އިޒްރޭލުގެ ރައީސް އިސްހާގް ހެރްޒޮގް ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކުރައްވާ ފުރަތަމަ ދަތުރުގައި އާދީއްތަ ދުވަހު އެ ގައުމަށް ވަޑައިގެންފި އެވެ.
އިޒްރޭލާއި ޔޫއޭއީއިން ޑިޕްލޮމެޓިކް ގުޅުން ގާއިމްކުރި ފަހުން އިޒްރޭލުގެ ގިނަ ވެރިންތަކެއް ވަނީ ޔޫއޭއީއަށް ވަޑައިގެންފަ އެވެ.
އާދީއްތަ ދުވަހު ހެނދުނު ޔޫއޭއީގެ ވެރިރަށް އަބޫ ދާބީއަށް ވަޑައިގެން ހެރްޒޮގް އެންމެ ފުރަތަމަ ބައްދަލުކުރެއްވީ އެ ގައުމުގެ ފޮރިން މިނިސްޓަރު ޝެއިހް އަބްދުﷲ ބިން ޒައިދު އަލް ނަހްޔާންއާ އެވެ.
"އިޒްރޭލުގެ ރައީސަކު ޔޫއޭއީއަށް ކުރައްވާ ފުރަތަމަ ދަތުރު އަޅުގަނޑު ފަށައިފިން. އަބޫ ދާބީގައި އަޅުގަނޑުމެންނަށް އަދާކުރި ހޫނު މަރުހަބާއާ މެދު އުފާކޮށް، ޝުކުރު ކުރަން،" ހެރްޒޮގް ޓްވީޓް ކުރެއްވި އެވެ.
އިޒްރޭލާއި ޔޫއޭއީއިން ގުޅުން ގާއިމްކުރީ މީގެ 16 މަސް ކުރިންނެވެ. ޔޫއޭއީއަކީ މިސްރާއި އުރުދުންނަށް ފަހު އިޒްރޭލާ އެކު ގުޅުން ގާއިމްކުރި ތިން ވަނަ އަރަބި ގައުމެވެ.
ފޮރިން މިނިސްޓަރުގެ އިތުރުން ވަލީ އަހުދު ޝެއިހް މުހައްމަދު ބިން ޒައިދް އަލް ނަހްޔާންއާ ވެސް ހެރްޒޮގް ވަނީ ބައްދަލުކުރައްވާފަ އެވެ. އެ ބައްދަލުވުން އޮތީ ޝާހީ ގަނޑުވަރުގަ އެވެ.
ދެ ދުވަހުގެ ދަތުރުގައި ހޯމަ ދުވަހު ހެރްޒޮގް ބައްދަލުކުރައްވާނީ ބޮޑު ވަޒީރު އަދި ޑުބާއީގެ ވެރިޔާ ޝެއިހް މުހައްމަދު ބިން ރާޝިދް އަލް މަހްތޫމްއާ އެވެ.
އޭގެ އިތުރުން ޑުބާއީގައި މިހާރު ކުރިއަށްދާ އެކްސްޕޯ 2020 ޑުބާއީ މައުރަޒަށް ހެރްޒޮގް ވަޑައިގަންނަވާނެ އެވެ. އަދި ޔޫއޭއީގައި ދިރިއުޅޭ ޔަހޫދީ ކޮމިއުނިޓީއާ ވެސް ބައްދަލުކުރައްވާނެ އެވެ.
މި މަހުގެ ކުރީކޮޅު ހެރްޒޮގް ވިދާޅުވީ އިޒްރޭލާއި ޔޫއޭއީގެ ގުޅުމުގެ ސަބަބުން މުޅި މެދުއިރުމައްޗަށް އިންގިލާބެއް އަންނާނެ ކަމަށެވެ.
ދެ ގައުމުން ގުޅުން ގާއިމްކުރި ފަހުން ހޭދަވި އެއް އަހަރުގެ ތެރޭގައި 200،000 އިޒްރޭލް މީހުން ޔޫއޭއީއަށް ދަތުރުކުރި އެވެ. އޭގެ އިތުރުން އިޒްރޭލުގެ 40 އަށް ވުރެ ގިނަ ވިޔަފާރި ޔޫއޭއީގައި ވަނީ ހިންގަން ފަށާފަ އެވެ. އިޒްރޭލާއި ޔޫއޭއީއިން ވަނީ އިގްތިސާދާއި ވިޔަފާރި ކުރިއަރުވަން ގިނަ އެއްބަސްވުންތަކެއްގައި ސޮއިކޮށްފަ އެވެ.
