ގްރޭޓާ މާލެ ސަރަހައްދުގެ ހުރިހާ ރަށްތަކެއް ގުޅާލަން ހިންގާ މާލެ-ތިލަފުށި ބްރިޖުގެ މަސައްކަތް ފެށުމުގެ ކުރިން ފުރިހަމަކުރަން ޖެހޭ ޖިއޯޓެކްނިކަލް ސާވޭގެ އަމަލީ މަސައްކަތް އިންޑަސްޓްރިއަލް ވިލެޖު ސަރަހައްދުގައި ފަށައިފި އެވެ.
މި ސާވޭ ކުރަނީ ބްރިޖުގެ މަސައްކަތް ކުރާ އިންޑިއާގެ އެފްކޮންސް ކުންފުނިންނެވެ. އަދި ސާވޭގެ ބޭނުންމަށް އެ ކުންފުނިން ދަނީ އެ ސަރަހައްދުގެ ވެލިގަނޑާއި ބިމު އަޑީގެ ސާމްޕަލްތައް ނަގަމުންނެވެ. މިއީ ބްރިޖު އަޅާ ސަރަހައްދުގެ ބިމުގެ ހާލަތު ވަޒަންކުރަން ކުރާ ސާވޭއެކެވެ.
ގާތްގަނޑަކަށް 7.7 ބިލިއަން ރުފިޔާ ހޭދަވާނެ ކަމަށް ލަފާކުރެވޭ މި ބްރިޖު މަޝްރޫއަކީ މިހާތަނަށް ރާއްޖޭގައި ހިންގޭ އެންމެ ބޮޑު އުމްރާނީ ތަރައްގީގެ މަޝްރޫއެވެ.
މާލެ-ތިލަފުށި ބްރިޖުގެ ބިޔަ މަޝްރޫއަށް ހަރަދުކުރަނީ އިންޑިއާ އެގްޒިމް ބޭންކުން ހަމަޖެހިފައިވާ 400 މިލިއަން ޑޮލަރުގެ ކްރެޑިޓް ފެސިލިޓީންނާއި އެ ގައުމުގެ ސަރުކާރުން ފޯރުކޮށްދޭ 100 މިލިއަން ޑޮލަރުގެ ހިލޭ އެހީންނެވެ.
މާލެ-ތިލަފުށި ބްރިޖު މަޝްރޫން މާލެ އާއި، ވިލިމާލެ އާއި، ގުޅިފަޅާއި، ތިލަފުށި އެއްގަމުން ގުޅާލާނެ އެވެ.
މި ރަށްތައް ގުޅާލަން އަޅާ ބްރިޖާއި ކޯސްވޭ އަދި މަގުތަކުގެ ނެޓްވާކުގެ ދިގުމިނުގައި 6.7 ކިލޯމީޓަރު ހުންނާނެ އެވެ. މި ލިންކުގެ ބައިތަކުގެ ތެރޭގައި ތިން ބްރިޖާއި، ދެ މަގާއި، ކޮންމެ ރަށަކަށް އަރާ ފޭބުމަށް އިންޓަޗޭންޖް ޕޮއިންޓްތަކާއި، ޕާކިން ސަރަހައްދުތައް ގާއިމު ކުރެވޭނެ އެވެ.
މި ތިން ބްރިޖަކީ 12 މީޓަރު އުސް މިނުގައި ކޮންމެ ކަނޑުއޮޅިއެއްގައި ގާއިމު ކުރެވޭ 70 މީޓަރު ފުޅާ ބްރިޖްތަކެކެވެ. އަދި، ކޮންމެ ބްރިޖެއްގެ ދަށުން ކަނޑު އުޅަނދުފަހަރަށް ދަތުރުކުރެވޭ ގޮތަށް ނެވިގޭޝަން ބްރިޖް ބައެއް ހުންނާނެ އެވެ.
މި މަޝްރޫއުގެ މަސައްކަތް ކުރިޔަށްދަނީ ދެ ބަޔަކަށް ބަހާލައިގެންނެވެ.
އެގޮތުން ފުރަތަމަ ބައިގައި ހިމެނެނީ މާލެއިން ގުޅީފަޅަށް ގުޅާލުމެވެ. މި މަސައްކަތް 27 މަސް ދުވަހުގެ ތެރޭގައި ނިންމާލެވޭނެ ކަމަށް ލަފާކުރެވެ އެވެ. ދެވަނަ ބައިގައި ހިމެނެނީ ތިލަފުށިން ގުޅިފަޅަށް ގުޅާލުމެވެ. މި މަސައްކަތް ނިންމަން 32 މަސް ހޭދަވާނެ އެވެ.
ބަހާލައިގެން ކުރިޔަށް ގެންދިޔަ ނަމަވެސް މި ދެބައިގެ މަސައްކަތް ފަށާނީ އެއްފަހަރާ އެވެ.
