ނިއު ސްޓާ ސްޕޯޓްސް ކްލަބްގެ ފަރާތުން ކ. މާފުށީގައި އެކެޑަމީއެއް ފަށައިފި އެވެ.
މާފުށީގައި މި އެކެޑަމީގެ މަަސައްކަތް ރަސްމީކޮށް އިއްޔެ ފެއްޓި ހަފްލާ ޝަރަފްވެރި ކޮށްދެއްވީ ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު ހޯދާފައިވާ ކްލަބް ވެލެންސިއާ އަދި ގައުމީ ފުޓްބޯޅަ ޓީމުގެ ތަރި އަލީ ފާސިރު (ސެންޓޭ) އާއި ގައުމީ ޓީމުގެ މިޑްފީލްޑަރު އިސްމާއިލް އީސާ (މެސީ) އެވެ.
މި ރަސްމިއްޔާތުގައި މާފުށީގެ މުއައްސަސާތަކުގެ އިސްވެރިންނާއި ނިއު ސްޓާ ކްލަބްގެ ގިނަ އަދަދެއްގެ މެންބަރުން ވަނީ ބައިވެރިވެފަ އެވެ.
މި އެކެޑަމީ ފެށިިއިރު، 88 ކުދިން ބައިވެރިވެ އެވެ. މިއީ އެ ރަށުގެ ނިސްބަތުން ބަލާއިރު، ތަރުހީބު ބޮޑު އަދަދެކެވެ.
ނިއު ސްޓާ އެކެޑަމީ އިއްޔެ ހުޅުވުމަށް ބޭއްވި ރަސްމިއްޔާތުގެ ތެެރެއިން.-- ފޮޓޯ: އަބްދުﷲ އިރުފާން
އެކަޑަމީ ހުޅުވުމުގެ ރަސްމިއްޔާތުގައި ނިއު ސްޓާގެ ރައީސް އަހުމަދު އަބްދުﷲ ވިދާޅުވީ އެ ކްލަބްގެ ފަރާތުން މާފުށީގައި އެކަޑަމީއެއް ފެއްޓުމުގެ އެންމެ ބޮޑު މަގުސަދަކީ ރަނގަޅު ހަރުދަނާ މުޖްތަމައެއް ބިނާކުރުމަށް ބޭނުންވާ މީހުން ތައްޔާރުކުރުން ކަމަށެވެ.
"ކުޅިވަރަކީ މީހުން ތަރުބިއްޔަތު ކުރުމަށް ބޭނުން ކުރެވޭނެ ރަނގަޅު މަސްދަރެއް.، ކ.މާފުށިން ދިވެހިރާއްޖެ ތަމްޞީލު ކުރާނެ ހުނަރުވެރި ދަރިން ތަކެއް ތައްޔާރު ކުރުމަކީ މި އެކަޑަމީ އުފެއްދުމުގެ މައިގަނޑު އެއް މަގުސަދު،" އަބްދުﷲ ވިދާޅުވި އެވެ.
ނިއު ސްޓާ އެކަޑަމީ ފެއްޓީ ހަމައެކަނި ފުޓްބޯޅަ އަށް އިސްކަންދީގެން ކަމުގައިވީ ނަމަވެސް، ކުރިއަށް އޮތްތަނުގައި މި އެކެޑަމީ އިތުރަށް ފުޅާކުރުމުގެ ވިސްނުން ގެންގުޅެ އެވެ.
ނިއު ސްޓާ އިން އިއްޔެ ފެށި އެކަޑަމީގައި ބައިވެރިވާ ކުދިންތަކެއް.-- ފޮޓޯ: އަބްދުﷲ އިރުފާން.
އެކެޑަމީ ހިންގުން ފަދަ ކޮންމެ ހަރަކާތެއް ނިއު ސްޓާގެ ފަރާތުން ކުރިއަށް ގެންދަނީ ގިނަ ފަރާތްތަކެއްގެ އެހީތަރިކަމާ އެކު ކަމަށާއި އެކަމަށްޓަކައި އެ ހުރިހާ ފަރާތަކަށް ނިއު ސްޓާގެ ފަރާތުން ވަނީ ޝުކުރު އަދާކޮށްފަ އެވެ.
ނިއު ސްޓާ އިން ވަނީ މާފުށީގައި ފުޅާ ދާއިރާއެއްގައި ވިޔަފާރި ކުރަމުން އަންނަ އައިކޮމް ކޮމްޕެނީ ޕްރައިވެޓް ލިމިޓެޑާއި ދަ ގްރާންޑޭ ސްޕޯޓްސް ކްލަބުން ދިން އެއްބާރުލުން ފާހަގަކޮށްފަ އެވެ. ފުރަތަމަ ޑިވިޝަނުގައި ވާދަކުރަމުން އަންނަ ދަ ގްރާންޑޭ ސްޕޯޓްސް ކްލަބް މި ފަހަރު ބިނާވެފައި އޮތީ މާފުށީގެ މެނޭޖްމަންޓަކާއި ގިނަ ޒުވާނުންތަކެއް އެކުލެވިގެންވާ ގޮތަށެވެ.
