ބެންކޮކް، ތައިލޭންޑް (ޖެނުއަރީ 24) - ސައުދީ އަރަބިއްޔާގެ ގަނޑުވަރަކުން ޖަވާހިރު ވަގަށް ނެގި މައްސަލައިގައި އުފެދުނު ޑިޕްލޮމެޓިކް ދެބަސްވުމަށް ފަހު، 30 އަހަރުގެ ތެރޭގައި ފުރަތަމަ ފަހަރަށް ތައިލޭންޑްގެ ބޮޑު ވަޒީރަކު ސައުދީ އަރަބިއްޔާއަށް ވަޑައިގަންނަވަން ހަމަޖެހިއްޖެ އެވެ.
ތައިލޭންޑަށް އުފަން މަސައްކަތު މީހެއް ކަމަށްވާ، ކްރިއަންގްކްރައި ޓެކަމޮންގް ސައުދީ އަރަބިއްޔާގެ އަމީރެއްގެ ގަނޑުވަރުން 20 މިލިއަން ޑޮލަރުގެ އަގުހުރި ޖަވާހިރު ވަގަށް ނެގީ 1989 ވަނަ އަހަރު އެވެ. އެއާ އެކު ދެ ގައުމުގެ މެދުގައި އުފެދުނު "ބްލޫ ޑަޔަމަންޑް" މައްސަލަ މިއަދާ ހަމައަށް ވެސް ހައްލުވެފައެއް ނުވެ އެވެ.
ވަގަށް ނެގި ޖަވާހިރުތަކުގެ ތެރެއިން ބައެއް ޖަވާހިރު ތައިލޭންޑްގެ ފުލުހުން ސައުދީ އަރަބިއްޔާގެ އޮފިޝަލުންނާ ހަވާލުކުރި އެވެ. ނަމަވެސް ސައުދީ އަރަބިއްޔާއިން ބުނީ ހަވާލުކުރި ގިނަ ޖަވާހިރަކީ ފޭކު ކަމަށެވެ. ވަގަށް ނެގި ޖަވާހިރުތަކުގެ ތެރެއިން އެންމެ އަގުހުރި 50 ކެރަޓްގެ ބްލޫ ޑަޔަމަންޑް ވީ ތަނެއް ހޯދިފައެއް ނުވެ އެވެ.
ތައިލޭންޑްގެ ބޮޑު ވަޒީރު ޕްރަޔުތް ޗަން އޮޗާ ސައުދީ އަރަބިއްޔާއަށް ދަތުރެއް ކުރެއްވުމަށް ދައުވަތު ފޮނުއްވީ ވަލީ އަހުދު އަމީރު މުހައްމަދު ބިން ސަލްމާން އެވެ. ދެ ދުވަހުގެ ދަތުރު ފައްޓަވާނީ އަންގާރަ ދުވަހުގައި ކަމަށް ތައިލޭންޑްގެ ސަރުކާރުން ނެރުނު ބަޔާނެއްގައި ބުންޏެވެ.
"މިއީ ދެ ގައުމުގެ ދައުލަތުގެ އިސްވެރިންގެ ތެރެއިން ބޭފުޅަކު 30 އަހަރުގެ ތެރޭގައި ކުރައްވާ ފުރަތަމަ ދަތުރު،" ބަޔާނުގައި ފާހަގަކޮށްފައިވެ އެވެ.
ޕްރަޔުތް އާއި ސައުދީ ވަލީ އަހުދުގެ ބައްދަލުވުމުގެ އަމާޒަކަށް ވާނީ "ދެ ގައުމުގެ ގުޅުން ވަރުގަދަކޮށް ކުރިއެރުވުން" ކަމުގައި ބަޔާނުގައި ބުންޏެވެ.
"މި ދަތުރަކީ ދެ ގައުމުން ކަންބޮޑުވާ އެއް ގޮތް މައްސަލަތަކުގައި ވިސްނުން އެއް ގޮތަކަށް ހުރުމާ އެކު ކުރެވުނު މަޝްވަރާތަކަށް ފަހު ރޭވުނު ދަތުރެއް،" ސައުދީ އަރަބިއްޔާގެ ސަރުކާރުން ނެރުނު ބަޔާނުގައި ބުންޏެވެ.
ސައުދީ އަރަބިއްޔާއިން ތުހުމަތުކޮށްފައިވާ ގޮތުގައި ޖަވާހިރުތަކުގެ ތަހުގީގަށް ތައިލެންޑްގެ ފުލުހުން ހުރަސް އެޅި އެވެ. ތައިލޭންޑްގެ އިސް ފުލުހުން ޖަވާހިރުތައް ސިއްރުން ނަގައި، ވެރިކޮށްލި ކަމަށް ވެސް ސައުދީ އަރަބިއްޔާއިން ތުހުމަރު ކުރި އެވެ.
އެކަން ތަހުގީގު ކުރަން ހާއްސަ ވިޔަފާރިވެރިޔަކު ސައުދީ އަރަބިއްޔާގެ ސަރުކާރުން ތައިލޭންޑަށް ފޮނުވީ 1990 ވަނަ އަހަރު އެވެ. ނަމަވެސް ބެންކޮކްގައި ސައުދީ ޑިޕްލޮމެޓުންގެ ގަޔަށް ބަޑި ޖަހައި މަރާލިތާ ތިން ދުވަސް ފަހުން، އެ ވިޔަފާރިވެރިޔާ ވީނުވީއެއް ނޭނގި ގެއްލުނެވެ.
ވިޔަފާރިވެރިޔާ މަރާލި ކަމަށް ތުހުމަތު ކުރެވޭ މައްސަލައިގައި ފަސް މީހެއްގެ މައްޗަށް ފެށި ތަހުގީގު 2014 ވަނަ އަހަރު ހުއްޓާލީ ހެކި ނެތް ކަމަށް ބުނެ އެވެ. ތުހުމަތުވި ފަސް މީހުންގެ ތެރޭގައި ތައިލޭންޑް އިސް ފުލުހަކު ވެސް ހިމެނެ އެވެ.
އެ މައްސަލައާ ހެދި ސައުދީ އަރަބިއްޔާގެ ސަފީރަކު ތައިލެންޑަށް ނުފޮނުވާތާ އަހަރުތަކެއް ވެއްޖެ އެވެ. ދެ ގައުމުގެ މެދުގައި ދަތުރު ކުރުމުގައި ވެސް ގިނަ ހުރަސްތަކެއް ހުރެ އެވެ.
ތައިލޭންޑްގެ ފަތުރުވެރިކަން ކުރެއެރުވައި، ވަޒީފާގެ ފުރުސަތު ހޯދައި ދިނުމުގެ ބޭނުމުގައި މައްސަލަ ހައްލުކޮށް، ގުޅުން ރަނގަޅު ކުރަން އެ ގައުމުން ބޭނުންވެ އެވެ.
ޖަވާހިރުތައް ވަގަށް ނެގިކަން ސާބިތުވި ކްރިއަންގްކްރައި ޖަލުގައި ފަސް އަހަރު ހޭދަކުރި އެވެ. ނަމަވެސް އޭނާ ހައްޔަރު ކުރުމުގެ ކުރިން ގިނަ ޖަވާހިރުތައް ވިއްކާލި އެވެ.
