ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ފަސް އަހަރު ދުވަހަށް ޖަލަށް ލާން ކްރިމިނަލް ކޯޓުން 2019 ވަނަ އަހަރު ކުރި ހުކުމް ސުޕްރީމް ކޯޓުން ބާތިލުކުރުމާ ހަމައަށް، ނުދީ ހުރި އިނާޔަތު ފައިސާ ސަރުކާރުން އެމަނިކުފާނަށް ދީފި އެވެ.
މަނީ ލޯންޑާ ކުރުމުގެ ކުށް ސާބިތުވިކަމަށް ކަނޑައަޅައި ކްރިމިނަލް ކޯޓުން ޔާމީނަށް ޖަލުހުކުމް އިއްވުމާ ހަމައަށް އިނާޔަތުގެ ގޮތުގައި އެމަނިކުފާނު ނަންގަވަމުން ގެންދެވީ 100،000ރ. އެވެ. އެއީ އިނާތުގެ ގޮތުގައި ދޭ 50،000ރ. އާއި ދިރިއުޅުއްވާ ތަނުގެ ހަރަދަށް ދޭ 50،00 އެވެ. އޮފީސް ހިންގުމުގެ ހަރަދަށް ދޭ 175،000ރ. އެމަނިކުފާނު ނުނަންގަވަ އެވެ. ކުރީގެ ރައީސްގެ އޮފީހުގެ ގޮތުގައި އެމަނިކުފާނު އަދި އޮފީހެއް ގާއިމްވެސް ނުކުރައްވަ އެވެ.
ފިނޭންސް މިނިސްޓްރީގެ މީޑިއާ އެގްޒެކެޓިވް މުހައްމަދު ޝަނޫނު ވިދާޅުވީ ގާނޫނީ ގޮތުން ޔާމީނަށް ދޭން ދައުލަތަށް ލާޒިމްކުރާ ފައިސާ މިދިޔަ ހަފްތާގައި ޖަމާކޮށްފައިވާ ކަމަށެވެ. އެއީ މަހަކަށް 100،000 ގެ މަގުން 24 މަހަށް ވާ 2.4 މިލިޔަން ރުފިޔާ އެވެ.
ކުރީގެ ރައީސެއްގެ ހައިސިއްޔަތުން ލިބިވަޑައިގަންނަވާ އެ އެފައިސާ ހޯއްދަވަން ޔާމީނުގެ ވަކީލުން ހުށަހެޅުއްވީ މިދިޔަ ޑިސެމްބަރު މަހު އެވެ. އެއީ ކްރިމިނަލް ކޯޓުން އެމަނިކުފާނަށް ކުރި ހުކުމް ސުޕްރީމްކޯޓުން ބާތިލްކުރުމުންނެވެ.
