މާލެއިން ގޯތި ބޭނުންވާ މީހުންގެ ދަފުތަރެއް އެކުލަވައިލުމަށް މާލޭ ސިޓީ ކައުންސިލުން ނިންމައިފި އެވެ.
މާލޭ ސިޓީ ކައުންސިލުގެ ހަތަރު ވަނަ ދައުރުގެ 37 ވަނަ ޖަލްސާގައި ހުޅުމާލެ ދާއިރާގެ ކައުންސިލަރު އިބްރާހީމް ޝުޖާއު ހުށަހެޅުއްވީ މާލޭގައި ކުދި ބިންތައް ހުރި މީހުން އެ ބިންތައް ދޫކޮށްލުމާއެކު މާލެ ސިޓީން ދޫކުރާ ގޯއްޗަށް ކުރިމަތިލުމުގެ ފުރުސަތު ހުޅުވައިލާ އެކަމަށް ބޭނުންވާ މީހުންނަށް މާލެ ސިޓީ ކައުންސިލުން އޮންލައިން ޕޯޓަލެއް ގާއިމުކުރުމަށެވެ.
އެކަމާ ގުޅިގެން މާލޭ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވީ، ލާމަރުކަޒީ ގާނޫނުގައިވާ ގޮތުން ގައުމީ އިދާރާތަކުން މާލެ ސިޓީގެ އިހްތިސޯސްގައިވާ ސަރަހައްދެއްގައި އެއްވެސް މަޝްރޫއެއް ހިންގަންވާނީ ސިޓީ ކައުންސިލާ މަޝްވަރާކުރުމަށް ފަހުގައި ކަމަށެވެ.
މާލޭގައި ހުރި ގޯތި ދޫކޮށްލުމަށްފަހު ހުޅުމާލެއިން ގޯތި ދޫކުރާނަމަ ބޭނުންވާ ކަމަށް އެދި ރައްޔިތުންގެ ތެރެއިން ބައެއް މީހުން މޭޔަރަށް ސިޓީ ހުށަހަޅާފައިވާކަން މުއިއްޒު ފާހަގަކުރެއްވި އެވެ. އެހެންކަމުން ސަރުކާރުން އެފަދަ ފުރުސަތެއް ހުޅުވާލާއިރު މާލޭގެ ރައްޔިތުންގެ ގެދޮރުވެރިކަމާ ގުޅޭ ދަފުތަރެއް އެކުލަވައިލެވިފައި އޮތުމުން ކަންކަން ތަންފީޒުކުރަން ސަރުކާރަށް ވެސް ފަސޭހަވާނެ ކަމަށް މުއިއްޒު ވިދާޅުވި އެވެ.
މާލޭ ސިޓީން ގޯތި ބޭނުންވާ މީހުންގެ ދަފުތަރު އެކުލަވައިލުމަށް ހުށަހެޅުނު ހުށަހެޅުން ފާސްވީ ޖަލްސާގައި ބައިވެރިވި 16 ކައުންސިލަރުންގެ އިއްތިފާގުންނެވެ.
