ރަފާހް، ފަލަސްތީން (ޖެނުއަރީ 26) - ފަލަސްތީނުގެ ރައީސް މަހްމޫދު އައްބާސްއާ ވާދަވެރި ލީޑަރުގެ ފަރާތުން ގާޒާއަށް ކޮވިޑް ވެކްސިންގެ އެއް މިލިއަން ޑޯޒް ފޮނުވައިފި އެވެ.
މުހައްމަދު ދަހްލަން މިހާރު ޔޫއޭއީގައި ދިރިއުޅެމުން ދަނީ ފަލަސްތީނުން އަރުވާލާފައި ވާތީ އެވެ. އޭނާ ގާޒާއަށް ވެކްސިން ފޮނުވީ ޔޫއޭއީ އިންނެވެ.
ގާޒާއަށް އުފަން ދަހްލަން އަކީ ކުރިން ފަލަސްތީން ސަރުކާރުގެ އޮފިޝަލެކެވެ. އޭނާ ވަނީ މަހްމޫދް އައްބާސްގެ ސަރުކާރުން ގާޒާއަށް ކަނޑައަޅާފައި ހުންނަ ސެކިއުރިޓީ ޗީފްގެ މަގާމު 2007 ވަނަ އަހަރުގެ ކުރިން އަދާކޮށްފަ އެވެ.
ދެހާސް ހަތް ވަނަ އަހަރަށް ފަހު ގާޒާގައި ވެރިކަން ކުރަނީ ހަމާސް ޖަމާއަތުންނެވެ. ނަމަވެސް ފަލަސްތީނުގެ އެހެން ހިސާބުތަކުގައި ވެރިކަން ކުރަނީ މަހްމޫދް އައްބާސްގެ ފަތަހް ޖަމާއަތުންނެވެ.
ގާޒާ ހެލްތު މިނިސްޓްރީގެ ތަރުޖަމާނު މަހްމޫދު ހައްމާދް ނޫސްވެރިންނަށް ވިދާޅުވީ ރަޝިއާއިން އުފެއްދި ސްޕަޓްނިކް ވީ ކޮވިޑް ވެކްސިންގެ އެއް މިލިއަން ޑޯޒް ލިބިފައިވާ ކަމަށެވެ.
އެއީ އިޒްރޭލުން ވަށައި ބަންދުކޮށްގެން އުޅޭ ގާޒާއަށް މިހާތަނަށް ލިބުނު ކޮވިޑް ވެކްސިންގެ އެންމެ ބޮޑު ޝިޕްމަންޓެވެ. އެ ޝިޕްމަންޓް ގާޒާއަށް އެތެރެކުރީ މިސްރާއި ގާޒާއާ ދެމެދު އޮންނަ ރަފާހް ކްރޮސިން އިންނެވެ.
މީގެ ކުރިން ވެސް ދަހްލަން ހަމަޖައްސައިދިން ކޮވިޑް ވެކްސިންގެ ކުދި ޝިޕްމަންޓްތަކެއް އެ ކްރޮސިން މެދުވެރިކޮށް ގާޒާއަށް އެތެރެކޮށްފައިވެ އެވެ.
މިދިޔަ އަހަރު ބާއްވަން ތާވަލް ކުރި ފަލަސްތީން އިންތިހާބުގެ މައި ކެންޑިޑޭޓެއްގެ ގޮތުގައި ދަހްލަން ފެންނާނެ ކަމަށް އޮތީ ބެލެވިފަ އެވެ. ނަމަވެސް ފަލަސްތީން ސަރުކާރުން ވަނީ މުއްދަތެއް ނެތް ގޮތަށް އިންތިހާބު ފަސްކޮށްފަ އެވެ.
ގާޒާ ހެލްތް މިނިސްޓްރީގެ ޕްރިވެންޓިން މެޑިސިންގެ ވެރިޔާ މަގްދީ ދުހައިރް ވިދާޅުވީ ހަލުވިކަމާ އެކު ފެތުރޭ އޮމިކްރޯން ވޭރިއެންޓްގެ ސަބަބުން އެ ތަނުގެ ސިއްހީ ނިޒާމަށް ބާރު ބޮޑުވެފައިވާ ކަމަށެވެ.
ގާތްގަނޑަކަށް 2.3 މިލިއަން މީހުން ދިރިއުޅޭ ގާޒާއިން މިހާތަނަށް 196،578 ކޮވިޑް ކޭސް ރިޕޯޓުކޮށްފައިވެ އެވެ. އެ ބަލީގައި ގާޒާއިން 1،744 މީހުން މަރުވެފައި ވާއިރު، ވެކްސިންގެ ދެ ޑޯޒް ޖަހާފައިވަނީ 578،000 މީހުންނެވެ.
