ހުޅުމާލޭ ދެ ފިޔަވަހި ގުޅޭ ސަރަހައްދުގައި ހަދާފައިވާ "ޗެނަލް ޕާކް" ސަރަހައްދުގައި ކެފޭ ނޫނީ ރެސްޓޯރަންޓު ހަދަން ހަތް ބިމެއް ދިގުމުއްދަތަށް ކުއްޔަށް ދޫކުރަން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މިއަދު އިއުލާނުކޮށްފި އެވެ.
ހުޅުމާލޭގައި ދިރިއުޅޭ މީހުން މުނިފޫހިފިލުވުމަށް ގިނަ ރެކްރިއޭޝަނަލް ތަންތަން ހިމެނޭ ގޮތަށް ތަރައްގީކުރާ ޗެނަލް ޕާކުގައި ކެފޭ/ރެސްޓޯރަންޓުތައް ހަދަން ބިންތައް ދޫކުރަނީ 20 އަހަރު ދުވަހުގެ މުއްދަތަށެވެ. މި ތަނުގައި އިމާރާތްކުރުމުގެ ހުރިހާ ކަމެއް ކުރަން ޖެހެނީ ކުއްޔަށް ނަގާ ފަރާތުންނެވެ.
ކުއްޔަށް ދޫކުރާ ބިންތަކުގެ ބޮޑުމިން އުޅެނީ 3237 އަކަފޫޓާއި 1700 އަކަފޫޓާ ދޭތެރޭގަ އެވެ. މި ޕާކުގެ ދެ އަރިމަތިން ފޭސް 1 އާއި ފޭސް 2 އިން ކެފޭ ހަދަން ކުއްޔަށް ދޫކުރަން ރާވާފައިވީ ނަމަވެސް، މިފަހަރު ދޫކުރާ ހުރިހާ ބިންތަކެއް ހުންނަނީ ދެވަނަ ފިޔަވަހީގައި ކަމަށް އެޗްޑީސީން ބުންޏެވެ.
މި ޕާކުގެ މަސައްކަތް އެއްކޮށް ނިމޭއިރު ޖުމްލަ 14 ކެފޭ/ރެސްޓޯރަންޓު ހުންނާނެ އެވެ.
ޗެނަލް ޕާކުން ދޫކުރާ ބިންތައް
- ލޮޓް ނަމްބަރު 11674 - 3،237.03 އަކަފޫޓޫ
- ލޮޓް ނަމްބަރު 11675 - 2،957.49 އަކަފޫޓޫ
- ލޮޓް ނަމްބަރު 11676 - 2586.57 އަކަފޫޓޫ
- ލޮޓް ނަމްބަރު 11677 - 1،700.37 އަކަފޫޓު
- ލޮޓް ނަމްބަރު 11678 - 1،706.08 އަކަފޫޓޫ
- ލޮޓް ނަމްބަރު 11679 - 2،091.64 އަކަފޫޓޫ
- ލޮޓް ނަމްބަރު 11680 - 3،0165.08 އަކަފޫޓޫ
އެކި ބޮޑު މިނުގައި ހުރި ބިންތަކުގައި އިމާރާތް ކުރެވެނީ ކަނޑައެޅިފައިވާ ވަކި ސަރަހައްދެއްގަ އެވެ. ބާކީ ސަރަހައްދު ކެފޭ ހިންގާ މީހުންނަށް ބޭނުންކުރެވުނު ނަމަވެސް, އެތަނުގައި އިމާރާތްކުރުމާއި ފަސޭހައިން ނުއުފުލޭ ފަރުނީޗަރު ބެހެއްޓުން މަަނަލެވެ.
ހުޅުމާލެ ޗެނަލް ޕާކް: ބިންތައް ދޫކުރަން އިއުލާނުކުރީ މި ސަރަހައްދުން -- ފޮޓޯ: މުހައްމަދު ޝާބިން/އަދަދު
ބިމުގެ ވަކި ބަޔެއްގައި އިމާރާތްނުކުރެވޭތީ އެޗްޑީސީން ބިމު ކުލި ކަނޑައަޅާފައި ވަނީ އޯޕަން އޭރިއާއަށް ކުޑަކޮށް، އިމާރާތްކުރެވޭ ސަރަހައްދަށް ބޮޑުކޮށެވެ.
ޗެނަލް ޕާކު ސަރަހައްދުން ކުއްޔަށް ދިނުމަށް ހަމަޖެހިފައިވާ ބިންތަކުގެ ކުލީގެ ގޮތުގައި ބިޑް ކުރުމަށް ފެށޭ އަގެއްގެ ގޮތުގައި ކަނޑައަޅާފައިވާ އަގަކީ އަކަފޫޓަކަށް 25ރ. އެވެ. މީގެ އިތުރުން އާންމުކޮށް ކޮންމެ ޕްރޮޖެކްޓަކުންވެސް ނަގާ އިކިއުޒިޝަން ފީ ފެށޭ އަގެއްގެ ގޮތުގައި ކަނޑައަޅާފައިވަނީ 356.23ރ. އެވެ.
މި ދެ ފީ އަކީވެސް ބިޑްއަށް ހުށަހަޅާ ފަރާތްތަކުނެ ބިޑްގައި ހިމަނަން ޖެހޭ އަގުތަކެވެ. އަދި ހަމައެއާއެކު ބިޑުން ހޮވޭ ފަރާތްތަކުން މި ދެ ފީވެސް ދައްކަން ޖެހޭނެ އެވެ.
މި ތަންތަނަށް ބިޑު ހުށަހެޅުމުގެ ސުންގަޑިއަކީ ފެބްރުއަރީ، 10 އެވެ.
