އދ. މާފުށިވަރުގައި ތަރައްގީކޮށްފައިވާ މާފުށިވަރު މޯލްޑިވްސް ރިސޯޓު ވިއްކާލުމުގެ މަސައްކަތް ފަށައިފި އެވެ.
މި ރިސޯޓަކީ ޔުނިވާސަލް ކުންފުންޏާ ގުޅުން އޮންނަ ޕެރެޑައިސް ރިސޯޓް ޑިވެލޮޕްމަންޓު އެންޑް މެނޭޖްމަންޓުން ތަރައްގީކޮށްފައިވާ 81 ކޮޓަރީގެ ރިސޯޓެކެވެ.
ބޮޑު މަރާމާތަކަށް ފަހު މާފުށިވަރު ރިސޯޓު އަލުން ހުޅުވީ ކޮވިޑު ބަލިމަޑުކަމުގެ ސަބަބުން ބޯޑަރު ބަންދުކުރުމަށް ފަހު އަލުން ހުޅުވާލިތާ ކުޑަދުވަސްކޮޅެއްގެ ތެރޭގަ އެވެ. އެ ރިސޯޓު އަލުން ހުޅުވީ ޖަރުމަނުގެ ޑާ ޓޫރިސްޓިކް ކުންފުނީގެ އެލްޓީއައިގެ މެނޭޖުމަންޓުގެ ދަށުން އެލްޓީއައި މާފުށިވަރު މޯލްޑިވްސްގެ ނަމުގަ އެވެ.
ކުރިން މާފުށިވަރުގައި ރިސޯޓު ހިންގީ ޓްވިން އައިލެންޑްސް ރިސޯޓުގެ ނަމުގަ އެވެ.
ޓްވިން އައިލެންޑްސް ނަން ނިސްބަތްވަނީ މާފުށިވަރާ ޖެހިގެން އޮންނަ ދެ ހަސަނު ލޮނު ބުއި ހުރާ (އދ. ލޮނުބުއި) ހުރާ ވެސް ބޭނުންކުރަމުން ދާތީ އެވެ. އެކަމަކު މިއީ އެ ރިސޯޓާ އެކީ ކުއްޔަށް ދީފައިވާ ރަށެއް ކަން އެނގޭކަށް ނެތެވެ.
މާފުށިވަރުގައި ރިސޯޓެއް ހިންގަން އޮޕަރޭޓިން ލައިސެންސް ދިނީ 1991 ގަ އެވެ.
އދ. މާފުށިވަރު
- ރަށުގެ ބޮޑުމިން – 3 ހެކްޓަރު
- ކޮޓަރި – ބީޗް ވިލާ އާއި ވޯޓާ ވިލާ ހިމަނައިގެން 81 ކޮޓަރި
- ރިސޯޓު ހިންގާތާ – 30 އަހަރު
- ކޮޓަރި ވިއްކާ އަގުތައް - ރެޔަކަށް 471-668 ޑޮލަރު
- އެންމެ ކައިރިން އޮންނަ މީހުން ދިރިއުޅޭ ރަށް – އދ. ދަނގެތި
މާފުށިވަރު ރިސޯޓު ވިއްކާލަނީ ކިހާ ވަރަކަށް ކަމެއް ސާފެއް ނޫނެވެ. މި ނޫނަސް ރާއްޖޭގައި ވިއްކާލާ ރިސޯޓުތަކާ ގުޅިގެން ހިންގާ މާލީ މުއާމަލާތްތަކުގެ މައުލޫމާތު މަދު ފަހަރެއްގައި ނޫނީ އާންމު ނުކުރެ އެވެ.
މި ރިސޯޓު ވިއްކާލުމުގެ މުއާމަލާތާ ގުޅިގެން ޓޫރިޒަމް މިނިސްޓްރީން މިދިޔަ ބުރާސްފަތި ދުވަހު ކުރި އިއުލާނުގައި ވަނީ އެ ރަށް ކުއްޔަށް ހިފާފައިވާ ފަރާތަށް ލިބިދީފައިވާ އެންމެހޭ ހައްގުތައް އެހެން ފަރާތަކަށް ބަދަލުކުރުމުގެ ހުއްދައަށް އެދި ހުށަހަޅާފައިވާ ކަމަށެވެ.
އަދި، އެ ރިސޯޓާ ގުޅިގެން އެއްވެސް ދަރަންޏެއް ނުވަތަ މައްސަލައެއް އޮތް ފަރާތެއް ވާނަމަ އިއުލާން ޝާއިއުކުރި ދުވަހުން ފެށިގެން 14 ދުވަހުގެ މުއްދަތެއްގެ ތެރޭގައި މިނިސްޓްރީއަށް ލިޔުމުން އަންގަން ވަނީ ބުނެފަ އެވެ.
މިއީ މި އަހަރުގެ ތެރޭގައި ރިސޯޓެއް ހަދަން ކުއްޔަށް ދީފައިވާ ރަށްތަކުގެ ތެރެއިން ވިއްކާލަން އިއުލާނުކުރި ދެވަނަ ރަށެވެ. އަނެއް ރަށަކީ ނ. ރާފުއްޓެވެ.
