ލަންޑަން، (ޖެނުއަރީ 22) - ޔުވެންޓަސްގެ އާޖެންޓީނާގެ ތަރި ޕައޮލޯ ޑިބާލާ ހޯދުމުގެ މަސައްކަތް އިނގިރޭސި ކުލަބު ޓޮޓެންހަމުން ފަށައިފި އެވެ.
ޑިބާލާ، 28، ޔުވެންޓަސްއާ އެކު ހަދާފައިވާ ކޮންޓްރެކްޓް މި ސީޒަންގެ ނިޔަލަށް ހަމަވާއިރު، ޔުވެންޓަސް އިން ހުށަހަޅާފައިވާ އާ ކޮންޓްރެކްޓްގައި ސޮއިކުރަން ޑިބާލާ ބޭނުމެއް ނުވެ އެވެ. އޭނާ ބޭނުންވަނީ މިހާރު ލިބޭ މުސާރަ ކަމަށްވާ އަހަރަކު 16 މިލިއަން ޑޮލަރަށް ވުރެ ބޮޑު އަގަކަށް އެކުލަބުގައި މަޑުކުރާށެވެ. ނަމަަވެސް ޔުވެންޓަސް އިން ބޭނުންވަނީ ޑިބާލާ މުސާރަ ކުޑަކޮށް އޭނާ 2025ގެ ނިޔަލަށް އެކުލަބުގައި މަޑުކުރުވާށެވެ.
ޑިބާލާގެ އަނިޔާގެ މައްސަލަތަކާ ހެދި ސީޒަނެއްގައި އޭނާ އަށް ގިނަ މެޗުތަކެއް ނުކުޅެވޭތީީ ޔުވެންޓަސް އިން އޭނާގެ މުސާރަ ބޮޑުކުރާކަށް ބޭނުމެއް ނޫނެވެ. އެހެންކަމުން އޭނާ މި ސީޒަން ނިމުމަށްފަހު ހިލޭ ޓްރާންސްފާ އެއްގައި އެހެން ކުލަބަކަށް ބަދަލުވުމުގެ ފުރުސަތު ބޮޑެވެ.
އެންމެ ފަހުން ލީގުގައި ޔުވެންޓަސް އުދިނޭސީއާ ދެކޮޅަށް ކުޅުނު މެޗުގައި ޑިބާލާ ގޯލު ޖެހުމަށް ފަހު އުފާފާޅުކޮށްފައެއް ނުވެ އެވެ. އިޓަލީގެ ނޫސްތަކުން ބުނަނީ މިއީ ޑިބާލާ އެކުލަބުގެ މެނޭޖުމަންޓަށް ދިން މެސެޖެއް ކަމަށެވެ.
ޔުވެންޓަސްއާ ޑިބާލާއާ ދެމެދު މައްސަަލަތައް ގޯސްވެފައިވާ މި ދަނޑިވަޅުގައި ޓޮޓެންހަމުން އަންނަނީ އިނގިރޭސި ޕްރިމިއާ ލީގަށް އޭނާ ގެންދިއުމަށް މަސައްކަތް ކުރަމުންނެވެ. މިގޮތުން ޓޮޓެންހަމްގެ މެނޭޖްމަންޓުން ޑިބާލާގެ އޭޖެންޓާ މަޝްވަރާކުރަމުން އަންނަ ކަމަށް މީޑީޔާތަކުން ރިޕޯޓްކުރެ އެވެ.
މީގެ ކުރިން 2019 ވަނަ އަހަރުވެސް ޓޮޓެންހަމުން ޑިބާލާ އަށް ބިޑް ކުރިއެވެ. އެފަހަރު އެންމެ ފަހު ވަގުތު ޑީލް ކާމިޔާބު ނުކުރެވުނީ އިމޭޖް ރައިޓްސްއާއި ގުޅޭ މައްސަލައެއް ކުރިމަތިވެގެންނެވެ.
ޔުވެންޓަސް އަށް 276 މެޗު ކުޅެދީ 111 ގޯލް ޖަހައިދީފައިވާ ޑިބާލާ އަކީ ޓޮޓެންހަމްގެ މިހާރުގެ ކޯޗު އެންޓޯނިއޯ ކޮންޓޭ ވަރަށް ގަޔާވާ ކުޅުންތެރިއެކެވެ. ބެލޭވޭ ގޮތުގައި ޓޮޓެންހަމް ވަރުގަދަ ކުރަން ކޮންޓޭ އެންމެ ބޭނުންވާ ކުޅުންތެރިޔަކީވެސް ޑިބާލާ އެވެ. އެކުލަބުގައި އާޖެންޓީނާ ގައުމީ ޓީމްގެ ބައެއް ކުޅުންތެރިން ތިބުމަކީ ދިބާލާ ޓޮޓެންހަމަށް އަތުވެދާނެ ކަމެއް ކަމަށް އެކުލަބުގެ މެނޭޖްމަންޓުން ގަބޫލުކުރެ އެވެ. އާޖެންޓީނާގެ ކްރިސްޓިއަން ރޮމޭރޯ އާއި ޖިއޮވާނީ ލޮ ސެލްސޯ ކުޅެނީ ޓޮޓެންހަމަށެވެ.
ޓޮޓެންހަމް މިވަގުތު އޮތީ އިނގިރޭސި ޕްރިމިއާ ލީގް ތާވަލްގެ ފަސް ވަނައިގަ އެވެ. އެކުލަބަށް ކުރިއަށް އޮތް މެޗަކީ ލަންޑަންގެ ވާދަވެރިން ކަމަށްވާ ޗެލްސީއާ ދެކޮޅަށް ކުޅެން ޖެހޭ މެޗެވެ.
