ޔައުންޑޭ، ކެމަރޫން (ޖެނުއަރީ 31) - އެފްރިކަން ކަޕް އޮފް ނޭޝަންސް (އެފްކޮން)ގައި ރޭ ކުޅުނު ކުއާޓާ ފައިނަލްގެ ފަހު މެޗުގައި އިކުއޭޓްރަލް ގިނީ އަތުން 3-1 އިން މޮޅުވެ، ސެނެގާލުން މުބާރާތުގެ ސެމީ ފައިނަލުގެ ފަހު ޖާގަ ހޯދައިފި އެވެ.
މިއީ އެފްރިކަން ކަޕްގައި 16 ވަނަ ފަހަރު ވާދަކުރާ ސެނެގާލް ޖެހިޖެހިގެން ދެ މުބާރާތުގެ ސެމީ ފައިނަލަށް ދިޔަ ފުރަތަމަ ފަހަރެވެ. މީގެ ކުރިން ސެނެގާލް ޖުމްލަ ފަސް ފަހަރު ސެމީގައި ކުޅުނުއިރު، ދެ ފަހަރު ވަނީ ފައިނަލުން ބަލިވެފަ އެވެ. އެއީ 2002 އާއި 2019 ވަނަ އަހަރު އެވެ.
ސެނެގާލުން ކުޅުނު ދެ ވަނަ ބުރުގެ މެޗުގައި ބޮލަށް ލިބުނު އަނިޔާގެ ސަބަބުން ބަދަލުކުރަން ޖެހުނު ސަޑިއޯ މާނޭ ވަނީ ރޭ އެ ޓީމުގެ ފުރަތަމަ އެގާރައިގައި ކުޅެފަ އެވެ. މެޗު ފަށައިގެން ސެނެގާލަށް ލީޑުނަގައިދޭން އިދްރީސާ ގާނާ ގޭއި ހިލޭ ޖެހުމަކުން ފޮނުވާލި ބޯޅަ ގޯލާ ސީދާނުވެ ދިޔައިރު، މެޗުގެ 28 ވަނަ މިނިޓްގައި ސެނެގާލަށް ލީޑުނަގައިިދނީ ފަމާރާ ޑިއެދިއޯ އެވެ. އޭނާ މި ގޯލު ޖެހީ މާނޭ ނަގައިިދިން ހުރަހަކުންނެވެ.
ދެ ވަނަ ހާފްގެ ކުޅުން ފަށައިގެން މާގިނައިރެއްނުވެ، ސެނެގާލްގެ ކެޕްޓަން ކަލީދޫ ކުލިބާލީ އަތުގައި އޭރިއާތެރެއިން ޖެހުނު ބޯޅައެއްގައި ޕެނަލްޓީ ދޭން ރެފްރީ ނިންމި އެވެ. އެކަމަކު، ފަހުން ވަނީ ވީޑިއޯ އެސިސްޓަންޓް ރެފްރީ (ވީއޭއާރް)ގެ އެހީގައި އެއީ ޕެނަލްޓީ އެއް ނޫން ކަމަށް ނިންމައިފަ އެވެ.
ޕެނަލްޓީ ނުލިބުނު ނަމަވެސް މެޗުގެ 57 ވަނަ މިނިޓްގައި ސެނެގާލްގެ ކީޕަރަކަށް ހުރި އެޑޮއާޑް މެންޑީ ކައިރިން އިކުއޭޓްރަލް ގިނީން ވަނީ ގޯލު ޖަހައި، ނަތީޖާ ހަމަހަމަކޮށްފަ އެވެ. ޕަބްލޯ ގަނެޓް ދިން ބޯޅަ އަކުން އިކުއޭޓްރަލް ގިނީގެ މި ގޯލު ޖެހީ ޖެނިކް ބީލާ އެވެ.
ސެނެގާލުން އަލުން ލީޑުނެގީ މެޗުގެ 68 ވަނަ މިނިޓްގަ އެވެ. ކުޅެން އެރިތާ ތިން މިނިޓް ތެރޭ ޗެއިކޫ ކުޔާޓޭ ޖެހި ވޮލީ އަކުން ސެނެގާލް އަލުން ލީޑުނެގި އެވެ. މެޗު ނިމެން 10 މިނިޓަށް ވެފައި ވަނިކޮށް، ސެނެގާލް މެޗުން މޮޅުކޮށްދިން ގޯލު ޖެހީ ބަދަލެއްގެ ގޮތުގައި ކުޅެން އެރި އިސްމާއިލާ ސާ އެވެ. ސާ މި ގޯލު ޖެހީ އެ ޓީމުގެ ސަލިއޫ ސިސް ދިން ބޯޅައަކުންނެވެ.
ބުދަ ދުވަހު ކުޅޭ ސެމީގެ ފުރަތަމަ މެޗުގައި ސެނެގާލް ބައްދަލުކުރާނީ ބުރްކީނާ ފާސޯއާ އެވެ. އަދި ބުރާސްފަތި ދުވަހު ކުޅޭ ދެ ވަނަ ސެމީގައި މިސްރު ކުޅޭނީ މުބާރާތުގެ ހޯސްޓް ކެމަރޫންއާ އެވެ.
