އިސްލާމިކް ސްޓޭޓް (އައިއެސް) ޓެރަރިސްޓް ގްރޫޕްގެ އަންހެނުންނަށް ހާއްސަ ފައުޖެއް ރާވައި، ލީޑަރުގެ ގޮތުގައި ހަރަކާތްތެރިވި ކަމުގެ ތުހުމަތުގައި އެމެރިކާގެ އަންހެނަކު ހައްޔަރުކޮށް ދައުވާ އުފުލައިފި އެވެ.
އެލިސަން ފްލޫކް އެކްރެން ނަމަކަށް ކިޔާ އަންހެން މީހާއަކީ ކުރިން އެމެރިކާގެ ކަންސަސް ސިޓީގައި ދިރިއުޅުނު މަންމައެކެވެ. ތުހުމަތު ކުރެވޭ ގޮތުގައި އޭނާ ވަނީ އޭކޭ-47 ރައިފަލް ބަޑި އާއި އަމިއްލައަށް މަރުވެގެން ހަމަލާދޭ ޖެކެޓް ބޭނުން ކުރާނެ ގޮތް ސީރިއާގައި އަންހެނުންނާއި ކުޑަކުދިންނަށް ކިޔައިދީފަ އެވެ.
އޭގެ އިތުރުން އެމެރިކާގެ ކޮލެޖް ކެމްޕަހަކަށް މުސްތަގްބަލުގައި ދޭން ރޭވި ހަމަލާއެއްގައި އުޅޭނެ މެމްބަރުން ހޮވައި، ތަމްރީން ކުރި ކަމަށް ވެސް އޭނާއަށް ތުހުމަތު ކުރެވެ އެވެ.
ކުށް ސާބިތުވެއްޖެ ނަމަ އޭނާގެ މައްޗަށް 20 އަހަރުގެ ޖަލު ހުކުމެއް އަންނާނެ އެވެ.
މައްސަލައާ ގުޅޭ ތަފްސީލް ހާމަކުރާ 2019 ވަނަ އަހަރު އެފްބީއައިއިން ތައްޔާރު ކުރި ރިޕޯޓަކުންނެވެ. ދައުވާ އުފުލައި، ޝަރީއަތް ފެށުމުގެ ގޮތުން އެލިސަން އެމެރިކާއަށް ގެންގޮސްފައިވާ އިރު، އެ މައުލޫމާތުތައް އާއްމު ކުރީ ހޮނިހިރު ދުވަހު އެވެ.
ރިޕޯޓުގައިވާ ގޮތުން އައިއެސްގެ އަންހެން މެމްބަރުންނަށް ހާއްސަ ހަތީބާ ނުސައިބާ ފައުޖު ގާއިމްކުރީ 2016 ވަނަ އަހަރު ސީރިއާގެ ރައްގާގަ އެވެ. އޭރު އެ ސިޓީއަކީ އައިއެސް ވެރިކަމުގެ ވެރިރަށެވެ.
އެ ފައުޖުގައި ހިމެނެނީ އައިއެސްގެ ފިރިހެން ހަނގުރާމަވެރިންނާޢި ކައިވެނިކޮށްގެން އުޅުނު އަންހެން މެމްބަރުންނެވެ. އެ ފައުޖުގެ ލީޑަރަކީ އެލިސަން ކަމަށް ތުހުމަތު ކުރެވޭ އިރު، އެ ފައުޖާ ގުޅުނުތާ ދުވަސްކޮޅެއް ފަހުން ހުރިހާ ކަމެއް ރޭވުމުގައި އުޅުނީ އޭނާ ކަމަށް ވެ އެވެ.
އެލިސަންގެ މައިގަނޑު ދައުރަކީ އައިއެސްގެ ދުޝްމަނުންނާ ދެކޮޅަށް އަމިއްލައަށް ދިފާއު ވާނެ ގޮތް އަންހެނުންނަށް ދަސްކޮށްދިނުމެވެ. އެގޮތުން އޭކޭ-47 ރައިފަލް ބަޑި އާއި ގްރެނޭޑާއި އަމިއްލައަށް މަރުވެގެން ހަމަލާދޭ ޖެކެޓް ބޭނުންކުރާނެ ގޮތް ގިނަ އަންހެނުންތަކަކަށް ކާމިޔާބުކަމާ އެކު އޭނާ ދަސްކޮށްދިނެވެ.
އޭގެ އިތުރުން ކުޑަކުދިންނަށް ވެސް ހަތިޔާރު ބޭނުން ކުރަން ދަސްކޮށްދިން ކަމަށް ތުހުމަތު ކުރެވޭ އިރު، އެފްބީއައި ރިޕޯޓުގައި މަންޒަރު ދުށް މީހަކާ ހަވާލަދީ ބުނީ އެލިސަންގެ އުމުރުން ފަހެއް ނުވަތަ ހަ އަހަރުގެ ފިރިހެން ދަރިފުޅު މެޝިން ބަޑިއެއް ހިފައިގެން އުޅުނު ކަމަށެވެ.
