ގުދުސް (ޖެނުއަރީ 19) - ފަލަސްތީނަށް އެހީވުމަށް 1.6 ބިލިއަން ޑޮލަރު ބޭނުންވާ ކަމަށް ފަލަސްތީން ރެފިއުޖީންނަށް ހާއްސަ އދ. ގެ އެޖެންސީން (ޔޫއެންއާރްޑަބްލިއުއޭ) ބުނެފި އެވެ.
އދ. ގެ އެޖެންސީން ބުނީ ބަޖެޓުގެ ދަތިކަން ވަރަށް ދިމާވަމުންދާ ކަމަށާއި ބައިނަލްއަގްވާމީ އެހީތެރިކަން އިތުރު ނުވާ ނަމަ ވަރަށް ގިނަ ކަންކަން ހުއްޓާލަން ޖެހޭނެ ކަމަށެވެ.
އެގޮތުން އެ އެޖެންސީން އެހީ ފޯރުކޮށްދޭ ފަލަސްތީން ރެފިއުޖީންގެ ދިރިއުޅުމުގެ ފެންވަރު ދަށްވެ، ސިއްހަތަށް ނުރަނގަޅު ކުރުން އެކަށީގެންވާ ކަމަށް ބަޔާނެއްގައި ބުންޏެވެ.
ފަލަސްތީން ރެފިއުޖީންނަށް ހާއްސަ އދ. ގެ އެޖެންސީގެ ބަޖެޓަށް އަސަރު ކުރަން ފެށީ 2018 ވަނަ އަހަރު އެމެރިކާގެ ކުރީގެ ރައީސް ޑޮނަލްޑް ޓްރަމްޕް އެހީގެ އަދަދުތައް ކުޑަ ކުރެއްވުމުންނެވެ.
ޓްރަމްޕްގެ ސަރުކާރުން ބުނީ އެ އެޖެންސީއަކީ ރަނގަޅަށް މަސައްކަތް ކުރާ ތަނެއް ނޫން ކަމަށެވެ. އިޒްރޭލް އުފެދުނުތާ އަހަރެއް ފަހުން 1949 ވަނަ އަހަރު އުފެއްދި އެ އެޖެންސީއަށް އިޒްރޭލުން ވެސް ވަރަށް ގިނައިން ފާޑުކިޔަ އެވެ.
ރައީސް ޖޯ ބައިޑެންގެ ސަރުކާރުން ބައެއް އެހީތައް އިތުރު ކުރި ނަމަވެސް، އެ އެޖެންސީން ބުނީ އަދިވެސް މަސައްކަތް ކުރަން ޖެހެނީ ވަރަށް ބޮޑެތި ދަތިތަކާ އެކުގައި ކަމަށެވެ.
މިދިޔަ ނޮވެމްބަރު މަހު އެ އެޖެންސީން ބުނީ ބަޖެޓު ހުސްވަމުން ދާތީ އެޖެންސީ އުވާލުމުގެ ހާލަތު ދިމާވުން ގާތް ކަމަށެވެ. އެ އެޖެންސީގެ މުވައްޒަފުންގެ ގޮތުގައި 28،000 މީހުން އުޅެ އެވެ.
އެޖެންސީން ފޯރުކޮށްދޭ ހިދުމަތްތަކަކީ ފަލަސްތީނުގެ ފަސް މިލިއަން ރައްޔިތުންނަށް ތައުލީމާއި ސިއްހީ ފަރުވާ ފޯރުކޮށްދިނުމެވެ. އެގޮތުން އިރުމަތީ ގުދުސް، އުރުދުން، ލުބްނާން އަދި ސީރިއާގައި އުޅޭ ފަލަސްތީން ރެފިއުޖީންނަށް ވެސް އެ ޖަމިއްޔާއިން ހިދުމަތް ފޯރުކޮށްދެ އެވެ.
