ސަހަރާއަށް އަލުން ފަސްއަޅަން ސާފުކުރުމުގެ ތެރޭގައި ހއ. ދިއްދޫ ސަހަރާގައި ހުރި ދުވަސްވީ މަހާނަގާތަކަކަށް ގެއްލުން ލިބިއްޖެ އެވެ.
ދިއްދޫ ސަހަރާގައި ގާތްގަނޑަކަށް 200-300 އާ ދޭތެރޭގޭ އަދަދަކަށް މަހާނަގާތައް ހުރިއިރު އޭގެ ތެރޭގައި އަރަބިން ލިޔެފައި ހުރި މަހާނަގަލާއި ދިވެހި ގަލުވަޑާމުން ޒީނަތްތެރިކުރެވިފައި ހުރި ހިރިގަލުގެ މަހާނަގާތައް ހުއްޓެވެ.
މިކަމާއި ގުޅިގެން ފޭސްބުކްގައި ކަންބޮޑުވުން ފާޅުކުރި މީހަކު އާންމުކޮށްފައިވާ ފޮޓޯތަކުން ފެންނަ ގޮތުގައި، މަހާނަގާތައް ހުރީ ސަހަރާ ސާފުކުރުމަށް ފަހު އެއް ތަނަކަށް ޖަމާކޮށްފަ އެވެ. އޭގެ ތެރެެއިން ބައެއް މަހާނަގަލަށް އެއްވެސް ގެއްލުމެއް ނުލިބޭ ނަމަވެސް، ގިނަ މަހާނަގާތަކަށް އެކިވަރުގެ ގެއްލުން ލިބިފައި އެބަހުއްޓެވެ.
ދިވެހި ތާރީހުގެ މާހިރަކަށް މި ފޮޓޯތައް ދެއްކުމުން އޭނާ ވިދާޅުވީ އެތަނުގައި ހުރި މަހާނަގަލުގެ ތެރޭގައި 50 އަހަރާއި 200 އަހަރާ ދޭތެރޭގެ އަހަރު ވެފައިވާ މަހާނަގާތައް އެބަހުރި ކަމަށެވެ.
ދިއްދޫ ކައުންސިލު ރައީސް އަބްދުﷲ ރަޝީދު މި ނޫހަށް މައުލޫމާތު ދެއްވަމުން ވިދާޅުވި ގޮތުގައި ސަހަރާ ސާފުކުރީ، އެ ރަށުގައި ހުރި ދެ ސަހަރާ ފުރި މީހުން ވަޅުލެވޭނެ ގޮތެއް ނެތިގެންނެވެ.
އާބާދީގައި 4000 އަށް ވުރެ ގިނަ މީހުން އޮންނަ ދިއްދޫ ސަހަރާ ފުރިގެން އެ މައްސަލަ ހައްލުކުރަން އެ ރަށުން މަސައްކަތްކުރާތާ ނުވަ ވަރަކަށް އަހަރު ވެއްޖެ އެވެ.
ހއ. އަތޮޅު ހޮސްޕިޓަލް ވެސް ހުންނަނީ އެ ރަށުގައި ކަމުން ރަޝީދު ވިދާޅުވީ ސަހަރާ ސާފުކުރީ އެ މައްސަލަ ހައްލުކުރުން މުހިންމު ކަމަށް ދެކިގެން ކަމަށެވެ. އަދި ވިދާޅުވީ، ސާފުކުރި ސަހަރާއަށް ފަސް އެޅުމުން އެކަމަށް ދާއިމީ ހައްލެއް ލިބުނީ ކަމަށެވެ.
"މިހާރު މިކޮޅުގައި އިން ދެ ސަަހަރާ ވެސް ހުރީ ފުރިފައި. ދެ ސަހަރާ ފުރިގެެން އެއް ސަހަރާގެ ވެލިއަޅާފަ އިން ބައި ވެސް ފުރިފައި ހުރީ. ދެން އަނެއް ސަހަރާގެ ގާތައް އެއްކޮށް ނަގާ ވެލި ނަގާ ސާފުކުރީ" އޭނާ ވިދާޅުވި އެވެ.
ސަހަރާގައި ހުރި މަހާނަގާތަކާ ގުޅިގެން ރަޝީދު ވިދާޅުވީ އޭގެ ތެރޭގައި ހިރިގަލުގެ ބައެއް ތަކެތި ހިމެނޭތީ އާސާރީ ކަމެއްގައި ބޭނުންކުރަން ބަހައްޓާފައި ހުންނާނެ ކަމަށެވެ.
ދިއްދޫ ސަހަރާގައި ހުރި މަހާނަގާތަކުގެ ތެރޭގައި އާސާރީ ތަކެތި ހިމެނޭތީ، މީހުން ވަނީ އެކަމަށް ފަރުވާލެއް ނެތި ސަހަރާ ސާފުކުރުމާ ގުޅިގެން ކަންބޮޑުވުން ފާޅުކޮށްފަ އެވެ. އަދި ހެރިޓޭޖް މިނިސްޓްރީއަށް މިކަމުގައި ކުރެވޭނެ ކަމެއް ނެތީތޯ ސުވާލު އުފައްދާފަ އެވެ.
ސަގާފީ ތަރިކައިގެ ގާނޫނު ބުނާ ގޮތުން ދަފްތަރުގައި ހިމެނޭ އެއްވެސް ތަރިކައަކަށް ގެއްލުން ދިނުމަކީ މަނާ ކަމެކެވެ.
ނަމަވެސް، މި ސަހަރާ ނޫނީ މި ސަހަރާގައި ހުރި އެއްވެސް ތަނަކީ އާސާރީ ތަރިކައިގެ ދަފްތަރުގައި ނުހިމެނޭ ތަނެއް ކަމުން ގާނޫނީ ގޮތުން މިކަމުގައި އެޅޭނެ ފިޔަވަޅެއް ނޯންނާނެ ކަމަށް މައުލޫމާތު އެނގޭ ބޭފުޅަކު ނަން ނުޖަހާ ގޮތަށް ވިދާޅުވި އެވެ.
ދިއްދޫ ސަހަރާގައި ނޫނީ އެތަނުގައި ހުރި މަހާނަގާތައް ތަރިކައިގެ ދަފްތަރުގައި ނެތް ނަމަވެސް، ސަގާފީ ތަރިކައިގެ ގާނޫނު ބުނާ ގޮތުން އެ މަހާނަގާތައް އުފުލޭ ސަގާފީ ތަރިކައިގެ ޝަރުތުތައް ފުރިހަމަވެ އެވެ. އެ ޝަރުތުތަކަކީ:
- އެ އެއްޗަކީ ފާހަގަކުރެވޭ ސަގާފީ އަގެއް ހުރި އަދި އެ އެއްޗެއް އުފެއްދި ފަހުން 75 އަހަރަށްވުރެ ގިނަ ދުވަސްވެފައިވާ އެއްޗަކަށްވުން؛ ނުވަތަ
- އެ އެއްޗެއްގެ އުމުރުން ގިނަ ދުވަސްތަކެއް ނުވިނަމަވެސް، އެ އެއްޗެއްގައި ފާހަގަކުރެވޭ ސަގާފީ އަގެއް ހުރުން.
ރަށްރަށުގައި ހުންނަ އާސާރުތައް މި ދަފްތަރުގައި ހިމަނަން ލޯކަލް ކައުންސިލްތަކުން ހުށަހަޅަން ގާނޫނުން ތަންދެ އެވެ. ނަމަވެސް މިތަންތަން ތަރިކައިގެ ދަފްތަރުގައި ހިމަނާކަށް ހުށަނާޅަ އެވެ.
