ރާމަﷲ، ފަލަސްތީން (ޖެނުއަރީ 25) - ފަލަސްތީނުގެ ކުރީގެ ރައީށް ޔާސިރް އަރަފާތުގެ ކާޓޫން އާޓްވޯކަކުން އެމަނިކުފާނަށް މަލާމާތް ރައްދުވާ ކަމަށް ތުހުމަތު ކުރަން ފެށުމުން، މިޔުޒަމަކުން އެ ތަކެތި ނަގައިފި އެވެ.
އިޒްރޭލުން ގާނޫނާ ހިލާފަށް ހިފައިގެން އުޅޭ ހުޅަނގު އައްސޭރީގެ ރާމަﷲ ސިޓީގައި ހުންނަ ޔާސިރް އަރަފާތު މިޔުޒިއަމްގައި ބެހެއްޓި އާޓްވޯކްގައި 35 ކާޓޫން ހިމެނެ އެވެ. މިދިޔަ އާދީއްތަ ދުވަހު އެ އާޓްވޯކް ބެހެއްޓުމާ އެކު ފާޑުކިޔުން އަމާޒުވި އެވެ.
ކާޓޫންތަކުގެ ފޮޓޯއެއް ޝެހާބް ނިއުސް އެޖެންސީން އާއްމުކޮށްފައިވާ އިރު، އޭގެން ފެންނަނީ ޔާސިރް އަރަފާތުގެ ނޭފަތާއި އަނގަ އާދަޔާ ހިލާފަށް ބޮޑުކޮށް ކުރަހާފައި ވަނިކޮށެވެ.
ދެހާސް ހަތަރު ވަނަ އަހަރު އަވަހާރަވި ޔާސިރް އަރަފާތުގެ ސަޕޯޓަރުން ޓްވިޓާގައި އެމަނިކުފާނުގެ ފޮޓޯތައް އާއްމު ކުރަމުން ބުނީ "އަހަރުމެން ދަންނަ ޝަހުސިއްޔަތަކީ މިއީ" ކަމަށެވެ.
އެ ފޮޓޯތައް މިޔުޒިއަމްގައި ބެހެއްޓުނު ގޮތާ ގުޅޭ ތަހުގީގެއް ހިންގަން ފަތަހް ޖަމިއްޔާގެ އެކްޓިވިސްޓުން އަންނަނީ ބާރު އަޅަމުންނެވެ. ފަތަހް އަކީ ޔާސިރް އަރަފާތު އުފެއްދެވި ޖަމިއްޔާ އެކެވެ.
މިޔުޒިއަމުން ނެރުނު ބަޔާނެއްގައި އާޓްވޯކް ދިފާއު ކުރުމަށް ފަހު ބުނީ އެއީ ފަލަސްތީނުގެ މަގްބޫލް ލީޑަރުގެ ސިފަ ރަމްޒުކޮށްދޭ އާޓިސްޓިކް މަސައްކަތެއް ކަމަށެވެ.
ނަމަވެސް އަންގާރަ ދުވަހު މިޔުޒިއަމްގެ ތަރުޖަމާނު ބުނީ އެ އާޓްވޯކް އެ ތަނުގައި ޑިސްޕްލޭ ނުކުރަން ނިންމާފައިވާ ކަމަށެވެ. ފަލަސްތީނުގެ ލީޑަރުން ވެސް ވަނީ އެ އާޓްވޯކް އާއްމު ކުރުމުން ފާޑުކިޔާފަ އެވެ.
