ޖެނީވާ، ސްވިޓްޒަލޭންޑް (ޖެނުއަރީ 21) - ރަޝިއާއިން ޔޫކްރެއިން ހިފަން އުޅޭ ކަމުގެ ތުހުމަތުތައް ބޮޑުވެފައިވާ މި ދަނޑިވަޅުގައި އެމެރިކާ އާއި ރަޝިއާގެ ފޮރިން މިނިސްޓަރުން ބައްދަލުކޮށްފި އެވެ.
ޔޫކްރެއިންއާ ގުޅޭ މަޝްވަރާތައް ކުރުމަށް ޖެނީވާގައި ބައްދަލުކުރެއްވީ އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެން އާއި ރަޝިއާގެ ފޮރިން މިނިސްޓަރު ސާގެއި ލެވްރޯވް އެވެ.
"މިއީ މުހިއްމު ވަގުތުކޮޅެއް،" މަޝްވަރާ ފެށުމުގެ ކުރިން ބްލިންކެން ވިދާޅުވި އެވެ.
"އަޅުގަނޑުމެންގެ މައްސަލަތައް މި ތަނުގައި މިއަދު ހައްލު ކުރެވޭނެ ކަމަކަށް ގަބޫލެއް ނުކުރަން،" ޑިޕްލޮމެސީ ކުރިއަށް ނެރުމަކީ އަދިވެސް އޮތް އިހްތިޔާރެއްތޯ ބެލުން މުހިއްމުކަން ފާހަގަކުރައްވަމުން އޭނާ ވިދާޅުވި އެވެ.
ބައްދަލުވުމަށް ފަހު ލެވްރޯވް ވިދާޅުވީ މަޝްވަރާ ކުރިއަށް ދިޔައީ ވަރަށް ބޮޑަށް ހުޅުވާލެވިގެން ކަމަށާއި އެއީ މުހިއްމު މަޝްވަރާތަކެއް ކަމަށެވެ.
ރަޝިއާ އާއި ޔޫކްރެއިން ގުޅޭ ބޯޑަރު ކައިރީގައި 100،000 ރަޝިއާ ސިފައިން އެބަ ތިއްބެވެ. ނަމަވެސް ޔޫކްރެއިން ހިފަން އުޅޭ ކަމަށް ކުރާ ތުހުމަތުތައް ރަޝިއާއިން ދޮގުކުރެ އެވެ.
މަޝްވަރާގެ ތެރެއިން ބްލިންކެން ވިދާޅުވީ ރަޝިއާއިން ޔޫކްރެއިން ހިފައިފި ނަމަ "ގައުމުތައް ގުޅިގެން އަވަސް، ވަރުގަދަ ރައްދެއް ދޭނެ" ކަމަށެވެ.
ރަޝިއާގެ ރައީސް ލެޑިމިއަ ޕުޓިން ހުޅަނގުގެ ގައުމުތަކަށް ޑިމާންޑްތަކެއް ހުށަހަޅުއްވާފައި ވާއިރު، އޭގެ ތެރޭގައި ނޭޓޯގެ މެމްބަރުކަން ޔޫކްރެއިނަށް ނުދިނުން ހިމެނެ އެވެ.
އޭގެ އިތުރުން ނޭޓޯއިން އިރުމަތީ ޔޫރަޕްގައި އަސްކަރީ ތަމްރީން ހިންގުން ހުއްޓާލައި، އެ ސަރަހައްދަށް ހަތިޔާރު ފޮނުވުން ހުއްޓާލަން ވެސް ހުށަހަޅުއްވާފައި ވެ އެވެ.
މަޝްވަރާއަށް ފަހު ބޭއްވި ޕްރެސް ކޮންފެރެންސްގައި ލެވްރޯވް ވިދާޅުވީ ނޭޓޯއިން އުޅެނީ ރަޝިއާއާ ދެކޮޅަށް ކަމަށާއި ރަޝިއާއިން "ދުވަހަކު ވެސް ޔޫކްރެއިން ރައްޔިތުންނަށް ބިރުދައްކާފައި ނުވާނެ" ކަމަށެވެ. އޭގެ އިތުރުން ޔޫކްރެއިން ހިފުމުގެ އެއްވެސް ވިސްނުމެއް ނެތް ކަމަށް ވިދާޅުވި އެވެ.
ރަޝިއާއިން ހުށަހެޅި ޑިމާންޑްތަކާ ގުޅޭ ރައްދެއް އަންނަ ހަފްތާގައި ލިޔުމުން އެމެރިކާއިން ހުށަހަޅާނެ ކަމަށް ލެވްރޯވް ވިދާޅުވި އެވެ. އޭގެ ފަހުން ދެ ގައުމުން އަނެއްކާވެސް ބައްދަލުވުމެއް ބާއްވާނެ އެވެ.
