ޕްރަވަލަން މޯލްޑިވްސް ޕްރައިވެޓް ލިމިޓެޑުން ފޯރުކޮށްދިން ހިދުމަތްތަކަކަށް ފައިސާ ނުދީގެން ހުށަހެޅި މައްސަލައަކާ ގުޅިގެން 2.4 މިލިއަން ރުފިޔާގެ ޑިޕޮސިޓެއް ބަހައްޓާފައި ނޫނީ ނުފުރޭ ގޮތަށް އާގު ބޯޓެއް ހިފަހައްޓަން ސިވިލް ކޯޓުން އަމުރުކޮށްފި އެވެ.
އެ ކޯޓުން މިދިޔަ ބުރާސްފަތި ދުވަހު ނެރުނު ވަގުތީ އަމުރެއްގެ ދަށުން ހިފެހެއްޓީ ރާއްޖެ އާއި ޓުޓޮކުރިންއާ ދެމެދު ދުއްވާ "އެމްވީ ޕްރަވަލަން 1" ބަލްކް ކެރިއަރެވެ. ޕެނަމާ ދިދައިގައި ދުއްވާ މި ބޯޓު އޮޕަރޭޓުކުރަނީ އިންޑިއާގެ ޓެމިލް ނާޑޫގައި ގާއިމުވެފައިވާ ޕްރަވަލަން ފްރައިޓް ފޯވާޑާސް ޕްރައިވެޓް ލިމިޓެޑެވެ.
ޕްރަވަލަން ފްރައިޓާ ދެކޮޅަށް މައްސަލަ ހުށަހެޅި ޕްރަވަލަަން މޯލްޑިވްސްއަކީ އެ ކުންފުނީގެ ބޯޓުތަކުން ރާއްޖެއަށް އެތެރެކުރާ މުދަލާއި ބޭރުކުރާ މުދަލުގެ ކަންކަން ބަލަހައްޓާ ލޯކަލް އެޖެންޓެވެ.
ޕްރަވަލަން މޯލްޑިވްސްއިން ސިވިލް ކޯޓަށް ހުށަހެޅި މައްސަލައިގައި އެދުނީ އެ ކުންފުނިން ފޯރުކޮށްދީފައިވާ މުދަލާއި ހިދުމަތުގެ އަގާއި ގެއްލުމުގެ ބަދަލުގެ ގޮތުގައި ޕްރަވަލަން ފްރައިޓުން 160،473.49 ޑޮލަރު (2.4 މިލިއަން ރުފިޔާ) ނަގައި ދިނުމަށާއި، އެ މައްސަލަ ނިމެންދެން މިހާރު ރާއްޖޭގައި އޮތް އެ ކުންފުނީގެ އާގު ބޯޓު ފުރުން މަނާކޮށް އަމުރެއް ނެރެދިނުމަށެވެ.
މި މައްސަލައިގައި ޕްރަވަލަން ފްރައިޓުން ކޯޓަށް ހާޒިރު ނުވާތީ ވަގުތީ އަމުރާ މެދު ގޮތެއް ނިންމީ އެ ކުންފުނީގެ ޣައިރު ހާޒިރުގަ އެވެ.
ދިވެހި ކުންފުނިން އެދުނު ގޮތަށް ސިވިލް ކޯޓުގެ ގާޒީ އަބްދުﷲ އަލީ ނެރެދެއްވި އަމުރުގައި، ބޯޓު ހިފަހައްޓަން ބުރަވީ އެ މައްސަލަ ރައްދުވާ ފަރާތަކީ ރާއްޖޭގައި ރަޖިސްޓްރީކޮށްފައިވާ ގާނޫނީ ޝަހުސަކަށް ނުވާތީ، ހުކުމުން ބޭނުންވާ ނަތީޖާ ނުނެރެވިދާނެތީ ކަމަށް ފާހަގަކުރައްވާފައި ވެއެވެ.
މިގޮތަށް ރަޖިސްޓްރީ ނުކުރާ ބަޔެއްގެ އެ ނޫން މުދަލެއް ނޯންނަ ހާލަތްތަކުގައި އަމަލުކުރަން އޮންނަ ގޮތަކީ ޑިޕޮސިޓް ފައިސާއެއް ބަހައްޓަން އަމުރުކޮށް އުޅަނދު ނުހިފަހައްޓާ ދޫކޮށްލުން ނޫނީ ޑިޕޮޒިޓް ދެއްކުމުން ދޫކޮށްލުމެވެ. ޑިޕޮޒިޓް ބަހައްޓާފައި ނޫނީ ފުރުން މަނާކުރީ، އެ އުޅަނދު ފުރައިގެން ގޮސްފި ނަމަ މައްސަލަ ހުށަހެޅި ފަރާތުގެ ހައްގަކަށް އުނިކަމެއް އަންނާނެކަމަށް މައްސަލަ ބެއްލެވި ގާޒީއަށް ފެނިވަޑައިގަންނަވާތީ އެވެ.
އާގު ބޯޓު ފަހަރު ޓްރެކް ކުރާ އިންޓަނެޓް ވެބްސައިޓް ވެސްލްފައިންޑާއިން ދައްކާ ގޮތުގައި އެންމެ ފަހުން ރިޕޯޓުކޮށްފައިވާ މި ބޯޓުގެ ލޮކޭޝަނަކީ ވިލިމާލެއާ ދިމާލުން ކިލޯމީޓަރެއް ބޭރުގަ އެވެ.
