އިދިކޮޅު ޕީޕީއެމްއަށް 2023 ގައި ބާއްވާ ރިޔާސީ އިންތިހާބު ކާމިޔާބުކުރެވިއްޖެ ނަމަ، ސަރުކާރު ވަޒީފާތައް ދޭނީ ހަމައެކަނި އެ ޕާޓީއަށް ނިސްބަތްވާ މެމްބަރުންނަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީޕީއެމްގެ ލީޑަރު މިފަދައިން ވިދާޅުވީ އެ ޕާޓީގެ ޓިކެޓުގައި ރަައްޔިތުން މަޖިލީހުގެ ކޮމަންޑޫ ދާއިރާއަށް ވާދަކުރާ މޫސާ ފަތުހީއަށް ތާއީދު ހޯދުމަށްޓަކައި، މާލޭގައި ދިރިއުޅޭ އެ ދާއިރާއަށް ނިސްބަތްވާ ރައްޔިތުންނާ އެކު ރޭ ހެންވޭރު ލެވެންޑާ ރެސްޓޯރެންޓުގައި ބޭއްވި ބައްދަލުވުމުގެ ތެރެއިންނެވެ.
އަންނަ މަހުގެ ފަސްވަނަ ދުވަހު އޮންނަ ބައި އިލެކްޝަންގައި ފަތުހީއަށް ވޯޓު ދެއްވުމަށް އެދިވަޑައިގެން ޔާމީން ވިދާޅުވީ 2023 ގައި އެމަނިކުފާނު ވެރިކަމަށް އިންތިހާބުވެއްޖެ ނަމަ އެހެން ޕާޓީތަކުގެ މެމްބަރުންނަށް ސަރުކާރު ވަޒީފާތަކުގެ ފުރުސަތު ނުދޭނެ ކަމަށެވެ.
"2023 ގައި އަޅުގަނޑުމެންގެ ސަރުކާރެއް، ރައްޔިތުންގެ ކަންތައްތައް ކުރުމަށް ފަހިވެގެން ހިނގައްޖެ ކަމަށް ވަންޏާ، ހިންގާ ސަރުކާރުގެ ކުންފުނިތަކުގެ ވަޒީފާތައް ކަމަށްވިޔަސް އަދި މުއައްސަސާތަކުގެ ވަޒީފާތައް ކަމަށް ވިޔަސް، މި ތަންތަނަށް (ސަރުކާރު ވަޒީފާތަކަށް) އަޅުގަނޑުމެން ނަގާނީ ޕީޕީއެމްގެ ކުދިން. އެހެން ބަޔަކަށް ޖާގައެއް ނޯންނާނެ. އަދި އޭގެން ޖާގަ ދޭނަން މިހާރު އަޅުގަނޑުމެންނާ އެކު މަސައްކަތްކުރާ މީހުނަށް،" ޔާމިން ވިދާޅުވި އެވެ.
މީގެ އިތުރުން ޕީޕީއެމްގެ ސިޔާސީ ހަރަކާތްތަކުގައި ބައިވެރިވުމުގެ ސަބަބުން ވަޒީފާ ގެއްލުނު މީހުންނަށް އެމަނިކުފާނަށް ދެވަނަ ފަހަރަށް ވެރިކަމަށް އާދެވިއްޖެ ނަމަ، އެ މީހުންގެ ވަޒީފާތައް އިއާދަކުރުމަށްފަހު ކުރިން ތިބި މަގާމަށްވުރެ ބޮޑު މަގާމެއް ދޭނެ ކަމަށް ވެސް ރޭ ބޭއްވި ޖަލްސާގައި ޔާމީން ވައުދުވެވަޑައިގަތެވެ.
އެމަނިކުފާނު މިވާހަކަތައް ދެއްކެވީ އެމްޑީޕީގެ ކެންޑިޑޭޓަށް ތާއީދު ހޯދުމަށް، ޖުމްހޫރީ ޕާޓީގެ ލީޑަރު، ގާސިމް އިބްރާހިމް ފޯކައިދޫއަށް ވަޑައިގެން ދެއްކެވި ވާހަކަތަކަށް ފާޑު ވިދާޅުވަމުންނެވެ. އެއީ އާސަންދަ ލިބޭނީ ވަކި ފިކުރެއްގެ ބަޔަކަށް ކަމަށް ދޭހަވާ މޭރުމަކުން ގާސިމް ދެއްކެވި ވާހަކައަށް އިޝާރާތް ކުރައްވަމުންނެވެ.
"ސިޔާސީ ގޮތުން މިހާ ވާދަވެރިިކޮށް ގޮސްފައިި، މިހާ އަނިޔާވެރިކޮށް ތިބި ބަޔަކު ރައްޔިތުންނާ މެދު އަމަލު ކުރަމުންދާއިރު އަޅުގަނޑުމެން އެބަ ޖެހޭ އެބަޔަކު މިނާ ނާޅިއަކުން މިނެލަން،" ޕީޕީއެމްގެ ވެރިކަމެއްގައި ސަރުކާރު ވަޒީފާތަކުގެ ފުރުސަތު އެހެން ޕާޓީތަކުގެ މެމްބަރުންނަށް ނުދޭނެކަން ފާހަގަކުރައްވަމުން ޔާމީން ވިދާޅުވި އެވެ.
ވަކި ސިޔާސީ ފިކުރަކަށް ތާއީދުކުރުމުން ސަރުކާރުގެ ވަޒީފާ ނުގެއްލޭނެ ކަމަށާއި، ހަމަހަމަކަމާއި އެކު ކޮންމެ ފިކުރެއްގެ މީހަކަށް ވެސް ވަޒީފާގެ ފުރުސަތު ދޭން ރައީސް ޔާމީން 2018 ވަނަ އަހަރު ބޭއްވި ރިޔާސީ އިންތިހާބަށް ކުރި ކެމްޕެއިންގެ ތެރެއިން ވައުދުވި އެވެ. އަދި ވަޒީފާގެ ބިރުވެރިކަން އޮތީ އެމަނިކުފާނުގެ ސަރުކާރުގައި ނޫން ކަމަށާއި، އެ ބިރުވެރިކަން އޮތީ މިހާރުގެ ސަރުކާރުގައި ކަމަށް އިންތިހާބުން ނާކާމިޔާބުވުމަށްފަހު 2019 ވަނަ އަހަރު މ. އަތޮޅަށާއި ފ. އަތޮޅުގެ ބައެއް ރަށްތަކަށް ކުރެއްވި ދަތުރުފުޅުގެ ތެރެއިން ވިދާޅުވެފައިވެ އެވެ.
