ވޮޝިންޓަން، އެމެރިކާ (ޖެނުއަރީ 29) - އިރުމަތީ ޔޫރަޕްގައި ނޭޓޯގެ ބާރު ވަރުގަދަ ކުރަން ވަރަށް އަވަހަށް އެމެރިކާގެ ސިފައިން ފޮނުވާނެ ކަމަށް ރައީސް ޖޯ ބައިޑެން ވިދާޅުވެއްޖެ އެވެ.
ބައިޑެން އެހެން ވިދާޅުވި އިރު، ރަޝިއާއިން ޔޫކްރެއިން ހިފަން އުޅޭ ކަމަށް ހުޅަނގުގެ ގައުމުތަކުން ތުހުމަތުކޮށް، އިރުމަތީ ޔޫރަޕްގެ މަޝްރަހު ވަނީ ވަރަށް ބޮޑަށް ހޫނުވެފަ އެވެ.
"އިރުމަތީ ޔޫރަޕާއި ނޭޓޯގެ ގައުމުތަކަށް ވަރަށް އަވަހަށް ސިފައިން ފޮނުވާނަން. އެއީ މާ ބައިވަރު ސިފައިންނެއް ނޫން،" ބައިޑެން ނޫސްވެރިންނަށް ވިދާޅުވި އެވެ.
ހުޅަނގު ޔޫރަޕްގެ ގައުމުތަކުގައި މިހާރު ވެސް އެމެރިކާގެ އެތައް ހާސް ސިފައިން އެބަ ތިއްބެވެ. ނަމަވެސް ޕެންޓަގަން އިން މިހާރު މަސައްކަތް ކުރަނީ އިރުމަތީ ޔޫރަޕަށް ވެސް ސިފައިން ފޮނުވުމަށެވެ.
މި ހަފްތާގައި ޕެންޓަގަންގެ ތަރުޖަމާން ޖޯން ކާބީ ވިދާޅުވީ ނޭޓޯއަށް އެހީވާން ދާން ޖެހިދާނެ ކަމަށް ބަލައި 8،500 ސިފައިން ތައްޔާރީ ހާލަތުގައި އެބަ ތިބި ކަމަށެވެ.
ޔޫކްރެއިނަކީ ނޭޓޯގެ މެމްބަރު ގައުމެއް ނޫނެވެ. ނަމަވެސް ރަޝިއާއިން ޔޫކްރެއިނަށް ހަމަލާ ދީފި ނަމަ، އަވައްޓެރި ގައުމުތަކުގެ ތެރޭގައި ހިމެނޭ ނޭޓޯގެ މެމްބަރުންނަށް ވެސް ހަނގުރާމަ ކުރިމަތިވާނެ ކަމަށް އެމެރިކާއިން ދެކެ އެވެ.
ރަޝިއާއިން ތަކުރާރުކޮށް ބުނަމުން ދަނީ ޔޫކްރެއިނަށް ހަމަލާދޭން ނޫޅޭ ކަމަށެވެ. ނަމަވެސް ރަޝިއާ އާއި ޔޫކްރެއިން ގުޅޭ ބޯޑަރު ކައިރީގައި 100،000 ރަޝިއާ ސިފައިން އެބަ ތިއްބެވެ.
ރަޝިއާއިން ޑިމާންޑް ކުރަނީ ޔޫކްރެއިނަށް ނޭޓޯގެ މެމްބަރުކަން ނުދިނުމަށެވެ. މިދިޔަ ހަފްތާގައި ބައިޑެން ވިދާޅުވީ ރަޝިއާއިން ޔޫކްރެއިނަށް ހަމަލާދީފި ނަމަ، ރައްދުގައި އަޅާނީ ރަޝިއާއިން ނޭދޭ ފިޔަވަޅެއް ކަމަށެވެ.
"ޕޮލޭންޑާއި ރޮމޭނިއާ އަދި އެހެން ގައުމުތަކުގައި ސިފައިން އިތުރު ކުރާނަން. އެއީ މިހާރު ވެސް ނޭޓޯގެ މެމްބަރު ގައުމުތައް،" ބައިޑެން ވިދާޅުވި އެވެ.
