މެޑްރިޑް (ޖެނުއަރީ 21) - ސްޕެނިޝް ކަޕް (ކޮޕަ ޑެލް ރޭ)ގައި ރޭ ކުޅުނު ގަދަ 16 ބުރުގެ މެޗުތަކުގައި، އެތުލެޓިކް ބިލްބާއޯ އަތުން 3-2 އިން ބަލިވެ، ބާސެލޯނާ މުބާރާތުން ކެޓިއިރު، އެޑެން ހަޒާޑް ޖެހި ގޯލުން 2-1 އިން އެލްޗޭގެ މައްޗަށް ކުރިހޯދައި ރެއާލް މެޑްރިޑުން ކުއާޓާ ފައިނަލުގެ ފުރުސަތު ހޯދައިފި އެވެ.
ރޭގެ މެޗު ފަށައިގެން ދެ މިނިޓް ތެރޭ ބިލްބާއޯގެ އިކާ މުނިއައީން ވަނީ އެ ޓީމަށް ލީޑުނަގައިދީފަ އެވެ. މެޗުގެ 20 ވަަނަ މިނިޓްގައި އޭރިއާތެރެއިން ފެރާން ޓޮރޭޒް ޖެހި މޮޅު ގޯލުން ބާސެލޯނާ ނަތީޖާ ހަމަހަމަކުރި އެވެ. މިއީ މި މަހު މެންޗެސްޓާ ސިޓީ ދޫކޮށް ބާސެލޯނާ އަށް ބަދަލުވުމަށް ފަހު ފެރާން ޓޮރޭޒް ޖެހި ފުރަތަމަ ގޯލެވެ.
މެޗުގެ ފުރިހަމަ ވަގުތު ހަމަވާން ހަތަރު މިނިޓަށް ވެފައި ހުއްޓައި އިނީގޯ މާޓީނޭޒް ވަނީ ބިލްބާއޯ އަށް ދެ ވަނަ ފަހަރަށް މި މެޗުގައި ލީޑުނަގައިދީފަ އެވެ. އެކަމަކު، އިތުރު ވަގުތުގެ ތިން ވަނަ މިނިޓްގައި ޕެޑްރީ ގޮންޒާލޭޒް ވަނީ އޭނާ އަށް ލިބުނު ފުރުސަތުގެ ބޭނުންހިފައި ބާސެލޯނާ އަށް އެއްވަރުކޮށްދީފަ އެވެ.
އެކަމަކު، ނަތީޖާ ނެރެން ކުޅުނު އިތުރު ވަގުތުގެ ދެ ހާފްގެ ތެރެއިން ފުރަތަމަ ހާފުގައި ލިބުނު ޕެނަލްޓީ އަކުން މުނިއައީން ވަނީ ބިލްބާއޯ މޮޅުވި ގޯލު ޖަހައިފަ އެވެ.
ބާސެލޯނާގެ ކޯޗު ޒަވީ ހެނާންޑޭޒް ބުނީ މޮޅުވާން ދަނޑުމަތީގައި ކުރި މަސައްކަތަށް ބަލާއިރު، ބިލްބާއޯ ފެނުނީ ބާސެލޯނާ އަށް ވުރެ ރަނގަޅުކޮށް ކަމަށާއި ނަތީޖާގައި ވެސް ފެނުނީ އެ ތަފާތު ކަމަށެވެ.
ރެއާލް މޮޅުވީ ވެސް އިތުރު ވަގުތުގެ ދެ ހާފް ކުޅެގެންނެވެ. މެޗުގެ 90 މިނިޓް ހަމަވިއިރު، ދެ ޓީމަށް ވެސް ގޯލެއް ނުޖެހި އޮވެފައި އިތުރު ވަގުތުގެ ފުރަތަމަ ހާފުގައި، ގޮންޒާލޫ ވާޑޫ ވަނީ އެލްޗޭ އަށް ލީޑުނަގައިދީފަ އެވެ. އެއީ ރެއާލްގެ މާސެލޯ އަށް ރަތް ކާޑެއް ދެއްކިތާ މާ ގިނައިރެއްނުވެ އެވެ.
ރެއާލުން ވަނީ އެއް ކުޅުންތެރިއަކު މަދުކޮށް، އިތުރު ވަގުުތުގެ ދެ ވަނަ ހާފުގައި ކުޅެން އަރައި ނަތީޖާ އަނބުރާލައިފަ އެވެ. ރެއާލުން އެއްވަރުކުރީ ޑެނީ ސެބާޔޯސް ދިން ބޯޅައަކުން އިސްކޯ ޖެހި ގޯލުންނެވެ. ރެއާލް މޮޅުކޮށްދިން ގޯލު ޖަހަން ހަޒާޑަށް ފުރުސަތު ތަނަވަަސްކޮށްދިނީ ޑޭވިޑް އަލަބާ އެވެ.
އެލްޗޭ އިން ވެސް މެޗު ނިންމާލީ ކުޅުންތެރިއަކު މަދުކޮށެވެ. އެއީ އިތުރު ވަގުތުގެ ދެ ވަނަ ހާފުގައި ޕެރޭ މިލިއާ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ.
ކޮޕަ ޑެލް ރޭގެ ކުއާޓާ ފައިނަލުން ރެއާލާއި ބިލްބާއޯގެ އިތުރުން ދެން ފުރުސަތު ހޯދީ ރެއާލް ސޮސިއެޑާޑް، މަޔޯކާ، ރަޔޯ ވަޔެކާނޯ، ކަޑީޒް، ވެލެންސިއާ އަދި ރެއާލް ބެޓިސް އެވެ. މިހާރު އޮތްގޮތުން މުބާރާތުގެ ފޭވަރިޓަކީ ރެއާލް އެވެ.
ދާދި ފަހުން ސްޕެނިޝް ސުޕަ ކަޕްގެ ތަށި ހޯދި ރެއާލުން އެންމެ ފަހުން ކޮޕަ ޑެލް ރޭ ކާމިޔާބުކުރީ 2014 ގަ އެވެ. އޭރު ރެއާލްގެ ކޯޗަކީ މިހާރު އެ މަގާމުގައި ހުރި ކާލޯ އަންޗެލޮޓީ އެވެ.
