މަގުއޮޅިފައިވާ "ބޭޑް ބޯއި" އެއް އަހަރެންގެ ޙަޔާތަށް ގެނެސް، އަހަރެންގެ ލޯބީގެ ބާރުގައި އޭނާ އިސްލާޙުކުރާނަމޭ، ޚުދު އަހަރެންވެސް ޅައިރު ހިތަށް އެރި އެވެ. އެހެން ހިތައިގެން އިސްލާހު ކުރާނޭ "ބަސްނާހާ" މީހެއްގެ ފޫބުޑުގައި ހަޔާތުގެ ބޮޑު ބައެއް ބޭކާރުވެސް ކުރީމެވެ. މިކަމުން ލިބުނު ހަމައެކަނި އެދެވޭ ނަތީޖާއަކީ އެކަނިވެރިކަން ފިލުވާލައިދޭނޭ ދެ ދަރީންނެވެ. "ބޭޑް ބޯއި" އެއްގެ "ކޫލް" ކަމުގެ ދިލަ ހޫނު ތަހުރިބާ ކުރަން ޖެހުނީ ޚުދު އަހަރެންނާއި އެ ދެ ކުދިންނަށެވެ. ހިތަށް ކުޅަދާނަ ނުވާ މިންވަރަށެވެ.
މިއަދު އަހަރެންނަށް އެ ތަޖުރިބާތަކުގެ ވާހަކަ، ދުރުތިބީންނެކޭ އެއްފަދައިން ދައްކަން ވަރަށް ފަސޭހަ އެވެ. އެހެންނަމަވެސް އޭރު، އަހަރެންނަށް އެ އަނިޔާތަކުން ރެކޭކަށް ފަސޭހައެއް ނުވި އެވެ. ދެތިން ސަބަބެއް އޮތީމަ އެވެ.
އެއް ކަމަކީ އަހަރެންގެ އަމިއްލަ ޤާބިލިއްޔަތަށް އަހަރެންދިން ކަނު އިތުބާރެވެ. މީގައި އަހަރެން ކުށްވެރިކުރާނީ އިޖުތިމާޢީ ޤަބޫލުކުރުންތަކާއި ޓީވީ ސްކްރީނާއި ވާހަކަފޮތްތަކެވެ. އަބަދުވެސް ބުނާ އަޑު އަހަމަވެ. ހެޔޮލަފާ އަންހެނަކާ ޖެހުނީމާ ކޮންމެ ފިރިހެނެއްވެސް އިސްލާހުކުރެވޭނެ އެވެ. ފުރާވަރުގައި ބެލި އެތައް ފިލްމެއްގައިވެސް އެހެންވެއެވެ. "ތޭރޭ ނާމް"، "އަ ވޯކް ޓު ރިމެމްބަރ" ފަދަ ފުރާވަރުގެ ކުދިންނަށް އަސަރުކުރުވާ ގޮތަށް ހަދާފައި ހުންނަ ފިލްމުތައް ބެލުމަށްފަހު، އަހަރެންވެސް ބޭނުންވީ އެކަހަލަ "ބޭޑް ބޯއި" އެއް ރަނގަޅުކުރާށެވެ. ހެޔޮލަފާ، ޚުލްޤު ހެޔޮ މީހުންގެ ހުށަހެޅުންތައް ބޮލާލާ ޖެހީ، އެމީހުންނަށް އަހަރެންގެ "އިސްލާޙީ ޤާބިލިއްޔަތު" ގެ އެހީ ބޭނުންނުވާނޭކަން އެނގޭތީ އެވެ. އަހަރެން ހީކުރީ އެ ފިލްމުތަކެކޭ އެއްގޮތަށް ލޯބިން ގޮސް، އެމީހުން އިސްލާޙުކުރެވޭނޭ ކަމަށެވެ. ހާދަ ބޮޑު ކުށްހީއެކެވެ. ހާދަ ހިތި ނަތީޖާއެކެވެ. އެހެންނަމަވެސް އެއީ އޭރު އަހަރެން ޤަބޫލުކުރި ޙަޤީޤަތެވެ. މިއަދުވެސް މި ކުށްހީގެ މައްޗަށް ދިރިއުޅުމުގެ ބިންގާ އަޅަން ފައިނަގައިގެން ތިބި އަންހެނުންނަށް މިއީ ދަރުސަކަށް ފުދޭނޭކަމަށް އަހަރެން އުއްމީދުކުރަމެވެ.
