ސައްތައިން ސައްތަ އިއާދަކުރަނިވި ހަކަތައިން ހިންގާނެ ރާއްޖޭގެ ފުރަތަމަ އެއާޕޯޓަކަށް ގަން އެއާޕޯޓް ބަދަލުކުރުމުގެ އެއްބަސްވުމުގައި، އައްޑޫގައި އިއާދަކުރަނިވި ހަކަތައިގެ ބިޔަ މަޝްރޫއު ހިންގާ އަބޫދާބީގެ ކްލިއާ ފިއުޗާ ސިނާޖީ ކުންފުންޏާއެކު ފެނަކަ ކޯޕަރޭޝަނުން މިއަދު ސޮއިކޮށްފި އެވެ.
ފެނަކަ ކޯޕަރޭޝަންގެ މެނޭޖިން ޑިރެކްޓަރު އަހުމަދު ސައީދު މުހައްމަދު "އަދަދު" އަށް ވިދާޅުވީ އައްޑޫގައި ކްލިއާ ފިއުޗާ ސިނާޖީން ހިންގާ މަޝްރޫއުގެ އަގު 10 މިލިއަން ޑޮލަރު (150 މިލިއަން ރުފިޔާ) އަށް ވުރެ މަތި ކަމަށެވެ. މިހާރު ފަށާފައިވާ މި މަޝްރޫއު އެއް އަހަރުތެރޭގައި ނިމެނޭ އެވެ.
މިއަދު ސޮއިކުރި އެއްބަސްވުމުގެ ދަށުން، ކްލިއާ ފިއުޗާއިން އައްޑޫގައި ޖަހާ ސޯލާ ޕެނަލްތަކުން އުފައްދާ ހަކަތަ ފެނަކަ އަށް ގަންނާނެ އެވެ.
"މި މަޝްރޫއުއިން ތިން ފައިދާއެއް ލިބޭ. އެއީ ތެލަށް ހޭދަވާ މިންވަރު ދަށަށް ދިއުން. ޖައްވަށް ދޫކުރާ ވިހަ ގޭސް މަދުވުން. އަދި ބައިނަލްއަގުވާމީ މުއާހަދާތަކާ އެއްގޮތަށް ރާއްޖެއިން ނެޓް ޒީރޯއަށް ވާސިލުވުމުގެ އިތުރު ބޮޅަކަށްވުން،" ސައީދު ވިދާޅުވި އެވެ.
"މިއީ މާލޭ ސަރަހައްދު ފިޔަވައި ރާއްޖޭގެ ސަރަހައްދެއްގައި ޕީޕީއޭއެއްގެ ދަށުން މިހާތަނަށް ގާއިމްކުރެވޭ އެންމެ ބޮޑު އިޢާދަކުރަނިވި ހަކަތައިގެ މަޝްރޫއު."
އެ މަޝްރޫއުގެ ދަށުން ހުޅުމީދޫގައި ދެ މަގަވޮޓް ޕީކްގެގެ ސޯލާ ޕީވީ، އަދި ބެޓާރީ ސްޓޯރޭޖެއް ގާއިމުކުރާނެ ކަމަށާއި ގަން އިންޓަނޭޝަނަލް އެއާޕޯޓްގައި 2.5 މަގަވޮޓް ޕީކްގެ ސޯލަރ ޕީވީ ބަހައްޓާނެ ކަމަށް ފެނަކަ ކޯޕަރޭޝަނުން ބުނެ އެވެ.
"އުންމީދަކީ ކުރިމަގުގައި ހުޅުމީދޫގައި އިންސްޓޯލްކުރެވޭ ސޯލާ ޕެނަލްތަކުން ކައިރީގައި ހުރި ރިސޯޓްތަކަށް ވެސް ކަރަންޓް ދިނުން،" ސައީދު ވިދާޅުވި އެވެ.
އެ މަޝްރޫއުގެ ސަބަބުން ކަރަންޓު އުފެއްދުމަށް ކުރާ ހޭދައިން އަހަރަކު ގާތްގަނޑަކަށް 2.1 މިލިޔަން ލިޓަރު ޑީސަލް އެންދުން މަދުކުރެވޭނެ އެވެ. އެއީ މިހާރު ޑީސަލްގެ ރީޓެއިލް އަގަށް ބަލާއިރު 22 މިލިއަން ރުފިޔާ އެވެ. އަދި ޖައްވަށް ބޭރުވާ ވިހަ ގޭހުގެ ތެރެއިން އަހަރަކު 5,500 ޓަނު ކާބަން ޑައި އޮކްސައިޑް މަދުކުރެވޭނެ ކަމަށް ފެނަކައިން ބުނެ އެވެ.
