ޓިއުރިން، އިޓަލީ (ޖެނުއަރީ 26) - އާސެނަލް އިން ގަންނަން މަސައްކަތްކުރި ފިއޮރެންޓީނާގެ ޒުވާން ފޯވާޑް ޑޫސަން ވްލަހޮވިޗް އިޓަލީގެ ޔުވެންޓަސް އަށް ބަދަލުވާން ނިންމާފައިވާ ކަމަށް މީޑިއާ ރިޕޯޓްތައް ބުނެފި އެވެ.
ވްލަހޮވިޗް، 21، އަކީ މި ޓްރާންސްފާގައި އާސެނަލް އިން ހޯދަން އެންމެ ބޮޑަށް މަސައްކަތްކުރި ކުޅުންތެރިޔާ އެވެ. އޭނާ ހޯދުމަށް އާސެނަލުން ވަނީ ދެ ފަހަރެއްގެ މަތިން ބިޑްކޮށްފަ އެވެ.
އާސެނަލްގެ ހުށަހެޅުން ފިއޮރެންޓީނާ އިން ގަބޫލުކުރި ނަމަވެސް ޑީލްގެ ކަންކަން ހަމަ ނުޖެހުނީ ވްލަހޮވިޗް އާސެނަލާ ގުޅެން ބޭނުން ނުވާތީ އެވެ. ސަބަބެއްގެ ގޮތުގައި އޭނާ ފާހަގަކޮށްފައިވަނީ އާސެނަލަކީ ޗެމްޕިއަންސް ލީގުގައި ކުޅޭ ޓީމަކަށް ނުވުމާއި އެ ކްލަބް މި ވަގުތު އޮތް ހާލަތުގެ ސަބަބުންނެވެ.
އާސެނަލުން ވްލަހޮވިޗްގެ އެޖެންޓާ އެކު މަޝްވަރާތައް ކުރިއަށް ގެންދަނިކޮށް ޔުވެންޓަސް އިންވަނީ މި ޑީލްގެ ހައިޖެކްކޮށްފަ އެވެ. ޔުވެންޓަސް އިން ވްލަހޮވިޗް ހޯދުމުގެ ރޭހުގައި ކުރިހޯދީ ބޮޑު މުސާރައެއް ހުށަހަޅައިގެން ކަމަށް އިޓަލީގެ މީޑިއާ ރިޕޯޓްތައް ބުނެ އެވެ.
ޔުވެންޓަސް އިން ހުށަހަޅާފައިވާ 75 މިލިއަން ޔޫރޯގެ ބިޑް ފިއޮރެންޓިނާ އިން ގަބޫލުކޮށްފައިވާއިރު، ވްލަހޮވިޗް ވަނީ އޭނާގެ ފަރާތުން ޔުވެންޓަސްގެ ކޮންޓްރެކްޓްގައި ހިމަނަން ބޭނުންވާ ހުށަހެޅުންތައް އަންގައިފަ އެވެ. ވިހި ގޯލު ޖަހައިގެން އިޓާލިއަން ލީގުގެ ލަނޑު ލިސްޓުގެ އެއް ވަނައިގައި އޮތް ވްލަހޮވިޗްގެ ބަދަލުގައި އެހެން ފޯވާޑެއް ހޯދުމުގެ މަސައްކަތް ފިއޮރެންޓީނާ އިން ވަނީ ފަށައިފަ އެވެ. އަނެއްކޮޅުން ފައިސާ އަށް ކްލަބް ބަދަލުކުރާ ކަމަށް ބުނެ، ވްލަހޮވިޗާ ދެކޮޅަށް ފިއޮރެންޓީނާގެ ސަޕޯޓަރުން ވަނީ ޕްރެކްޓިސް ދަނޑު ކައިރީގައި ބެނާ ދަމައިފަ އެވެ.
ފިއޮރެންޓީނާ އިން 2018 ވަނަ އަހަރު ވްލާހޮވިޗް ގަތީ ހަތަރު މިލިއަން ޑޮލަރު ދީފަ އެވެ. ސާބިއާގެ ޕާޓިޒަން ބެލްގްރޭޑް ދޫކޮށް މިވީ ހަތަރު އަހަރު ތެރޭ ވްލަހޮވިޗް ވަނީ ވަރަށް ބޮޑު ކުރިއެރުމެއް ހޯދައިފަ އެވެ. ފިއޮރެންޓީނާގެ އިތުރުން ސާބިއާ ގައުމީ ޓީމުގައި ވެސް ވްލަހޮވިޗްގެ ފޯމު ރަނގަޅެވެ. ސާބިއާ އިން ވޯލްޑް ކަޕްގެ ޖާގަ ހޯދުމުގައި ވްލަހޮވިޗް އިސް ރޯލެއް އަދާކުރި އެވެ.