ދެވަނަ ކަމަކީ މީހުންގެ ކުރިމަތީ އަހަރެންގެ އަގުވެއްޓިދާނެތީ އަހަރެން ޖެހިލުންވި މިންވަރެވެ. އަހަރެންގެ "އިސްލާޙީ އެޖެންޑާ" ގެ ވަކި ހިސާބަކުން، މި ހެދުނީ ގޯހެއްކަން ޚުދު އަހަންނަށްވެސް އެނގުނެވެ. އެހެންނަމަވެސް، ދެން އަހަރެން އެ ހަޔާތް ތަހައްމަލުކުރީ ދުނިޔޭގެ ލަދަށެވެ. އޭނާ ދޫކޮށްލާފާ ހިނގައްޖެނަމަ، މީހުން ކިޔާނޭ އެއްޗަކާ މެދު އަހަންނަށް ވިސްނުނީ އަހަރެންނާއި ކުދިންނަށް ޖިސްމާނީ އަދި ނަފުސާނީ ގޮތުން ވަމުންދިޔަ އަނިޔާއަށް ވުރެ ދުނިޔޭގެ ލަދުން ރެކުން މުހިއްމުވާ މިންވަރަށެވެ. އަހަރެންގެ ކައިވެނި ރޫޅިއްޖެނަމަ، އާއިލާ އާއި މައިންބަފައިންނަށް މީހުން މަލާމާތްކުރާނެއޭ ހިތަށް އަރުވާފަ އެވެ. އަހަރެންގެ ކެރިއަރަށް އޭގެ ނޭދެވޭ އަސަރުކޮށްފާނެއޭ ހިތަށް އަރާފަ އެވެ. ކިޔަވައިގެން ހުރި، މާލީ ފުދުންތެރިކަން ހުރި މީހަކަށް، އޭނާގެ ފިރިމީހާ އިސްލާޙުނުކުރެވުމުން، އެހެން އަންހެނުންގެ ކުރިމަތީ އަހަރެން ފޭލުވެދާނެއޭ ހިތުލާފަ އެވެ. އެހެން މީހުންވެސް މިފަދަ ކަންކަން ތަހައްމަލުކުރާނެކަމަށް ޔަޤީންކޮށްފަ އެވެ. މިއަދުވެސް މި ފަދަ ޙާލަތެއްގައި ތިބި މީހުންނަށް އިލްތިމާސްކުރެމެވެ. ތިމާގެ ތަޖުރިބާ، އެހެން މީހުންގެ ތަޖުރިބާއާ އަޅައިނުކިޔާށެވެ. ތިމާ އާއި ދަރީންގެ އުފާ، ދުނިޔޭގެ ލަދަށްޓަކައި، ޤުރުބާން ނުކުރާށެވެ. ތިމާއަށް ހެދުނު ގޯސް އެނގުމާއެކު، ލަސް ނުކޮށް، ސަލާމަތްވާށެވެ. ތިމާއަށް ލިބޭނީ ކިހާ ވަގުތެއްކަން އެނގޭނީ ކާކަށް ހެއްޔެވެ؟
ތިން ވަނަ ކަމަކީ ޤާނޫނު ނެގެހެއްޓުމާއި ޢަދުލު އިންސާފުގެ ނިޒާމުތަކަށް އަހަރެން ކުރި އިތުބާރު ކުޑަވުމެވެ. އަހަރެންގެ "ބޭޑް ބޯއި" ދައްކާފައި ހުރި ބިރާއި ދީފައި ހުރި އިންޒާރުތައް އަހަރެންގެ ސިކުނޑީގައި ކަނޑާ ނެގިފައިވާއިރު، އެ ބިރުވެރިކަމުން އަހަރެމެން ހިމާޔަތްކޮށްދޭނޭ ގޮތްފޮތާއި