ގުދުސް (ޖެނުއަރީ 20) - އިރުމަތީ ގުދުސްގައި އިޒްރޭލް ފުލުހުން ފަލަސްތީނުގެ އާއިލާއެއް މަގުމަތި ކުރުމަށް ފަހު އެ އާއިލާއިން ހައްޔަރު ކުރި ފަސް މީހުން ދޫކޮށްލައިފި އެވެ.
ބުދަ ދުވަހުގެ ފަތިސްވުމުގެ ކުރިން އިޒްރޭލް ފުލުހުން ވަނީ ސަލްހިޔާ އާއިލާ ޝެއިހް ޖައްރާ ހިސާބުގަނޑުގައި ދިރިއުޅޭ ގެޔަށް ގޮސް، އެ ގެ ބިމާ ހަމަކުރުމުގެ މަސައްކަތް ފަށާފަ އެވެ.
އެ މަސައްކަތުގެ ތެރެއިން އާއިލާގެ ފަސް މީހުން ހައްޔަރު ކުރީ ކޯޓު އަމުރެއް ތަންފީޒު ކުރަން ހުރަސް އެޅުމާއި، ހަމަނުޖެހުން އުފައްދަން އުޅުނުކަމުގެ ތުހުމަތުގަ އެވެ.
އާއިލާގެ ގާނޫނީ ވަކީލް ވާލިދް އަބޫ ތަޔޭހް ވިދާޅުވީ ބުދަ ދުވަހުން ފެށިގެން ބަންދުކޮށްފައި ތިބި އާއިލާގެ ފަސް މީހުން މިހާރު ދޫކޮށްލާފައިވާ ކަމަށެވެ.
އޭނާ ބުނީ އެ މީހުން ދޫކޮށްލީ 320 ޑޮލަރު ޖޫރިމަނާއެއް ދައްކާ ގޮތަށް ކަމަށާއި ޝެއިހް ޖައްރާ ސަރަހައްދަށް ވަނުން އެއް މަސް ދުވަހަށް މަނާކުރި ކަމަށެވެ.
ޝެއިހް ޖައްރާގެ ގެތަކުން ފަލަސްތީން މީހުން ނެރެން މަސައްކަތް ކުރާ މައްސަލަ ހޫނުވެ، މިދިޔަ އަހަރު އިޒްރޭލާއި ފަލަސްތީނާ ދެމެދު 11 ދުވަހުގެ ހަނގުރާމައެއް ގާޒާގައި ކުރި އެވެ.
އިޒްރޭލުން އިރުމަތީ ގުދުސް ހިފީ 1967 ވަނަ އަހަރު ކުރި ހަ ދުވަހުގެ ހަނގުރާމައަށް ފަހު އެވެ. ނަމަވެސް އެއީ އިޒްރޭލުގެ ބަޔެއްގެ ގޮތުގައި ބައިނަލްއަގްވާމީ މުޖުތަމައިން ބަލައެއް ނުގަނެ އެވެ.
