ރާއްޖޭން މަލްޓި ސިސްޓަމް އިންފްލެމޭޓޮރީ ސިންޑްރޯމް އިން ޗިލްޑްރެން (މިސްކް) ޖެހުނު 19 ކުދިން ބަލިން ފަސޭހަވެއްޖެ އެވެ
މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮފް އިމިއުނައިޒޭޝަންގެ ޗެއާޕާސަން އަދި ކުޑަކުދިންގެ ހާއްސަ ޑރ. އަހުމަދު ފައިސަލް ވަނީ އެކަން ކަށަވަރުކޮށްދެއްވައިފަ އެވެ.
މިސްކް އަކީ ކުޑަކުދިންގެ ހަށިގަނޑުގެ އެކި ސިސްޓަމްތަކަށް ޖެހޭ ބައްޔަކަށް ކިޔާ ނަމެކެވެ. މި ބަލި ޖެހުމުން ހަށިގަނޑުގެ އެކި ގުނަވަންތައް ރަތްވެ ދުޅަ އެވެ. މި ބަލީގެ އަލާމާތްތަކުގެ ތެރޭގައި ބަނޑުގައި ރިއްސުން، ލޯ ރަތްވުން ބޭރަށް ހިންގުން، ހޮޑުލެވި ވަރުބަލިވުން، ހަންގަޑުގައި ބިހި ނެގުން، ބޯ އެނބުރުން އަދި ބޮލުގައި ރިހުން ފަދަ ކަންކަން ހިމެނެ އެވެ.
އެ ބަލީގައި މިދިޔަ އަހަރުގެ ފަހުކޮޅު ކުއްޖަކު ވަނީ މަރުވެފަ އެވެ.
"އަޅުގަނޑަށް އެއްކުރެވިފައިވާ މައުލޫމާތުތަކަށް ބަލާއިރު، މި އަހަރާއި، މިދިޔަ އަަހަރު ތެރޭ ޖުމްލަ 19 ކުއްޖަކަށް މި ބަލި ޖެހިފައިވޭ. ބޮޑަށް ރަށްރަށުގެ ކުދިންނަށް ބަލި ޖެހިގެން އައިޖީއެމްއެޗް ފަރުވާ ދިނީ، އެންމެ ފަހު ކުއްޖާ ދޫކޮށްލީ އިއްޔެ،" ފައިސަލް ވިދާޅުވި އެވެ.
އޭނާ ކިޔައިދިން ގޮތުގައި މި ބައްޔަކީވެސް ކޮވިޑް ފަދައިން ދުވަސްކޮޅެއްގެ ތެރޭގައި ރަނގަޅުވާ ބައްޔެކެވެ. ނަމަވެސް ބަލީގެ ނުރައްކާތެރިކަން ބޮޑުވަނީ ލޭގެ ޕްރެޝަރު ދަށްވާ ހިސާބުން ކަމަށް ވިދާޅުވި އެވެ.
ކޮވިޑުން ރަނގަޅުވާތާ މަހެއްހާ ދުވަސް ފަހުންވެސް މި ބަލީގެ އަލާމާތްތައް ފެނެ އެވެ. އެހެންކަމުން މި ބައްޔަކީ ގައިން ގަޔަށް އަރާ ބައްޔެއް ނޫން ކަމުގައި ވިޔަސް، ކޮވިޑުން ރައްކާތެރިވެގެން ކަމަށް ފައިސަލް ނަސޭހަތްތެރިވި އެވެ. އެއީ މި ބައްޔަށް މަގުފަހިވަނީ ކޮވިޑް ޖެހިގެން ކަމަށް ވެފައި، ކޮވިޑަކީ ގައިންގަޔަށް އަރާ ބައްޔަކަށްވާތީ އެވެ.
"ކޮވިޑް މަދުކުރެވިގެން ނޫނީ މި ބައްޔެއް މަދެއް ނުކުރެވޭނެ، މުހިއްމީ ކޮވިޑުން ރައްކާތެރިވުން،" ފައިސަލް ވިދާޅުވި އެވެ.
މިސްކުގެ ސަބަބުން އާންމުކޮށް ގުނަވަންތަކުގެ އިތުރުން ޓިޝޫ ވެސް ދުޅަވެ އެވެ. އަސަރު ކުރާ ބައެއް ގުނަވަންތަކުގެ ތެރޭގައި ކިޑްނީ، ހިތް، ފުއްޕާ ޕޭ، ހަޖަމު ކުރާ ނިޒާމް، ބްލަޑް ވެސެލްސް، ސިކުނޑި، ލޯ އަދި ހަންގަނޑު ހިމެނެ އެވެ.
މިހާތަނަށް މިސްކު ކްލެސިފައި ކުރަނީ ސިންޑްރޯމެއްގެ ގޮތުގަ އެވެ. މާނައަކީ ބައްޔެއްގެ ގޮތުގައި މިސްކު ފާހަގަ ކުރުމުގެ ބަދަލުގައި އެ ސިފަ ކުރަނީ ވަކި ކަމެއް މެދުވެރިވުމުން ފެންނަ އަލާމާތެއްގެ ގޮތުގަ އެވެ. އޭގެ އެއް ސަބަބަކީ މިސްކާ ގުޅޭ ގިނަ މައުލޫމާތު އަދި ވެސް ސައިންޓިސްޓުންނަށް ދަނެގަނެވިފައި ނެތުމެވެ.
މިސްކު ޖެހޭ ކުދިންނަށް ބޭސްކޮށްގެން ވަރަށް އަވަހަށް ފަސޭހަވެ އެވެ. ނަމަވެސް ބައެއް ކުދިންގެ ހާލު ވަރަށް ބޮޑަށް ދެރަވެ، ފުރާނަ ނުރައްކާވާ ހިސާބަށް ވެސް ބަލިބޮޑުވެ އެވެ. އަދި ކުޑަކުދިންގެ އިތުރުން ވަރަށް މަދުން ނަމަވެސް ބޮޑެތި މީހުންގެ ހަށިގަނޑުން ވެސް މިސްކުގެ އަލާމާތްތައް ފެނެ އެވެ.