ޤާބިލިއްޔަތު ފުލުހުންނާއި ޢަދުލު އިންސާފުގެ ނިޒާމުގައި ހުރި ކަމާމެދު އަހަރެންގެ އިތުބާރެއް ނެތެވެ. އެއްވެސް މިންވަރަކަށެވެ. އެއަށްވުރެ "ބޭޑް ބޯއި" ގެ ގުރޫޕުކުދިން ވާ ނުފޫޒު ގަދަވެ ބާރުގަދަވާނެކަމާމެދު އަހަރެންގެ އިތުބާރު އެބައޮތެވެ. "ބޭޑް ބޯއި"ގެ އަތުން ވީ އެތައް އަނިޔާއެއްގެ ސީސީޓީވީ ފުޓޭޖު "ނުލިބުން" ފަދަ، އޭނާގެ ބަހަށް ނޫ ޔުނިފޯމުތައް އިތުބާރުކުރާ މިންވަރު އިތުރުވުން ފަދަ، ކޯޓާއި އިމިގްރޭޝަނުގައި އޭނާގެ "ރަޙުމަތްތެރިން" ގިނަވުން ފަދަ އެތައް ސަބަބަކާހުރެ އެވެ. އޭނާގެ ނުފޫޒާ މެދު އޭނާ ކަނޑާ ފޮނި، އެއީ ހޮޅި ވާހަކަ ނޫންކަން އަހަރެންނަށް ޤަބޫލުކުރެވޭތީ އެވެ.
އެނގިހުރި މި ފަދަ މީހުން އިޚުތިޔާރު ކުރާ އަންހެނުން "ބޭޑް ބޯއިޒް" އިޚުތިޔާރުކުރަނީ އަމިއްލައަށެވެ. އެކަމަށް ބާރުދޭ ކޮންމެވެސް ނުފޫޒެއް އެފަދަ އަންހެނުންގެ ހަޔާތުގައި ވާތީއެވެ. އެހެންނަމަވެސް ޤަބޫލުކުރަންޖެހޭ ޙަޤީޤަތަކީ ވަކި ހިސާބަކުން، މިފަދަ ނުބައި މީހުންގެ ވަކިތައް އެ އަންހެނުންގެ ގައިގައި ހިއްޕާލާ ހިސާބުން، އޭނާ ތަޙައްމަލުކުރަންޖެހޭ ޖިސްމާނީ އަދި ނަފުސާނީ އަނިޔާގެ ސަބަބުން، އެ ހާލަތުން ނިކުންނަން އެ މީހުންނަށް ދަތިވާކަމެވެ. މެނިޕިއުލޭޝަން، ގެވެށި އަނިޔާ، ޖިސްމާނީ، ޖިންސީ، ވާބަލް އަނިޔާ އަދި އެފަދަ އަނިޔާ އާއި ދުއްތުރާ ކުރާނޭ ކަމުގެ ބިރުދެއްކުމާއި އިންޒާރު ދިނުމުގެ ތެރޭގައި، އެ ފަދަ ގިނަ ބަޔަކު، މުޅި ޢުމުރުވެސް ހޭދަކުރެ އެވެ. އެއް ބަޔަކު އެ މީހުންނާ ގުޅި، އެމީހުންގެ މަގު އޭނާވެސް އިޚުތިޔާރުކުރަނީ އެވެ. އެހެން މީހުން އެއް އިރެއްގައި އެމީހުންނަށް އެޅުނު ޅައެއްޗެއްގެ ހިތީގައި "ހައްޔަރު"ވެފައި ތިބެނީއެވެ. އެހީތެރިކަމާއި އެއްބާރުލުން ލިބޭ މީހުން، އެ ވަޅުގަނޑުން އަރައިގަނެ، ދިރިއުޅުން އަލުން އާރާސްތުކުރަނީ އެވެ.
