުރިބާކާރުން ލަފާކުރާ ގޮތުގައި ޝިންޖިއާން ސަރަހައްދުގައިވާ ކޭމްޕުތަކެއްގައި މިލިއަނަކަށް ވުރެ ގިނަ މީހުން ބަންދުކޮށްފައި އެބަ ތިއްބެވެ.
ޓިބެޓް ސަރަހައްދުގައި އުޅޭ މީހުންނަކީ ޗައިނާ ބަޔެއް ނޫން ކަމަށް ދައްކުވައިދޭ އެއްވެސް ނިޝާނެއް އެ މީހުންގެ އާއްމު ދިރިއުޅުމު ފެނިއްޖެ އަނިޔާ އާއި ޖަލުގެ ބިރު އޮތް ކަމަށް ކުރާ ތުހުމަތު ވެސް ޗައިނާއިން ދޮގުކުރެ އެވެ.
ހޮންކޮން މައްސަލައިގައި ޖަޕާނުން ބުނީ ރައްޔިތުން ހިތްހަމަނުޖެހޭ އިލެކްޓޯރަލް ނިޒާމާ މެދު ކަންބޮޑުވާ ކަމަށެވެ. ހޮންކޮންގައި ޑިމޮކްރަސީއަށް ގޮވާލައި ބޮޑެތި އެއްވުންތައް ބޭއްވުމުން ޗައިނާއިން އެކަން މަނާކޮށް، ގިނަ އެކްޓިވިސްޓުންނާ މެދު ވަނީ ފިޔަވަޅު އަޅާފަ އެވެ.
މިދިޔަ ޑިސެމްބަރު މަހު ޖަޕާނުން ބުނީ ބެއިޖިން އޮލިމްޕިކްސްއަށް ސަރުކާރުގެ މަންދޫބުން ނުފޮނުވާނެ ކަމަށެވެ. އޭގެ ކުރިން އެމެރިކާ، އިނގިރޭސިވިލާތް، އޮސްޓްރޭލިއާ އަދި ކެނެޑާއިން ވެސް ވަނީ ޑިޕްލޮމެޓިކް ބޮއިކޮޓްއަކަށް ދާނެކަން އިއުލާނުކޮށްފަ އެވެ.
ނަމަވެސް ފެބްރުއަރީ ހަތަރު ވަނަ ދުވަހު ފަށާ މުބާރާތަށް އެ ގައުމުތަކުގެ އެތްލީޓުން ދާނެ އެވެ. ޗައިނާއިން ބުނެފައި ވަނީ އެމެރިކާއިން އިސް ނަގައިގެން ފެށި ބޮއިކޮޓް ކެމްޕެއިންގެ "އަގު ހުޅަނގުގެ ގައުމުތަކުން އަދާކުރަން ޖެހޭނެ" ކަމަށެވެ.
