އެމެރިކާގެ ފަރާތުން ރާއްޖެއަށް އެހީތެރިވުމުގެ ގޮތުން 210600 ޑޯޒްގެ ފައިޒާ ވެކްސިން މިއަދު ހަދިޔާކޮށްފި ކަމަށް ހެލްތް މިނިސްޓްރީން ބުނެފި އެވެ.
ވެކްސިން ގްލޯބަލް އެކްސެސް (ކޮވެކްސް) މެދުވެރިކޮށް ރާއްޖެއަށް މިއަދު ވަނީ މި ވެކްސިން ޑޯޒްތަކުގެ އިތުރުން ވެކްސިން ޖެހުމަށް ބޭނުންވާ ސިރިންޖުވެސް ލިބިފައި ކަމަށް އެ މިނިސްޓްރީން ހާމަކުރި އެވެ.
މިއަދު ގެނައި މި ޝިޕްމެންޓާ އެކު އެމެރިކާއިން ރާއްޖެއަށް ފޯރުކޮށްދީފައިވާ ވެކްސިން ޑޯޒްގެ އަދަދު 440000 އަށް އަރާނެ އެވެ. ފައިޒާ ވެކްސިންގެ އިތުރުން އެމެރިކާއިން މިހާތަނަށް ހަތް މިލިއަން ޑޮލަރުގެ އެމާޖެންސީ ސަޕްލައި ވެސް ރާއްޖެއަށް ފޯރުކޮށްދީފައިވެ އެވެ.
މީގެ ތެރޭގައި 60 ވެންޓިލޭޓަރާއި، 100000 ރެޕިޑް ޑައެގްނޯސްޓިކް ޓެސްޓް ކިޓް ހިމެނެ އެވެ.
"ޕެންޑެމިކްގެ ތިންވަނަ އަހަރަށް އަޅާއިރު، ވައިރަހާ ދެކޮޅަށް ގުޅިގެން ކުރަމުންގެންދާ މަސައްކަތް ކުރިއަށް ގެންދަންޖެހޭ. އެމެރިކާއިން މި ދަނީ (ރާއްޖެވެސް ހިމެނޭގޮތަށް) 120 ގައުމަކަށް ވެކްސިން ފޯރުކޮށްދީ މި ބަލިމަޑުކަމުގެ އިގްތިސާދީ އަދި އިޖްތިމާއީ ގެއްލުން ކުޑަކުރުމަށް މަސައްކަތް ކުރަމުން," އެމެރިކާ އެމްބަސީގެ ޗާޖޭ ޑީ އެފެއާޒް މާޓިން ކެލީ ވިދާޅުވި އެވެ.
ކުއްލި ހާލަތުގައި ބޭނުންކުރާނެ ޕާސަނަލް ޕްރޮޓެކްޓިވް އިކުއިޕްމެންޓުގެ ތެރެއިން 32000 ކޭ.އެން95 މާސްކާއި، 4000 ޕްރޮޓެކްޓިވް ގޮގްލްސް، 316000 އަންގި އެމެރިކާއިން މިހާތަނަށް މިނިސްޓްރީ އޮފް ހެލްތްއަށް ހަދިޔާކޮށްފައިވެ އެވެ.
އަލަށް މި ލިބުނު ވެކްސިން ޝިޕްމެންޓާއެކު ރާއްޖޭގައި މިހާރު އާންމުންނަށް ދެމުން ގެންދާ ބޫސްޓާ ޑޯޒްގެ ޝޮޓްތައް ޖެހުން މެދުކެނޑުމެއް ނެތި ކުރިއަށް ދާނެކަމަށް އެޗްޕީއޭއިން ހާމަކުރި އެވެ.
މިހާތަނަށް 62402 މީހުން ވެކްސިންގެ ބޫސްޓާ ޑޯޒް ޖަހާފައިވެ އެވެ. އަދި ރާއްޖޭގައި ވެކްސިންގެ ދެ ޑޯޒް ފުރިހަމަކޮށްފައިވާ މީހުންގެ އަދަދު މިހާރު ވަނީ 369551 އަށް އަރާފަ ކަމަށް އެޗްޕީއޭގެ ތަފާސްހިސާބުތަކުން ދައްކަ އެވެ.
