ހަލުވިކަމާއެކު ފެތުރެމުންދާ ކޮވިޑް-19 ގެ ބަލިމަޑުކަމުގެ ހާލަތަށް ރިއާޔަތްކޮށް، ރާއްޖޭގެ ހުރިހާ ކޯޓެއް ހިންގަމުން އައި އުސޫލަށް ބޮޑު ބަދަލެއް ގެނައުމަށް ޑިޕާޓްމަންޓް އޮފް ޖުޑިޝިއަލް އެޑްމިނިސްޓްރޭޝަނުން (ޑީޖޭއޭ) ނިންމައިފި އެވެ.
ކޯޓުތަކުގެ ބެލެނިވެރި ފަރާތްކަމުގައިވާ ޑީޖޭއޭއިން މިއަދު ނެރުނު ސާކިއުލާގައި ބުނާ ގޮތުން މާދަމާއިން ފެށިގެން ރާއްޖޭގެ ހުރިހާ ކޯޓެއްގައި ވެސް ސަލާމަތީ ފިޔަވަޅުތައް ވަރުގަދަކުރުމަށްޓަކައި، ޝަރުއީ ދާއިރާގެ މަސައްކަތްތަކަށް ބަދަލުތަކެއް ގެންނަން ޖެހެ އެވެ.
އެގޮތުން، ބަލި ފެތުރުން ކޮންޓްރޯލް ކުރުމަށްޓަކައި އޮންލައިންކޮށް ދެވެން ހުރި ހުރިހާ ހިދުމަތެއް އެގޮތަށް ދިނުމަށް ޑީޖީޖޭއޭއިން ނެރުނު ސާކިއުލާގައި ބާރުއަޅާފައިވެ އެވެ. އަދި ކޯޓުތަކުގެ މަސައްކަތް ގޭގައި ތިބެގެން ކުރެވޭނެ މުވައްޒަފުންނަށް އެ މަގު ފަހުކޮށްދިނުމަށާއި ވީހާވެސް މަދު، އަދި ކޮންމެހެން ހާޒިރުވެގެން މަސައްކަތްކުރާން ލާޒިމްވާ މުވައްޒަފުން ވަޒީފާއަށް ނެރުމަށް އިރުޝާދު ދީފައިވެ އެވެ.
"ޝަރުއީ ކޯޓުތަކާއި އިދާރާތަކުގެ މުވައްޒަފުން ރިމޯޓްކޮށް މަސައްކަތް ކުރުމާއި ބެހޭ އުސޫލު" ގެ ދަށުން ކޮވިޑްގެ ބަލި ހާލަތަށް ރިޔާއަތްކޮށް ގޭގައި މަސައްކަތް ކުރެވޭނެ މަގު ކޯޓު މުވައްޒަފުންނަށް ފަހިކޮށްދިން ނަމަވެސް، އެ ހުރިހާ އެންމެންގެ މަސައްކަތްތައް ސުޕަވައިޒްކޮށް ޖަވާބުދާރީކުރެވޭނެ ނިޒާމެއް ކޮންމެ ކޯޓަކުން ވެސް އެކުލަވާލަން ޖެހެ އެވެ.
އެގޮތަށް މަސައްކަތް ކުރަން ފަށާއިރު، ކޯޓުގެ މައުލޫމާތުތައް ރައްކާތެރިކުރެވޭނެ ފިޔަވަޅުތަކެއް އެޅުމަށާއި، އެ ފިޔަވަޅުތައް އެ އޮފީހާއެކު ހިއްސާކުރުމަށް ޑީޖޭއޭއިން އަންގާފައިވެ އެވެ.
އޭގެ އިތުރުން މިގޮތަށް މަސައްކަތް ކުރާއިރު، ފިޔަވަޅުތަކާ ގުޅޭ ގޮތުން ގުޅާނެ ވަކި ފަރާތެއް ކޮންމެ ކޯޓަކުން ވެސް ހަމަޖައްސައި، އެކަން އާންމުކޮށް އިއުލާނުކުރުމަށް ވެސް ހުރިހާ ކޯޓަކަށް އިރުޝާދު ދީފައިވެ އެވެ.
ރާއްޖޭގައި ކޮވިޑް ހާލަތު މިހާރު ގޯސްވަމުން ދާއިރު، މިހާރު ދުވާލެއްގެ މައްޗަށް ފައްސިވާ މީހުންގެ އަދަދު އުޅެނީ 2،000 އިން މަތީގަ އެވެ. 115 ހާސް މީހުންނަށް މިހާރު ބަލި ޖެހިފައި ވާއިރު، އޭގެ ތެރެއިން 48 މީހަކަށް ދަނީ އެޑްމިޓްކުރެވިގެން ފަރުވާ ދެމުންނެވެ. ހަތަރު މީހަކު އޮތީ ވެންޓިލޭޓަރުގަ އެވެ.
މިހާތަނަށް މި ބަލީގައި ރާއްޖެއިން ޖުމްލަ 270 މީހަކު ވަނީ މަރުވެފަ އެވެ.
